James 1

Ilokano (Ti Biblia (1973))

Jump to: Chapter 2 →

1Ni Santiago, nga adipen ti Dios ken ni Apo Jesu-Cristo, cumablaaw cadagiti sangapulo ket dua a tribu a naiwarawara.

2Ibilangyo, cacabsatco, a rag-o amin, no aglacamcayo cadagiti nadumaduma a pacasuutan:

3Idinto nga ammoyo a ti pannacasuut ti pammatiyo pataudenna ti anus.

4Ket patauden coma ti kinaanus ti aramid a naananay, tapno maananaycayo iti isu-amin, nga awan ket ti aniaman a pagkuranganyo.

5Ngem no siasinoman cadacayo agcurang iti kinasirib, agdawat coma iti Dios, isu a mangted a sicacaasi cadagiti isu-amin, ket saan a mangpabain ket maitedto kencuana.

6Ngem agdawat coma a babaen ti pammati nga awan ket ti panagduadua ta ti managduadua umasping iti maysa a dalluyon ti baybay, nga iduron ti angin, ket agpallayug.

7Saan coma ngarud a panunuten daydiay a tao, nga addanto aniaman nga awatenna iti Apo:

8Ti tao a nagcaddua ti nakemna, saan nga agtalinaed cadagiti amin a daldalanna.

9Ngem ti cabsat a nababa ti casasaadna, agrag-o coma iti pannacaitan-ocna:

10Ngem ti nabacnang, iti pannacaipababana: agsipud ta isu lumabasto a cas iti sabong ti root.

11Ta lumgac ti init agraman angin a nabara ket magango ti root, ket agtinnag ti sabongna, ket ti napintas a buyana manasanas: casta met ti nabacnang makeltayto cadagiti isu-amin a turturongenna.

12Nagasat ti tao a macaitured iti pannacasulisog; ta inton masuuten, awatennanto ti balangat ti biag, nga incari ti Apo cadagiti agayat kencuana.

13Saan coma a sao-en ti siasinoman a tao no masulisog: Masulisogac iti biang ti Dios; ta ti Dios saan a mabalin a sulisugen cadagiti banbanag a dakes, ket isu awan met ti sulisogenna:

14No di ket tunggal maysa masulisog, no gargarien ken sulbogen ti derrepna met laeng.

15Iti casta ti derrep, idinto a nagsicog, yanacna ti basol; ket ti basol inton macagteng iti pannacapunnona, yanacna ti ipapatay.

16Saancay a paallilaw, ay-ayatec a cacabsatco.

17Isu-amin a sagut a nasayaat ken isu-amin a sagut a naananay aggapuda iti ngato, bumaba nga aggapu iti Ama dagiti lawag, a kencuana awan ti aniaman a panagbalbaliw, wenno aniniwan ti panagbaliw ti turongen.

18Iti nacnakemna met laeng isu pinataudnatayo gapu iti sao ti kinapudno, tapno datay coma ti maysa a kita dagiti umuna a bungbunga cadagiti parsuana.

19Ammoyo daytoy, ay-ayatec a cacabsatco: ngem tunggal tao nasiglat coma a dumngeg, nabannayat iti panagsao, narigat nga agunget:

20Ta ti pungtot ti tao saanna a tungpalen ti kinalinteg ti Dios.

21Gapuna, pagpanawanyo ti amin a kinarugit, ken aglablabes a kinadakes, awatenyo a sieemma ti sao a naimula, isu a mannacabalin a mangisalacan cadagiti carcararua.

22Ngem managtungpalcay coma iti sao ket saan laeng a managdengngeg, nga allilawenyo dagiti bagbagiyo met laeng.

23Ta no adda managdengngeg iti sao ket dina aramiden, umasping iti maysa a tao kitkitaenna ti nacayanacanna a rupa iti maysa a sarming;

24Ta kitaenna ti rupana, ket pumanaw, ket malipatanna daras no ania ti kitana a tao idi.

25Ngem ti mangsukimat iti linteg a naananay nga isu ti linteg ti wayawaya, ket pagtalinaedanna ket saan a managdengngeg a macalipat, no di ket managaramid iti aramid, daytoy a tao nagasatto cadagiti ar-aramidna.

26No ti asinoman a tao panunutenna nga isu managdaydayaw iti Dios, ket dina ngedngedan ti dilana, no di ket allilawenna ti pusona met laeng, ti panagdaydayaw daytoy a tao isu ti barengbareng.

27Ti panagdaydayaw a nadalus ken awan tulawna iti imatang ti Diostayo ken Ama, isu daytoy: Sarungcaran dagiti awan ti ammada ken dagiti balo a babbai iti ladingitda, ken agannad nga awan tulaw ti lubong.

Jump to: Chapter 2 →