1 Corinthians 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เม่ย บัว อ๋อย หฒุ หฒวด เยีย เญย หญู่ง, ฮนั้ง เยีย หฒวด กีตู่ เญย หญู่ง นอ.

2เยีย เธง เม่ย บัว เหว่ย หฒุ เม่ย บัว เยียม หม่าน สี่ หฒั่นๆ จั๋ง เจี๊ยน เยีย. เยีย เฒาะ เยีย หฌาว เญย ติ้วๆ เล์ย จิว ปุน เม่ย บัว, เม่ย บัว หย่า เอย เจี๊ยน โหฒว.

3มป่า เยีย อ๋อย เม่ย บัว ฮิ้ว ตุ๊, กีตู่ โหฒว เต้าๆ มจั่ง ตอน เญย มฆ้อง. โหฆ หย่า โหฒว เอ๊า เญย มฆ้อง, ทิน-ฮู่ง หย่า โหฒว กีตู่ เญย มฆ้อง.

4เหว่ย น้าย, หาย เต้า มจั่ง ตอน เต๋า เก๋า ไฟ โต่ว ทิน-ฮู่ง เญย หว่า หย่า บย์อง เจี๊ยน มฆ้อง, วั้ว เต้า ฯฒฯ ป่าย หฒุ กีตู่.

5หาย เต้า มเซียะ ตอน เต๋า เก๋า ไฟ โต่ว ทิน-ฮู่ง เญย หว่า มป่า ไม้ บย์อง มฆ้อง นอ, ป่าย หฒุ นิ่น เญย โหฆ. นิ่น เซ ฮนั้ง เถย มฆ้อง เญย มเซียะ ตอน.

6สี ก๊อง มเซียะ ตอน ไม้ บย์อง มฆ้อง, กุ๊น ปิ่น จั๊บ บะเปยย อ๊ะ. มป่า มเซียะ ตอน จั๊บ บะเปยย ไฟ เถย มฆ้อง เซ ไญ้ ไห่ เญย สี่, นิ่น อ๋อย หฒุ บย์อง เจี๊ยน มฆ้อง.

7มจั่ง ตอน ไม้ หอบ หฒุ บย์อง มฆ้อง, เหว่ย หฒุ มจั่ง ตอน ฒวั้ง ทิน-ฮู่ง หย่า แอ๊ง ทิน-ฮู่ง เญย ฌัง-หล่าง. มเซียะ ตอน หย่า โหฒว มจั่ง ตอน เญย ฌัง-หล่าง.

8เหว่ย หฒุ มจั่ง ตอน ไม้ เฒ์ย เยียม มเซียะ ตอน เหฒย ต้าย, มป่า มเซียะ ตอน เยียม มจั่ง ตอน เหฒย ต้าย.

9ทิน-ฮู่ง หย่า ไม้ เฒ์ย เหฒย มจั่ง ตอน ต้าย เหว่ย มเซียะ ตอน. นิ่น เหฒย มเซียะ ตอน ต้าย เหว่ย มจั่ง ตอน.

10ฮนั้ง หน่าย, เหว่ย ฟิน-เมี่ยน เญย กอน, มเซียะ ตอน อ๋อย หฒุ บย์อง มฆ้อง, ปิ๋ว เม่ง หัด ม์า เญย จั๋ง-โห่.

11มป่า บัว เสียน เฒี้ยว เญย เมี่ยน, มจั่ง มเซียะ, เม่ย อ๋อย หฒุ ปั่ง เยีย, เยีย อ๋อย หฒุ ปั่ง เม่ย,

12เหว่ย หฒุ มเซียะ ตอน เยียม มจั่ง ตอน เหฒย ต้าย. มจั่ง ตอน หย่า เยียม มเซียะ ตอน ธ้วด เสย. มป่า หม่าน หมวด เยียม ทิน-ฮู่ง ต้าย.

