Leviticus 23

Ilokano (Ti Biblia (1973))

← Chapter 22 Jump to: Chapter 24 →

1Ket ni Jehova nakisao ken Moises, a kinunana,

2Ibagam cadagiti annac ti Israel, ket saoem cadacuada, Dagiti natudingan a fifiesta ni Jehova, nga iwarragawagyonto tapno isuda dagiti nasantoan a pacagimongan, dagitoy met laeng ti matudingan a fifiestac,

3Cadagiti innem nga al-aldaw agtrabajocayo: ngem ti maicapito nga aldaw isu ti maysa nga inana ti nadaeg a panaginana, ti maysa a nasantoan a pacagimongan; dicayto agtrabajo iti uray ania: isu ti maysa nga aldaw a panaginana ken Jehova iti isu-amin a pagnaedanyo.

4Dagitoy dagiti matudingan a fifiesta ni Jehova, a nasantoan a pacagimgimongan, nga iwarragawagyonto iti nadutocan a tiempona.

5Iti umuna a bulan iti maicasangapulo ket uppat nga aldaw ti bulan iti rabii, isu ti pascua ni Jehova.

6Ket ti maicasangapulo ket lima nga aldaw ti daydiay met la a bulan isu ti fiesta ti tinapay nga awan levadurana ken Jehova: cadagiti pito nga aldaw mangancayto iti saan a nalevaduraan a tinapay.

7Iti umuna nga aldaw isu ti panangaramidyonto iti nasantoan a panagiggimong: dicayto agaramid iti trabajo a panggedan.

8Ngem mangipaaycayto ken Jehova iti daton a maaramid iti apuy cadagiti pito nga aldaw: iti maicapito nga aldaw: iti maicapito nga aldaw isu ti nasantoan a panaggigimong; dicayto agaramid iti trabajo a panggedan.

9Ket ni Jehova nakisao ken Moises, a kinunana.

10Ibagam cadagiti annac ti Israel, ket saoem cadacuada, No sumreccayo iti daga nga itedco cadacayo, ket anienyonto ti maapit idiay, mangipancayto ti sangareppet nga umuna a bunga ti maapityo iti padi;

11Ket isu ililinanto ti rineppet iti saclang ni Jehova, tapno maawatto a maipaay cadacayo: iti bigat a sumaruno iti aldaw a panaginana, ti padi ililinanto.

12Ket iti aldaw a panangililiyo iti rineppet, mangipaaycayto ti maysa a cordero a lalaki nga awan pilawna, a maysa ti tawenna a maipaay a maysa a daton a mapuuran ken Jehova.

13Ket ti daton a macan duanto nga apagcapulo ti maysa nga efa a bel-laay a namayecmec nga nagamay iti lana, maysa a daton a maaramid iti apuy a nabanglo a sayamuson ken Jehova; ket ti mainum a daton aracto nga apagcapat ti maysa nga hin.

14Ket dicayto cancanen ti tinapay, wenno iniruban a bunga ti trigo, wenno nalangto a dawana, agingga iti castoy met laeng nga aldaw, inggana iti panangidatagyo ti pagdayaw iti Diosyo: daytoy ti maalagad nga agnanayon cadagiti putputotyo cadagiti amin a pagnaedanyo.

15Ket bumilangcayto manipud iti bigat a sumaruno iti aldaw a panaginana, manipud ti aldaw a panangidatagyo iti sangcareppet a daton mailili; apagisunto a pito nga aldaw a panaginana:

16Agingga met laeng iti bigat a sumaruno iti maicapito nga aldaw ti panaginana, bumilangcayto iti limapulo nga al-aldaw; sacayo mangidatagto ti daton a baro a macan ken Jehova.

17Cadagiti balbalayyo mangalacayto cadagiti dua a tinapay nga ilili a casia ti dua nga apagcapulo ti maysa nga efa: dagitay namayecmec a bel-laay malutodanto a silelevadura iti horno, umuna a bungbunga a maipaay ken Jehova.

18Ket idatagyonto a mairaman iti tinapay, ti pito a carnero a sag-gaysa ti tawenda nga awan ti pilawda, ken maysa a bumaro a vaca ken dua a carcarnero a lalaki: dagitoy ti daton a mapuuran ken Jehova mainayon pay dagiti datdatonda a macan, ken datdatonda nga mainum, a maysa a daton a maaramid iti apuy, a nabanglo a sayamusom ken Jehova.

19Ket mangirucbabcayto iti maysa a calding a lalaki a maipaay a daton gapu iti basol, ken dua a cordero a lallaki a saggaysa ti tawenda, a sacrificio dagiti datdaton iti cappia.

20Ket ti padi ililinanto ida agraman ti tinapay cadagiti umuna a bungbunga, a daton a maitayag iti saclang ni Jehova, agraman dagiti dua a cordero: dagitoy nasantoandanto ken Jehova iti padi.

21Ket aramidenyonto ti pacdaar iti dayta met laeng nga aldaw; addanto nasantoan a gimong cadacayo; dicayto agaramid ti trabajo a panggedan: isu daytoy ti alagaden nga agnanayon iti amin a balbalayyo cadagiti putputotyo iti casacbayan.

