James 5

Ilokano (Ti Biblia (1973))

← Chapter 4 Jump to:

1Ala ita, dacayo a babacnang, agsangitcayo ket aganug-ogcayo gapu cadagiti rigrigat nga umaydanto cadacayo.

2Dagiti kinabacnangyo addada a nadadael, dagiti pagan-anayyo addada a sinanga.

3Ti balitocyo ken ti piracyo addada a naglati, ket dagiti latida isudanto ti sacsi a maibusor cadacayo, ket runutendanto dagiti lasagyo a cas apuy. Nangurnongcayo iti gamengyo cadagiti camaudianan nga aldaw.

4Adtoy ti tangdan dagiti mangmangged a nagan-ani cadagiti taltalonyo, isu nga ingawidyo a babaen ti allilaw; umawag, ket dagiti as-asug dagiti nagan-ani simrecda cadagiti pagdengngeg ti Apo dagiti buybuyot.

5Nagbiagcayo a sinanam-ay ditoy rabaw ti daga; ket naalayon ti ragsacyo, pinalucmegyo dagiti puspusoyo, a cas ti maysa nga aldaw ti panagparti.

6Pinabasolyo ken pinapatayyo ti nalinteg, ket isu saan a simmukir cadacayo.

7Aganuscayo coma ngarud, cacabsat, nga agingga iti iyaay ti Apo. Adtoy, ti agtaltalon urayenna ti napateg a bunga ti daga idinto nga ur-urayenna a siaanus, agingga iti panangawatna iti tudo a nasapa ken ti naladaw.

8Aganuscay met coma; patibkerenyo dagiti puspusoyo, ta ti iyaay ti Apo asidegen.

9Saancay nga agtantanabutub, cacabsat, ti macadadael cadagiti maysa ken maysa, tapno dicay mapabasol: adtoy, ti ocom agtatacder iti sangoanan dagiti ruruangan.

10Alaenyo, cacabsat, a pagulidanan ti panagsagaba iti dakes ken iti kinaanus, dagiti mammadto a nagsaoda babaen ti nagan ti Apo.

11Adtoy, naganentayo a nagasat dagiti nagitured. Nangngegyo ti kinaanus ni Job, ket nakitayo ti panungpalan nga impaay ti Apo; ta ti Apo napno iti ayat ken manangngaasi.

12Ket nangnangrona ngem iti isu-amin, cacabsatco, saancayo nga agsapata uray gapu iti langit, uray gapu iti daga, wenno aniaman a sabali a sapata; no di ket ti panagwenyo isu coma ti wen; ket ti panagsaanyo isu coma ti saan; tapno dicay matnag iti pannacaocom.

13Adda siasinoman nga agsagsagaba cadacayo? Isu ti agcararag coma, Adda agragragsac? Agcanta coma cadagiti pagdaydayaw.

14Adda masakit cadacayo? paayabanna coma dagiti panglacayen ti Iglesia ket icararaganda coma, a sapsapoanda ti lana iti nagan ti Apo:

15Ket ti cararag ti pammati isalacannanto ti masakit, ket ti Apo paungarennanto; ket no nacaaramid cadagiti basbasol, mapacawanto kencuana.

16Ipudnoyo ngarud dagiti basbasolyo iti maysa ken maysa, ket icararagyo maysa ken maysa, tapno mapasalun-atcayo. Adu ti mabalin ti nasged a cararag ti nalinteg.

17Ni Elias maysa a tao idi a ti kinataona cas cadatayo, ket nagcararag iti nasged unay a di coma tumudo, ket saan a nagtudo iti rabaw ti daga iti bayat dagiti tal-lo a taw-en ken innem a bulan.

18Ket nagcararag manen; ket ti langit nangted iti tudo, ket ti daga pinataudna ti bungana.

19Cacabsatco, no adda cadacayo maisiasinto iti kinapudno, ket isu pagbabawiento ti maysa.

20Ammoenna coma, a ti mamagbabawi iti maysa a managbasol iti pannacaal-lilaw ti dalanna, isalacannanto iti ipapatay ti maysa a cararua, ket abbongannanto dagiti adu unay a basbasol.

← Chapter 4 Jump to: