1 Corinthians 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1หฒวัง ก๋อ-โย์ว อ่า, ฒิ่น ด่าง เยีย เหธา เม่ย บัว ก๊อง หว่า, เยีย ไม้ ไฮ่ ฮนั้ง เหธา ม่าย สีง ลี่ง เญย เมี่ยน ก๊อง. อ๋อย หฒุ เหธา เม่ย บัว ก๊อง ฮนั้ง เม่ย บัว หธ่อ เกวย ป้าม เกน, เอย เสียน กีตู่ เม่ย บัว เซ ฮนั้ง กู้งว์า นอ.

2วั้ว หฒั่น, เยีย อ๋อย หฒุ หล่ง หญอ หวุย เม่ย บัว, ไม้ ไฮ่ หล่ง หฮนาง, เหว่ย หฒุ เม่ย บัว ไม้ แก้ง ไฮ่ หญั่น หฮนาง. เถา อี้ หฒั่น เม่ย บัว หธ่อ หญั่น ไม้ ตุ๊,

3เหว่ย หฒุ เม่ย บัว หธ่อ เยียม ฮนั้ง เกวย ป้าม เกน เญย เมี่ยน เยียม นอ. เยียม หน่าย ม่าย ล่าน หั่น ล่าน เหธา ฟิ้ว-แฑง เญย สี่. น้าย ปุน ธีง เม่ย บัว หธ่อ เกวย ป้าม เกน หย่า โหฒว ฮนั้ง เกวย ป้าม เกน เญย เมี่ยน โหฒว นอ, ไม้ เฒ์ย?

4เม่ย บัว ม่าย ล่าน ก๊อง, “เยีย กัน เปาโล.” ม่าย ล่าน ก๊อง, “เยีย กัน อาปอโล.” น้าย ไม้ เฒ์ย โหฒว ฮนั้ง เกวย ป้าม เกน เญย เมี่ยน ไฟ?

5อาปอโล โหฒว หาย หญู่ง เมี่ยน? เปาโล โหฒว หาย หญู่ง เมี่ยน? เยีย บัว ขูง โหฒว ทิน-ฮู่ง เญย โปว ต้อ เม่ย บัว เสียน. หฒิว เฒี้ยว พ้าย เญย กง, เก๊าะ-เมี่ยน ม่าย เก๊าะ-เมี่ยน เญย ป่วน โหฒว.

6เยีย หฒวัง ญิม, อาปอโล ฟุ ววม, มป่า ทิน-ฮู่ง กั้น ปุน โฮล ต้าย.

7หฒวัง ญิม วั้ว เต้า เหธา ฟุ ววม วั้ว เต้า เซ ไม้ หล่ง เจี๊ยน. หล่ง เจี๊ยน เญย เซ ทิน-ฮู่ง, เหว่ย หฒุ ทิน-ฮู่ง ปุน โฮล ต้าย.

8หฒวัง วั้ว เต้า เหธา ฟุ ววม วั้ว เต้า, อี เต้า ฒู้ง ฟี่ ฮนั้ง เญย. ทิน-ฮู่ง อ๋อย เอย เก๊าะ-เมี่ยน โหฒว เญย กง ปุน ฒี่ง เหญ่ย.

9เยีย บัว เหธา ทิน-ฮู่ง จวั่ง กง โหฒว. เม่ย บัว เซ ทิน-ฮู่ง เญย เหลียง-เด่ย. เม่ย บัว หย่า เป๋น ทิน-ฮู่ง เญย เปย๊า.

10เอย ทิน-ฮู่ง เหธย ปุน เยีย เญย เอน, เยีย โหฒว ม่าย ปั์ว-เต้า เญย ก๊ม เปย๊า หฒั่ง เหลียบ เหฒียง กอน-โด๊ะ. แอ๋ง ม่าย กั้น เต้า ต้าย ปั่ง น้าย นอม กอน-โด๊ะ เหธย เจี์ย. มป่า เต้าๆ อ๋อย หฒุ ไฝ ฟิม หมั่ง ก๋า, ฮนั้ง หาย นอ เหธย.

11เหว่ย หฒุ ไม้ ม่าย หาย เต้า ไฮ่ เหลียบ กั้น นอม กอน-โด๊ะ, ธ้วด ลิ์ว เหลียบ เหฒียง วั้ว นอม, เซ เยซู กีตู่.