13เม่ย บัว กั้น ฮนั้ม หมั่ง ก๋า, มเซียะ ตอน เต๋า เก๋า เหธา ทิน-ฮู่ง ก๊อง หว่า หย่า ไม้ บย์อง มฆ้อง เซ หอบ เญย ไฟ?

14ป้าม เมี่ยน โพว-ทง เญย เจ๊า ไม้ เฒ์ย หฌาว บัว ฮิ้ว ตุ๊ มจั่ง ตอน เลี่ยว บะเปยย ด๊าว เซ ไญ้ ไห่ เญย สี่ ไฟ?

15มป่า มเซียะ ตอน เลี่ยว บะเปยย ด๊าว เซ เหฑว่ย ไห่. ทิน-ฮู่ง ปุน มเซียะ ตอน ม่าย บะเปยย ด๊าว เหว่ย ปวัง มฆ้อง.

16สี ก๊อง ม่าย เมี่ยน อ๋อย แฑง น้าย เต๋ย สี่, เยีย ขูง อ๋อย ก๊อง, เยีย บัว เหธา ทิน-ฮู่ง เญย หฒวัง จิว-ปาง ไม้ หล่ง กั้น หญู่ง เล์ย อ๊ะ.

17เยีย อี้ หฒั่น อ๋อย หฌาว เม่ย บัว น้าย เต๋ย หว่า, เยีย ไม้ เธง เม่ย บัว, เหว่ย หฒุ เม่ย บัว กั๊บ ฒุ้น เญย เฒี่ยง โห่ เม่ย บัว ห่อย จิว-ปาง เก้า ธั้ม เถง.

18ตะเยี้ยด, เยีย ไฮ์ ก๊อง, จิว-ปาง กั๊บ ฒุ้น เญย เฒี่ยง โห่ เม่ย บัว ปุน ฆอย โหฒว เหฒีย กวั้น. เยีย หย่า เสียน น้าย หญู่ง สี่ หฒะเก้ง ม่าย เต๋ย เญย.

19ต๋าย หฒะเก้ง อ๋อย หฒุ ม่าย เต๋ย ปุน ฆอย เญย สี่ เหว่ย ปุน ธีง เม่ย บัว หาย เต้า โหฒว ตุ๊ หอบ ทิน-ฮู่ง เญย เฮญี้ยว.

20เม่ย บัว กั๊บ ฒุ้น เญย เฒี่ยง โห่ เม่ย บัว หญั่น เญย เซ ไม้ เฒ์ย หญั่น เฒี้ยว เหลียบ ต้าย เหว่ย จั๋ง นิ่น วั้ว ต๋น หฮนาง.

21เหว่ย หฒุ หญั่น วั้ว หฒั่น, เก๊าะ-เมี่ยน ฮวาง เจี๊ยน หญั่น เก๊าะ-เมี่ยน เญย ด่าง, หธีง ต้าย ม่าย เต๋ย เฮญี้ยว เซีย, ม่าย เต๋ย โหย่ว ติ๊ว ฆวิน.

22เม่ย บัว ไม้ ม่าย เปย๊า เยียม เหว่ย หญั่น เหธา ฮบ ไฟ? ไฟ เม่ย บัว หมั่ง เผีย ทิน-ฮู่ง เญย จิว-ปาง หย่า โหฒว ปุน เมี่ยน จ่ม เมี่ยน หฒุ ไญ้? เม่ย บัว อ๋อย เยีย ฮนั้ง หาย นอ ก๊อง? อ๋อย เยีย เหว่ย น้าย เต๋ย สี่ เธง เม่ย บัว ไฟ? เยีย หฒะเก้ง! ไม้ เธง เม่ย บัว อ๊ะ.

