Leviticus 1

Ilokano (Ti Biblia (1973))

Jump to: Chapter 2 →

1Ket ni Jehova inayabanna ni Moises ket nakisao kencuana nanipud iti tolda ti gimong, a kinunana,

2Ibagam cadagiti annac ti Israel, ket cunaem cadacuada, No adda maysa cadacayo a mangipaay iti daton ken Jehova, aramatenyonto a pagdaton dagiti an-animal, a dagiti met laeng vacvaca ken carcarnero.

3No vaca ti mapuuran a pagdatonna, idatonnanto ti lalaki nga awan pacapilawanna: ti pangidatonannanto iti ruangan ti tolda ti gimong, tapno maawat iti saclang ni Jehova.

4Ket ipataynanto ti imana iti rabaw ti olo ti idatonna a mapuuran; ket maipategto kencuana a maibilang a pacaabbonganna.

5Ket mangpatayto iti vaca a lalaki iti sango ni Jehova: ket dagiti annac a lallaki ni Aaron, dagiti papadi, idatagdanto ti dara, ket iwarisdanto ti dara iti lawlaw ti rabaw ti altar nga adda iti ruangan ti tolda ti gimong.

6Ket lalatennanto ti daton a mapuuran, ket rangrangcayennanto.

7Ket dagiti annac ni Aaron a padi mangicabildanto ti apuy iti rabaw ti altar, yet urnosenda ti sungrod a maiparabaw iti apuy;

8Ket dagiti annac ni Aaron, dagiti papadi, icabildanto a pagoornosen dagiti rinangcay, ti olo, ken ti taba, iti rabaw ti cayo a ngatoen ti apuy iti rabaw ti altar:

9Ngem dagiti lalaemna ken sacsacana buggoannanto iti danum: ket ti padi puurannanto ida amin nga daton a mapuuran, iti rabaw ti altar, maysa a daton a naaramid iti apuy, a nabanglo a sayamusom ken Jehova.

10Ket no ti idatonna aggapu iti pangen, cadagiti carcarnero, wenno cadagiti calcalding, a daton a mapuuran; iti lalaki nga awan pilawna ti idatonnanto.

11Ket patayennanto iti sibay ti altar iti amianan iti saclang ni Jehova; ket dagiti annac ni Aaron, dagiti papadi, iwarisdanto ti darana iti rabaw ti altar nga aglawlaw.

12Ket isu rangcayennanto agraman olona ken tabana; ket ti padi icabilnanto ida ti naurnos iti rabaw ti cayo nga adda iti ngatoen ti apuy iti altar:

13Ngem dagiti lalaem ken dagiti sacsaca buggoannanto iti danum; ket ti padi idatonnanto amin, ket puurannanto iti altar: isu ti maysa a daton a mapuuran, maysa a daton a naaramid iti apuy, a nabanglo a sayamusom ken Jehova.

14Ket no ti idatagna ken Jehova maysa a daton a mapuuran cadagiti tumatayab, idatagnanto nga idaton ngarud dagiti pagpagaw wenno urbon dagiti calapati.

15Ket ti padi ipannanto iti altar, ket pulsutennanto ti olona, ket puurannanto iti rabaw ti altar; ket ti darana ipatedtednanto iti sibay ti altar;

16Ket iccatennato ti kinaracaranna agraman rugitna ket ibellengna iti sikigan ti altar iti daya a pagdissoan dagiti dapo:

17Ket iggamannanto dagiti payacna tapno pisangenna, ngem dinanto gerreten; ket ti padi puurannanto iti rabaw dagiti sungrod ti apuy: isu ti maysa a daton a mapuuran, maysa a daton a naaramid iti apuy, a nabanglo a sayamusom ken Jehova.

Jump to: Chapter 2 →