12เยียม น้าย นอม กอน-โด๊ะ ม่าย เต๋ย เมี่ยน หล่ง เจียม ไฟ ญ่าน ไฟ จ๋าย เญย หละเปย๊ย เหธย. ม่าย เต๋ย หล่ง เดี๋ยง ไฟ เมี้ย ไฟ เบย้า ฆ้าว เหธย.

13เถา เซี้ยม ฒุ์ย ฮนอย, เก๊าะ-เมี่ยน โหฒว เญย กง อ๋อย ปิ๋ว เม่ง ธ้วด ต้าย, เหว่ย หฒุ วั้ว นอม ฮนอย โต์ว อ๋อย เสย เต้าๆ เญย กง ฮนั้ง หาย นอ.

14สี ก๊อง หาย เต้า เยียม น้าย นอม เหลียบ เหฒียง เญย กอน-โด๊ะ เหธย เจี์ย ต้าย เญย, หฒุ โต์ว ปั๊ว หย่า ไม้ เหฒียะ นอ, วั้ว เต้า อ๋อย ตุ๊ ฒี่ง เหญ่ย.

15มป่า หาย เต้า โหฒว เญย กง หฒุ โต์ว เหฒียะ เหฑ่ง นอ, วั้ว เต้า เญย ฒี่ง เหญ่ย ด๊อด หมี่ อ๊ะ. นิ่น กั้น แอ๊ะ, ตุ๊ เหฌียว, มป่า ฮนั้ง เยียม โต์ว เปย๋า ธ้วด ต้าย นอ.

16เม่ย บัว ไม้ ฮิ้ว ไฟ? เม่ย บัว เซ ทิน-ฮู่ง เญย สีง ติ่น. ทิน-ฮู่ง เญย สีง ลี่ง หย่า เยียม เม่ย บัว กะญั์ว.

17สี ก๊อง หาย เต้า โหฒว หว่าย ทิน-ฮู่ง เญย สีง ติ่น, ทิน-ฮู่ง อ๋อย เหมียด วั้ว เต้า, เหว่ย หฒุ ทิน-ฮู่ง เญย สีง ติ่น เซ ธีง-เหฑ่ง เญย. เม่ย บัว หย่า โหฒว นิ่น เญย สีง ติ่น.

18หาย เต้า ไม้ ตู๋ง ดั๊ว กั้น. เยียม เม่ย บัว หน่าย ม่าย หาย เต้า หฒิว อี้ จ๋า เญย หฒะเอ๋ย ฝุน กั้น ม่าย ธง-เม่ง นอ, วั้ว เต้า อ๋อย หฒุ เหญี่ยม กั้น หฮงง หธีง ต้าย หฒะเก้ง ไฮ่ ม่าย ธง-เม่ง.

19เหว่ย หฒุ ป้าม เมี่ยน ฝุน ธง-เม่ง เญย, ทิน-ฮู่ง ปวัด เซ หฮงง เญย. ฮนั้ง กีง-โซว เฟี้ย เจี๊ยน ก๊อง นอ, “ทิน-ฮู่ง หล่ง ธง-เม่ง เมี่ยน เญย ธง-เม่ง โหฒว โขว ฮลบ นิ่น บัว กั้น.”

20แอ๋ง ม่าย โจ๋ว หว่า ก๊อง, “เฒี้ยว ฮิ้ว ตุ๊ ธง-เม่ง เมี่ยน ฮนั้ม ธ้วด เญย สี่ เซ ไม้ ลั่ม หล่ง.”

21ฮนั้ง น้าย, ไม้ ตู๋ง เฒาะ หาย เต้า ต้าย ปู๋ง หว่า-เหมา. หม่าน หมวด เป๋น เม่ย บัว เญย.

22ไม้ กุ๊น เปาโล ไฟ อาปอโล ไฟ ปีเต ไฟ น้าย นอม ป้าม เกน, ไม้ กุ๊น เฒี่ยง ไฟ ไต่, อี้ จ๋า ฮนอย ไฟ ฆะฮ้า ฮี้ง, เหยียด ฒู้ง เซ เม่ย บัว เญย.

23เม่ย บัว หย่า โหฒว กีตู่ เญย. กีตู่ หย่า โหฒว ทิน-ฮู่ง เญย.

← Chapter 2 Jump to: Chapter 4 →