22Ket no anienyonto ti apit ti dagayo, dicanto talipupusen nga anien dagiti nagsulianan ti talonmo, wenno adasen dagiti nalabasan iti panagapitmo: baybayamto ida a lac-amen ti napanglaw, ken agpagpagna: siac ni Jehova a Diosyo.

23Ket ni Jehova nakisao ken Moises, a kinunana,

24Ibagam cadagiti annac ti Israel, a cunam, ti maicapito a bulan, iti umuna nga aldaw ti bulan isu ti nadaeg nga inana cadacayo, maysa a panglagip a buyugen ti aweng dagiti tangtangguyob, maysa a nasantoan a gimong.

25Dicayto agaramid iti trabajo a panggedan; ket ipaayyonto ti maysa a daton a maaramid iti apuy ken Jehova.

26Ket ni Jehova nakisao ken Moises, a kinunana,

27Nupay casta, iti maicasangapulo nga aldaw ti naisao a maicapito a bulan isu ti aldaw ti pannacaabbong: isunto ti maysa a nasantoan a gimong cadacayo, ket agladingitto dagiti cararuayo; ket mangidatagcayto iti maysa a daton a maaramid iti apuy ken Jehova.

28Ket dicayto agaramid iti uray ania a trabajo iti dayta met laeng nga aldaw; ta isu ti aldaw ti pannacaabbong, tapno maaramid ti pannacaabbongyo iti saclang ni Jehova a Diosyo.

29Ti siasinoman a tao a dinto la agladingit iti cararuana iti daydiay nga aldaw, maipusayto iti ilina,

30Ket ti siasinoman a cararua nga agaramid iti uray ania a trabajo iti dayta met la nga aldaw, dayta a tao dadaelecto iti ilina.

31Dicayto agaramid iti uray ania nga aramid: isu ti maysa nga alagaden nga agnanayon cadagiti putputotyo iti amin a pagnaedanyo.

32Isunto cadacayo ti maysa nga aldaw a panaginana ti nadaeg nga inana, ket agladingitto ti cararuayo: iti maicasiam nga aldaw ti bulan iti sumipnget, manipud iti sumipnget agingga iti sumaruno a sumipnget ngilinenyonto ti aldaw a panaginanayo.

33Ket ni Jehova nakisao ken Moises, a kinunana,

34Ibagam cadagiti annac ti Israel, ket cunam, Ti maicasangapulo ket lima nga aldaw ti naisao a maicapito a bulan isu ti fiesta dagiti tabernaculo iti bayat dagiti pito nga aldaw a maipaay ken Jehova.

35Iti umuna nga aldaw isunto ti nasantoan a gimong; dicayto agaramid a pulos iti trabajo.

36Cadagiti pito nga aldaw, mangidatagcayto iti maysa a daton a maaramid iti apuy ken Jehova: iti maicawalo nga aldaw isunto ti nasantoan a gimong cadacayo; ket mangidatagcayto iti maysa a daton a maaramid iti apuy ken Jehova: isu dayta ti nadaeg a gimong: dicay agaramidto iti pacabannogan.

37Dagitoy dagiti natudingan a fifiesta ni Jehova, isuda nga ibunannagyo a nasantoan a gimgimong a panangidatagyo iti daton a maaramid iti apuy ken Jehova, daton a mapuuran, ken daton a macan, maysa a sacrificio, ken datdaton nga mainum, tunggal maysa iti aldawna;

38Sabali pay dagiti aldaw ni Jehova a panaginana, ken sabali pay dagiti sagsagutyo, ken sabali pay amin a carcariyo, ken sabali pay amin a datdatonyo ti sibubulos a nakem nga ipaayyo ken Jehova.

39Nupay casta iti maicasangapulo ket lima nga aldaw ti maicapito a bulan, no maurnongyon dagiti bungbunga ti daga, ngilinenyonto ti fiesta ni Jehova bayat ti pito nga al-aldaw: iti umuna nga aldaw isunto ti nadaeg a panaginana, ket iti maicawalo nga aldaw isunto ti nadaeg a panaginana.

40Ket iti umuna nga aldaw, mangalacayto iti maipaay cadagiti bagbagiyo iti bunga dagiti nasayaat a caycayo, sangsanga dagiti palmas, sangsanga dagiti caycayo a narucbos, ken runruno iti ayus; ket agragsaccayto iti sango ni Jehova a Diosyo bayat iti pito nga al-aldaw.

41Ket ngilinenyonto a fiesta ken Jehova dagiti pito nga aldaw ti macatawen: isu daytoy ti alagaden iti agnanayon cadagiti putputotyo; iti maicapito a bulan ngilinenyonto.

42Agyancayto cadagiti toltolda iti bayat dagiti pito nga aldaw: dagup amin dagiti putot ti Israel agyandanto cadagiti toltolda;

43Tapno dagiti putputotyo ammoenda a pinagnaedco dagiti annac ti Israel cadagiti toltolda, idi nga inaonco ida iti daga nga Egipto; siac ni Jehova a Diosyo.

44Ket ni Moises inlawlawagna cadagiti annac ti Israel dagiti natudingan a fifiesta ni Jehova.

← Chapter 22 Jump to: Chapter 24 →