Proverbs 1

Ilokano (Ti Baro a Naimbag a Damag Biblia) 1996

Jump to: Chapter 2 →

1Dagiti proberbio ni Solomon nga anak ni David ken ari ti Israel.

2Adtoy dagiti proberbio a makatulong kadakayo tapno mailasinyo ti kinasirib ken nasayaat a pammagbaga, tapno maawatanyo dagiti pagsasao a nauneg ti kaipapananda.

3Maisurodakayo nga agbiag a manakem, agbiag iti kinalinteg, kinapudno ken kinatakneng.

4Mapagbalinda a masirib dagiti awan padasna ket matulonganda dagiti agtutubo a lallaki a mangusar iti panunotda.

5Manayonan dagitoy a proberbio ti pannakaammo dagiti masirib. Maidalanda dagiti adda adalna,

6tapno maawatanda dagiti naitalimeng a kaipapanan dagiti proberbio ken dagiti salsaludsod dagiti masirib.

7Tapno maaddaanka iti ammo, masapul nga agdayaw ken agbutengka iti Apo. Laisen dagiti maag ti kinasirib ket dida kayat ti agsursuro.

8Anakko, ipangagmo ti ibaga da amam ken inam kenka.

9Ti pannursuroda pasayaatenna ti kababalinmo. Mayarigda iti napintas a turban wenno kuentas a mangpapintas iti langam.

10Anakko, no sulisogendaka dagiti managbasol, dika sumuko.

11Kunada, “Umayka ta intay agbirok iti patayentayo. Pagang-angawantayo a darupen dagiti awan basolna a tattao.

12Nalabit a nakaradkad ken sibibiagda no masarakantay ida, ngem nataydanton no malpastayo ti kaykayattayo kadakuada.

13Makasaraktayto iti amin a kita ti kinabaknang, ket punnoentayo dagiti balbalaytay iti masamsam.

14Umayka kumuyog kadakami ket pagbibingayantayto dagiti matakawtayo.”

15Anakko, dika makikuyog kadagiti kakasta a tattao. Adaywam ida.

16Aggagarda unay nga agaramid iti dakes ken madadaanda a pumatay.

17Awan serserbi ti iket a maiwayat no kitkitaen ti tumatayab a kayatmo a tiliwen.

18Ngem agiwayat dagiti kakasta a tattao iti silo a pakatiliwan ken pakatayandanto met laeng.

19Awan duadua a ti panagarang, isunto met laeng ti pakatayan ti agarang. Kasta ti pagbanagan ti siasinoman nga agbiag iti kinaranggas.

20Denggem! Umaw-awag ti kinasirib kadagiti kalsada ken kadagiti plasa.

21Um-umkis kadagiti ruangan ti siudad, ken iti sadinoman a paguummongan dagiti tattao. Kunana:

22“Dakayo a maag, kasano pay kabayag ti kayatyo a kastoy ti kasasaadyo? Kaanonto a maumakayo a manglalais iti pannakaammo? Dikay kadi makasursuro?

23Ipangagdak no tubngarenkayo. Balakadankay iti naimbag, ket ipakaammok kadakayo ti adda kaniak a kinasirib.

24Inay-ayabankayo, inaw-awiskayo nga umay ngem didak impangag. Didak inkaskaso.

25Diyo intaltalek dagiti pammagbagak ket diyo impalubos nga aturenkayo.

26Iti kasta, no adda mapagtengyo a rigat, katawaankayto. Pagang-angawankayto inton adda kabutengyo.

27Inton dumteng kadakayo a kas bagio, mangyeg iti nadawel nga angin ti rigat ket aglak-amkay iti ut-ot ken tuok.

28Inton mapasamak dagitoy, tarigagayanyonto ti sirib ngem dikayto ipangag. Birokendakto iti amin a suli ngem didakton masarakan.

29Kinagurayo ti pannakaammo ken diyo kinayat ti agbuteng iti Apo.

30Diyo inawat ti pammagbagak ket dikay nangikaskaso idi binabalawkayo.

31Ngarud, lak-amenyonto ti bunga ti aramidyo, ket pagsakitennakayto dagiti aramidyo.

32Matay dagiti tattao nga awan padpadasna ta linaisda ti sirib. Madadael dagiti maag gapu iti dida panangikankano.

33Ngem natalgedto ti panagbiag ti siasinoman a dumngeg kaniak. Natalgedto ket awanto ti pagbutnganna.”

Jump to: Chapter 2 →