Leviticus 21

Ilokano (Ti Biblia (1973))

← Chapter 20 Jump to: Chapter 22 →

1Ket ni Jehova kinunana ken Moises, Ibagam cadagiti papadi nga annac a lallaki ni Aaron, ket saoem cadacuada, Awanto ti mangmulit iti bagina met laeng a maipuon iti natay cadagiti cailiana;

2Malacsid ti maipanggep iti cabagianna nga asideg, isu nga inana, ken amana, ken anacna a lalaki, ken anacna a babai, ken cabsatna a lalaki,

3Ken cabsatna a babai a balasang, nga asideg kencuana, a di pay naasawaan; a gapu kencuana maipalubos nga mulitanna ti bagina.

4Isu dinanto mulitan ti bagina a ti bagina met laeng a pagrugitenna, idinto nga isu maysa a natan-oc a lalaki iti ilina, dina tulawan ti bagina.

5Didanto pagcalbuen ti oloda wenno kiskisan ti agsumbangir ti timidda, wenno aramiden ti uray ania a sugat iti lasagda.

6Agsantodanto iti Diosda, ket dida rugitan ti nagan ti Diosda; ta idatagda dagiti datdaton ken Jehova a naaramid iti apuy, ti tinapay ti Diosda: iti casta agsantodanto.

7Isuda didanto makiasawa iti babai a balangcantis, wenno natulawan didanto met alaen ti babai nga insina ti asawana: ta ti padi nasantoan iti Diosna.

8Pasantoemto ngarud, ta idatonna ti tinapay ti Diosmo: isu santonto kenca; ta siac ni Jehova a mamagsanto cadacayo, santoac.

9Ket ti anac a babai ti uray asino a padi no tulawanna ti bagina iti panagbalangcantis, rugitanna ni amana: isu mapuuranto iti apuy.

10Ket ti cangatoan a padi cadagiti cacabsatna a lallaki, nga iti rabaw ti olona nabuyatan iti lana a pangpulot, ken naconsagrar a mangicapet cadagiti cawes, dinanto wacrayen ti boocna, wenno pigisen dagiti cawesna;

11Wenno dinto met sumbrec iti uray adino a yan ti bagi a natay, wenno dinanto mulitan ti bagina a maipuon ken amana, wenno ken inana;

12Dinto met rumuar iti santuario, wenno tulawan ti santuario ti Diosna; gapu ta ti balangat a lana a pangpulot ti Diosna adda kencuana; siac ni Jehova.

13Ket isu mangasawanto iti maysa a balasang.

14Balo a babai, wenno nakisina, wenno maysa a natulawan, maysa a balangcantis, dinto mangasasawa cadagitoy; ngem ti maysa a virgen iti ilina met laeng asawaennanto.

15Ket dinanto rugitan ti putotna iti baet dagiti cailianna: ta siac ni Jehova a mamagsanto kencuana.

16Ket ni Jehova nakisao ken Moises, a kinunana,

17Ibagam ken Aaron, a cunam, Uray asino a lalaki cadagiti putotmo cadagiti amin a putputotda nga adda pilawna, saan a maipalubos nga umasideg tapno mangidaton iti tinapay ti Diosna.

18Ta uray asino a lalaki nga adda pilawna, dinto umasideg: ti lalaki a bulsec, wenno pilay, wenno lugpac ti agongna, wenno nagsuroc iti uray ania,

19Wenno maysa a lalaki a nablo ti sacana, wenno nablo ti imana,

20Wenno cubbo, wenno maysa a pandaca, wenno maysa nga mapilaw iti matana, wenno aggudgud, wenno aglatlat, wenno napis-it dagiti bukelbukel;

21Iti putot a lalaki ni Aaron a padi, ti adda pilawna dinto umadani a mangipaay cadagiti datdaton a maaramid iti apuy ken Jehova; adda pilawna; dinto umadani a mangidaton iti tinapay ti Diosna.

22Manganto iti tinapay ti Diosna, uray tinapay man a nasantoan unay ken ti nasantoan:

23Isuna laeng a dinto sumbrec iti uneg ti abbong, wenno umasideg iti altar, gapu ta adda pacapilawanna; tapno dina rugitan dagiti santuarioc: ta siac ni Jehova a mamagsanto cadacuada.

24Casta ti pinangibaga ni Moises ken Aaron ken cadagiti annacna a lallaki, ken cadagiti amin nga annac ti Israel.

← Chapter 20 Jump to: Chapter 22 →