2 Corinthians 2

Ilokano (Ti Biblia (1973))

← Chapter 1 Jump to: Chapter 3 →

1Ngem daytoy inkeddengco a siac, a diacto umay manen cadacayo a silaladingit.

2Ta no siac pagladingitencayto, siasino ngarud ti mangragragsac caniac, no di daydiay mapagladingit gapu caniac?

3Ket nagsuratac cadacayo ti maipapan itoy met laeng a banag, tapno inton dumtengac, awan coma ti paglidayac iti biang dagidiay a rebbengco coma a pagragsacan, a manginanamaac a ti rag-oc isu ti rag-oyo amin.

4Ta iti tengnga ti adu a ladingit ken sainnec ti puso, nagsuratac a silulua cadacayo; saan a tapno mapaladingitcayo, no di ket tapno maammoanyo ti ayatco a naglaplapusanan cadacayo.

5Ngem no adda namaldaang, saan a siac ti pinagleddaangna, no di ket dagiti dadduma tapno dicay mapabasol amin.

6Umanayen iti casta a tao dayta a dusa nga impatay kencuana dagiti ad-adu cadacayo;

7Iti casta rebbengyo ket di nga pacawanen ken liwliwaen, di la ket ta dayta a tao malmes iti aglablabes a liday.

8Gapuna, dawatec cadacayo a panecnecanyo ti ayatyo kencuana.

9Ta gapu met itoy nagsuratac, tapno mapadasco ti cababalinyo, no natulnogcayo cadagiti isu-amin.

10Ngem iti pamacawananyo iti aniaman, pacawanec met: ta castaac met no adda pinacawanco, pinacawanco, gapu cadacayo iti biang ni Cristo.

11Tapno ni Satanas saannatayo a gundawayan; ta ammotayo dagiti kinasicapna.

12Ngem idi dimtengac idiay Troas, gapu iti evangelio ni Cristo, ken idi a nawayaanen ti dalanco iti Apo,

13Saan a nagtalna ti nakemco gapu ta diac nasaracan ni Tito a cabsatco: ngem idi nacapacadaac cadacuada, napanac idiay Macedonia.

14Ngem yaman pay iti Dios, isu nga agnanayon a mamagballigi cadacami ken Cristo, ket gapu iti pannacaaramatmi iparangarangna ti sayamusom ti pannacaammo kencuana met laeng iti isu-amin a disso.

15Ta iti Dios dacami ti maysa a macaay-ayo a banglo ni Cristo, cadagiti maisalacan ken cadagiti mapucaw.

16Cadagiti dadduma, dacami ti angot ni patay a maipaay iti patay; ket cadagiti sabsabali, dacami ti banglo ti biag a maipaay iti biag: Ket cadagitoy a banbanag siasino ti macaanay?

17Ta saancami a cas cadagiti adu a mangilaclaco iti sao ti Dios; no di ket agsaocami iti biang ni Cristo a cas buyugen ti kinapudno a cas nagtaud iti Dios, ken cas iti imatang ti Dios.

← Chapter 1 Jump to: Chapter 3 →