Leviticus 5

Ilokano (Ti Biblia (1973))

← Chapter 4 Jump to: Chapter 6 →

1Ket no maysa a tao macabasol, iti panangdengngegna iti timec ti panamagsapata, isu a sacsi, uray no nakitana wenno naammoanna, no dina ibaga, isunto ngarud ti mangawit iti kinadakes.

2Wenno uray siasinoman a mangsagid iti saan a nadalus, uray bangcay ti natay nga animal a narugit wenno bangcay ti animal a naamo a narugit, wenno bangcay dagiti aguy-uyas a saan a nadalus, ket ilimedna, ket agtaeng a saan a nadalus, macabasolto ngarud.

3Wenno no sagidenna ti rugit ti tao, iti uray ania a nacarugitanna, ket ilimedna; intono maammoan, macabiddutto laeng.

4Wenno no ti uray siasino mangipabpabareng nga agsapata cadagiti bibigna nga agaramid iti dakes, wenno agaramid iti naimbag, uray aniaman a balicsennanto a situtured babaen ti sapata, ket ilimedna; intono maammoan, macabiddutto ngarud iti maysa cadagitoy nga aramid.

5Ket maaramidto, a no isu macabasolto iti maysa cadagitoy nga aramid, ipudnonanto ti basol nga inaramidna:

6Ket yegnanto a datonna gapu iti salungasing ken Jehova nga agservi iti basol a nacabasolanna, ti maysa a cabayan iti pangen, maysa a cordero wenno maysa a calding, a daton gapu iti basol; ket ti padi aramidennanto a paccaabbonganna a maipanggep iti basolna.

7Ket no di macaanay ti cucuana a pangpaadda iti maysa a cordero, yegnanto ngarud a datonna gapu iti salungasing nga agservi iti nacabasolanna, ti dua a pagaw wenno dua a calapati nga urbon, ken Jehova; ti maysa maipaay ti daton gapu iti basol, ket ti sabali maipaay ti daton a mapuuran.

8Ket ipannanto ida iti padi, isu a mangipaayto nga umuna iti dayta a daton gapu iti basol, ket pulsotennanto ti olona iti tengngedna, ngem dinanto gudduaen:

9Ket iwarisnanto ti dadduma iti dara ti daton gapu iti basol iti sikigan ti altar; ket ti natda iti dara maipatedtedto iti puon ti altar: isu ti maysa a daton gapu iti basol.

10Ket idatagnanto ti maicadua a daton a mapuuran, cas iti alagaden; ket ti padi aramidennanto a pacaabbonganna a mayannurot iti biddut a nacabasolanna, ket mapacawanto.

11Ngem no awan kencuana ti macaanay a pamaaddana iti dua a pagaw wenno dua a calapati, yegnanto ngarud a datonna gapu iti pannacabasolna, ti apagcapulo ti maysa nga efa ti namayecmec nga harina a pagdaton gapu iti basol: dinanto ic-iccan iti lana, casta met a dinanto ic-iccan iti incienso; ta isu ti maysa a daton gapu iti basol.

12Ket ipannanto iti padi, ket ti padi rumakemto iti harina a pacalaglagipanna, ket puurannanto iti altar, a ngatoen dagiti datdaton a maaramid iti apuy ken Jehova: isu ti maysa a daton gapu iti basol.

13Ket ti padi aramidennanto a pacaabbonganna mayannatup iti babacna a nacabasolanna iti uray ania cadagitoy, ket mapacawanto: ket ti natda cucuanto ti sacerdote, a cas ti daton a canen.

14Ket ni Jehova nakisao ken Moises, a kinunana,

15No uray siasinoman mailaw-an a macasalungasing, ket macabasol a dina gagaraen cadagiti nasantoan a ramitramit ni Jehova; yegnanto ngarud ti idatonna gapu iti salungasing ken Jehova, ti maysa a lalaki a carnero nga awan pilawna, a mayannatup iti pamatgam iti pirac a siclo, a cas ti siclo ti santuario, nga agservi a daton gapu iti salungasing:

16Ket isublinanto iti nagaramidanna ti biddut iti nasantoan a ramramit, ket nayonannanto daydiay iti apagcalima nga apag, ket itednanto iti padi; ket ti padi aramidennanto a pacaabbonganna nga aramatenna ti carnero a lalaki a daton gapu iti salungasing, ket mapacawanto.

17Ket no ti maysa a tao macabasol, ket aramidenna ti maysa cadagiti saan nga aramiden nga imbilin ni Jehova; uray dina ammo, macabasol laeng, ket awitennanto ti kinadakesna.

18Ket ipannanto iti padi ti maysa a lalaki a carnero nga awan pilawna, a mayannatup iti pamatgam, nga agservi a daton gapu iti salungasing; ket ti padi aramidennanto a pacaabbonganna a maipaay iti aramid a nacabiddutanna a dina ginagara ken dina ammo, ket mapacawanto.

19Isu ti maysa a daton gapu iti salungasing: ti tao kinapudnona a nacabiddut iti saclang ni Jehova.

← Chapter 4 Jump to: Chapter 6 →