James 3

Ilokano (Ti Biblia (1973))

← Chapter 2 Jump to: Chapter 4 →

1Saan nga aducayo coma a mannursuro, cacabsatco; idinto nga ammoyo nga awatentayto ti naing-inget a pannacaocom.

2Ta maitibcultayo amin cadagiti adu a banbanag. No adda saan a macabasol iti sao, maysa a tao, a naimbag unay, a macabalin a mangngednged iti isu-amin a bagi.

3Ta no icabiltayo dagiti freno dagiti caballo, cadagiti ngiwatda, tapno agtulocda cadatayo, mapagtuloctayo met ti amin a bagida.

4Kitaenyo met dagiti sasacayan uray nagdadackelda ken iduron ida dagiti angin a napigsa, mapusipusda pay gapu iti maysa a bassit unay a timon, iti uray sadino a cayatto a pangiturongan ti mangidalan.

5Casta met ti dila maysa a camcameng a bassit, ket pagpasindayagna dagiti dadackel a banbanag. Kitaenyo ti nagdackel a cacaycayoan silmutan ti bassit nga apuy!

6Ket ti dila isu ti maysa nga apuy, ti maysa a lubong ti kinadakes, a maicabil iti nagtengngaan dagiti camcamengtayo; isu a mangtulaw iti isu-amin a bagi, ket pasgedanna ti pilid ti sangcaparsuaan ket mapasgedan ti infierno.

7Ta isu-amin a kita dagiti animal ken tumatayab, dagiti agcarcarayam ken dagiti adda iti baybay, paammoen ida ken pinaamo ti tao:

8Ngem ti dila saan a mabalin a paammoen ti uray siasino a tao: maysa a dakes a di aginana, napno iti gamut a macapatay.

9Isu ti pangdayawtayo iti Apo ken Ama, ket isu ti pangilunodtayo cadagiti tattao isuda a naaramid a caasping ti Dios:

10Iti maymaysa a ngiwat rummuar ti panangidayaw ken panangilunod. Cacabsat, dagitoy a banbanag saanda a maipaay a casta ti pannacaaramidda.

11Ipussoac aya ti maysa nga ubbog iti maymaysa nga abut, ti danum a nasam-it ken napait?

12Mabalin aya, cacabsatco, ti higos a patauden ti olivas, wenno ti uvas, higos? Di met mabalin ti apgad a patauden ti danum a nasam-it.

13Siasino ti masirib ken mannacaammo cadacayo? Ipakitana coma gapu iti naimbag a panagbiagna, dagiti aramidna iti kinaemma ti sirib,

14Ngem no adda cadagiti puspusoyo dagiti napait nga agum ken ti pannakilasin, dicay agpasindayag ken dicay agulbod a maisalungasing iti pudno.

15Saan nga isu daytoy ti sirib nga aggapu sadi ngato; no di ket ti sirib a nailubungan, dinederrep, sinasairo.

16Ta no sadino ti yan dagiti agum ken panagriringgor adda idiay ti riribuc ken amin nga aramid a kinadangcuc.

17Ngem ti sirib nga aggapu sadi ngato, umuna nadalus, sumaganad natalna, nalaing, nalaca a pagdawatan napno iti asi ken cadagiti nasayaat a bungbunga, awan ti idumdumana, awan ti panaginsisingpetna.

18Ket ti bunga ti kinalinteg maimula iti talna a maipaay cadagiti agar-aramid ti talna.

← Chapter 2 Jump to: Chapter 4 →