James 4

Ilokano (Ti Biblia (1973))

← Chapter 3 Jump to: Chapter 5 →

1Sadino ti paggapuan dagiti gubgubat ken sadino dagiti ringringgor cadacayo? Saanda aya nga aggapu cadagiti aglablabes a tarigagayyo isuda a makibacal cadagiti camcamengyo?

2Agagumcayo ket awan ti cupicupanyo; mamapataycayo ken adda apalyo, ket dicay mabalin ti gumunod; makicabilcayo ken makigubatcayo. Awanancayo, ta dicay agdawat.

3Agdawatcayo ket dicay umawat, ta saan a nasayaat ti panggepyo nga agdawat, ta raritenyo cadagiti ragragsacyo.

4Makicamcamalala a babbai, dicay ammo aya, a ti pannakipagayam iti lubong isu ti pannakibusor iti Dios? Daydiay ngarud agtarigagayto a gayyem ti lubong, agbalin a cabusor ti Dios.

5Pagarupenyo aya nga awan capapay-an ti panagcuna ti Surat; Ti Espiritu nga agtaeng cadatayo, agagum a siapal?

6Ngem isu mangted iti dacdackel a parabur. Gapuna cuna ti Surat: Ti Dios bumusor cadagiti natangsit, Ngem mangted ti parabur cadagiti napacumbaba.

7Paiturayancay ngarud iti Dios; ngem makibacalcayo iti diablo, ket isu agtalawto cadacayo.

8Umadanicayo iti Dios, ket isu umasidegto cadacayo. Dalusanyo dagiti im-imayo, dacayo a managbasol, ket guguranyo dagiti puspusoyo, dacay a nagcaddua ti nakemyo.

9Agladingitcayo ket agsaibbeccayo, ket agsangitcayo: ti catawayo agbalin coma a sangit ket ti ragsacyo agbalin coma a liday.

10Agpacumbabacayo iti imatang ti Apo, ket isu itan-ocnacayto.

11Dicay agsao iti maibusor iti maysa ken maysa, cacabsat. Ti agsao iti maibusor iti maysa a cabsat, wenno ocomenna ni cabsatna, agsao iti maisalungasing iti linteg, ket ipatona ti linteg. Ngem no ipatom ti linteg, saan a sica ti managtungpal iti linteg, no di ket ocom.

12Maymaysa laeng ti manangited ti linteg ken ti ocom, nga isu daydiay macabalin a mangisalacan ken mangpucaw: ngem asinoca nga okomem ti padam a tao?

13Kitaenyo ita, dacayo nga agsasao: Ita nga aldaw wenno inton bigat incamto iti maysa a ciudad ket agnaedcanto idiay iti macataw-en, ket agtagilacocamto ket macagungunacamto:

14Idinto a dicay ammo ti maaramidto no bigat. Ta ania ti biagyo? pudno a cas la maysa nga alibungubong, nga iti apagbiit agparang ket agpucaw.

15Rebbengyo coma a sao-en: No cayat ti Apo agbiagcaminto, ket aramidenminto daytoy wenno daydiay.

16Ngem ita, agpasindayagcayo babaen ti kinatangsityo: isu-amin a castoy a panagpasindayag isu ti dakes.

17Ti macaammo ngarud nga agaramid iti nasayaat, ket dina aramiden, basol kencuana.

← Chapter 3 Jump to: Chapter 5 →