James 2

Ilokano (Ti Biblia (1973))

← Chapter 1 Jump to: Chapter 3 →

1Cacabsatco, salimetmetanyo coma ti pammati ken Apotayo a Jesu-Cristo Apo ti gloria, nga awan pangidumdumayo cadagiti tattao.

2Ta no sumrecto ti gimungyo ti maysa a tao a nagsingsing iti balitoc ket nagpagan-anay iti napateg, ket sumrec met ti maysa a napanglaw a nagpagan-anay ti nanomo:

3Ket idumdumayo ti nagpagan-anay ti napateg, ket cunaenyo: agtugawca ditoy maysa a disso a nasayaat: ket iti napanglaw cunayo kencuana: Aggianca idiay nga agtacder; wenno: Agtugawca iti babaen ti nagbatayan dagiti sacsacac;

4Saancayo a mangidumduma cadacay met laeng, ket nagbalincayo a mangocom babaen cadagiti panpanunot a dakes?

5Dumngegcayo, ay-ayatec a cacabsatco; saan aya a pinili ti Dios dagiti napanglaw no maipapan itoy lubong, a maipaay iti kinabacnang iti pammati, ken agtawid iti pagarian nga incarina cadagiti agayat kencuana?

6Ngem dacayo iniccatyo ti dayaw ti napanglaw. Saan aya a dagiti nabacnang, ti mangparigat cadacayo, ket isuda met laeng uludendacayo nga isaclang cadagiti pangocoman?

7Dida aya tabbaawan daydiay nadayaw a nagan a pacanagananyo?

8Ngem, no tungpalenyo ti linteg a naarian cas mayannurot iti Surat: Ayatem ti padam a tao a cas met iti bagim, naimbag ti aramidyo.

9Ngem no pagdudumaenyo dagiti tattao, macabasolcayo ket pabasolennacayo ti linteg a cas la nacasalungasing.

10Ta ti siasinoman a mangtungpalto iti amin a linteg, ket macasalungasingto uray maymaysa agbanagto a pacabasolanna amin.

11Ta ti nagsao: Dica makicamalala, kinunana met: Dica mamapatay. Ita ngarud, no dica makicamalala, ngem mamapatayca rumsuaca a nangsalungasing iti linteg.

12Iti casta agsaocayo ket agaramidcayo a cas la maocomcayonto gapu iti linteg ti wayawaya.

13Ta ti panangocom awan asina a maipaay iti daydiay saan a nangaramat ti asi: ti asi agrag-o a maisupiat iti panangocom.

14Ania ti magungguna, cacabsatco, no ti maysa a tao cunana nga adda pammatina, ngem awan ar-aramidna? Mabalin aya dayta a pammati ti mangisalacan kencuana?

15No ti maysa a cabsat a lalaki wenno babai adda a lamolamo, wenno awan taraonna nga inaldaw,

16Ket ti maysa cadacayo cunaennanto: Incayo a sitatalna; aginudo ken agbussogcayo ngem dicayto ited cadacuada dagiti masapul a maipaay iti bagi, ania ti magunggunada?

17Casta met ti pammati, no awan dagiti ar-aramidna, isu ti pammati a natay.

18Ngem cunaento ti sabali: Sica adda pammatim, ket siac adda ar-aramidco: ipakitam caniac ti pammatim nga awan dagiti ar-aramidmo, ket siac gapu cadagiti ar-aramidco ipakitacto kenca ti pammatic.

19Sica patiem a ti Dios maymaysa? Naimbag ti aramidem: dagiti sairo patienda met ket agpigergerda.

20Ngem cayatmo nga ammoen, tao a maag a ti pammati a di mapacuyugan cadagiti ar-aramid isu ti eppes?

21Saan aya a naibilang a nalinteg ni amatayo nga Abraham gapu cadagiti ar-aramid, idi indatonna ti anacna iti rabaw ti altar?

22Makitamon a ti pammati mapacuyugan cadagiti ar-aramid, ket gapu cadagiti ar-aramid, ti pammati maaramid a naananay;

23Ket natungpal ti Surat, a cunana: Ni Abraham pinatina ti Dios, ket naibilang kencuana a kinalinteg; ket napanaganan gayyem ti Dios.

24Makitayo ngarud a gapu cadagiti ar-aramid, ti tao maibilang a nalinteg, ket saan a gapu iti pammati laeng.

25Ket casta met, ni Rahab a balangcantis, saan aya a naibilang a nalinteg gapu cadagiti ar-aramid, idi inawatna dagidi naibaon, ket inturongna ida iti sabali a dalan?

26Ta cas iti bagi, a no maisina iti cararua, natay, casta met ti pammati nga awanan ar-aramid, natay.

← Chapter 1 Jump to: Chapter 3 →