Leviticus 12

Ilokano (Ti Biblia (1973))

← Chapter 11 Jump to: Chapter 13 →

1Ket ni Jehova nakisao ken Moises, a kinunana,

2Ibagam cadagiti annac ti Israel a cunam, No ti maysa a babai agsicug ket mangyanac iti maysa a lalaki, pitonto nga aldaw a saan a nadalus; cas cadagiti al-aldaw ti kinarugit ti panagsangailina saanto a nadalus.

3Ket iti maicawalo nga aldaw macugitto ti ubing iti lasag ti prepuciona.

4Ket ti babai urayennanto ti tallopulo ket tallo nga al-aldaw a panagdalusna iti dara; dinanto sagiden ti anyaman a nasantoan, dinto met sumrec iti yan ti santuario inggana ti pannacatungpal ti aldaw a panagdalusna.

5Ngem no mangyanac iti babai dua a lawasna a maibilangto a saan a nadalus, cas iti kinarugitna; ket isu urayennanto ti innem a pulo ket innem nga aldaw a panagdalusna iti dara.

6Ket no masungpot dagiti al-aldaw a panagdalusna, maipaay iti anacna a lalaki wenno babai, yegnanto iti padi ti maysa a cordero a tumawenen cas daton a mapuuran, ken maysa nga urbon ti calapati, wenno maysa a pagaw a daton gapu iti basol agingga iti ruangan ti tolda ti gimong:

7Ket ti padi idatonnanto iti sango ni Jehova, ket aramidennanto ti pannacaabbongna; ket ni naganac madalusanton iti lunayenna. Daytoy ti alagadenna nga aganac iti lalaki man wenno babai.

8Ket no awan ti umanay nga igatangna iti maysa a cordero, mangalanto ngarud iti dua a pagaw wenno dua nga urbon ti calapati; ti maysa agservi a daton a mapuuran, ket ti caduana agservi a daton gapu iti basol, ket ti padi aramidennanto a pacaabbonganna, ket nadalusto.

← Chapter 11 Jump to: Chapter 13 →