23เหว่ย หฒุ เฒี้ยว จิว ปุน เยีย เญย เล์ย เยีย ฒิบ ต้าย หย่า จิว ปุน เม่ย บัว หมี่ อ๊ะ. เซ ต้ง เฒี้ยว เยซู หฒุ หม่าย วั้ว ม์วน, นิ่น เฒาะ ฌั้ว ต้าย,

24แล์ง ฒี่ง ลิ์ว ทิน-ฮู่ง, นิ่น ฯฒฯ แมะ ฆอย ต้าย ก๊อง, “น้าย เยีย เญย ซิน, เซ เหว่ย เม่ย บัว. เม่ย บัว อ๋อย หฒุ ฮนั้ง น้าย โหฒว เหว่ย จั๋ง เยีย.”

25หญั่น ลิ์ว หฮนาง, เยซู ฟี่ ฮนั้ง เญย เฒาะ นอม ฒ้าน ต้าย หย่า ก๊อง, “น้าย นอม ฒ้าน เซ หล่ง เยีย เญย ฑย้าม เหลียบ เจี์ย เญย เซียง-แหง่ง หว่า. เม่ย บัว หาย หฒั่น ฮบ น้าย นอม ฒ้าน, อ๋อย หฒุ ฮบ เหว่ย จั๋ง เยีย.”

26เม่ย บัว หาย หฒั่น หญั่น น้าย นอม ฌั้ว, ฮบ น้าย นอม ฒ้าน, เม่ย บัว ปุน ธีง เฒี้ยว ไต่ หมี่ อ๊ะ. ฮนั้ง น้าย โหฒว เถา นิ่น แอ๋ง ต้าย.

27เหว่ย น้าย, หาย เต้า หละไกว้ หญั่น เฒี้ยว เญย ฌั้ว, หล่ง เฒี้ยว เญย ฒ้าน ฮบ, วั้ว เต้า ฯฒฯ ป์าม เฒี้ยว เญย ซิน เหธา เฒี้ยว เญย ฑย้าม.

28เต้าๆ เมี่ยน อ๋อย หฒุ ฒ่า กั้น เญย เฮญี้ยว ด่าง หธีง ต้าย หญั่น น้าย นอม ฌั้ว, ฮบ น้าย นอม ฒ้าน.

29หาย เต้า หญั่น ไฟ ฮบ หย่า เฒียะ ไม้ ตุ๊ เฒี้ยว เญย ซิน, นิ่น หญั่น หย่า ฮบ ปุน นิ่น กั้น หฒุ ตี่ง ฒุ์ย.

30เหว่ย น้าย เม่ย บัว เมี่ยน ธั้ม ปุ๊ด แป่ง, เมา ไห่, แอ๋ง ม่าย เต๋ย ไต่ หมี่ อ๊ะ.

31สี ก๊อง บัว ฒ่า กั้น เญย เฮญี้ยว ด่าง ฯฒฯ ไม้ หฒุ ทิน-ฮู่ง ตี่ง ฒุ์ย.

32มป่า เฒี้ยว เซี้ยม บัว เญย ฒุ์ย, บัว หฒุ เบ๊าะ หฌาว เหว่ย ปุน บัว ไม้ หฒุ เหธา ลู่ง เดี๊ย ตี่ง ฒุ์ย.

33ก๋อ-โย์ว อ่า, เหว่ย น้าย เม่ย บัว กั๊บ ฒุ้น หญั่น เฒี้ยว เหลียบ ต้าย เญย หฮนาง, ล่าน อ๋อย หฒุ ฒั้ว ล่าน.

34หาย เต้า เฮญี้ยว เซีย, อ๋อย หฒุ เยียม เปย๊า หญั่น ด่าง. เถา กั๊บ ฒุ้น เญย เฒี่ยง โห่, เม่ย บัว ฯฒฯ ไม้ หฒุ ตี่ง ฒุ์ย. วั้ว เต๋ย กั้น หญู่ง สี่, ฒั้ว เยีย เถา มต้าย เบ่น.

← Chapter 10 Jump to: Chapter 12 →