1 Corinthians 6

Mien Bible (Thai Script) © Thailand Bible Society, 2007

← Chapter 5 Jump to: Chapter 7 →

1สี ก๊อง เยียม เม่ย บัว บุด๋ง ม่าย เต้า เหธา กั้น เต้า ม่าย สี่, นิ่น ฝู่ง ก๊าม มี่ง ล์อ ไม้ เสียน ทิน-ฮู่ง เญย ตุ๋น สี่ เมี่ยน, ไม้ ล์อ ทิน-ฮู่ง เญย เมี่ยน เบ่น?

2เม่ย บัว ไม้ ฮิ้ว ตุ๊ ทิน-ฮู่ง เญย เมี่ยน อ๋อย เซี้ยม ป้าม เกน ไฟ? วั้ว หญู่ง, สี ก๊อง เม่ย บัว อ๋อย หฒุ เซี้ยม ป้าม เกน, ไฝ-ฟิ้ว สี่ เม่ย บัว ไม้ ไฮ่ เซี้ยม ไฟ?

3เม่ย บัว ไม้ ฮิ้ว ตุ๊ เยีย บัว อ๋อย หฒุ เซี้ยม ฟิน-เมี่ยน ไฟ? ฮนั้ง หน่าย, บัว เหยียด เฒย อ๋อย หฒุ ไฮ่ เซี้ยม เสย หฒั่ง เญย สี่.

4วั้ว หญู่ง, สี ก๊อง เม่ย บัว ม่าย สี่, เม่ย บัว เหว่ย หาย ติ่ว ต้อ มี่ง ปุน เยียม จิว-ปาง ไม้ หนั่ง ม่าย เม่ง เต้า เญย เมี่ยน เบ่น?

5เยีย ฮนั้ง น้าย เฟี้ย เหว่ย ปุน เม่ย บัว ไญ้. เม่ย บัว ไม้ ม่าย เหยียด เต้า ธง-เม่ง เมี่ยน ไฮ่ เถง ก๋อ-โย์ว ตุ๋น สี่ ไฟ?

6ก๋อ-โย์ว ม่าย ล่าน โก๋ ล่าน เญย สี่ โหย่ว อ๋อย หฒุ มี่ง ปุน ไม้ เสียน เญย เมี่ยน เบ่น ไฟ?

7เม่ย บัว ม่าย ล่าน โก๋ ล่าน เญย สี่ ฒู้ง ปุน ธีง เม่ย บัว ต่อง อ๊ะ. เมี่ยน โหฒว ต่อง เม่ย, เม่ย เตี๊ย เจี๊ยน เซ เก้า หลง ไม้ เฒ์ย? เหญี่ยม เควย หย่า เก้า หลง ไม้ เฒ์ย?

8ต๋าว หฑวน, เม่ย บัว ล่าน โหฒว ต่อง ล่าน, ล่าน เควย ล่าน, เลี่ยม โหฒว ปุน กั้น เญย ก๋อ-โย์ว.

9เม่ย บัว ไม้ ฮิ้ว ไฟ? โหฒว หว่าย สี่ เญย เมี่ยน ไม้ ตุ๊ เยียม ทิน-ฮู่ง เญย กั๊วะ. ไม้ ตู๋ง ดั๊ว กั้น โอ่. ตะฟ่าน โหฒว ไม้ หลวน ห่อง เญย สี่, ป๋าย หมิ่ว-ฝัง, เหฮยียน เอ๊า เหฮยียน โหฆ, มจั่ง ตอน หม่าย ซิน, มจั่ง เหฮยียน มจั่ง, มเซียะ เหฮยียน มเซียะ,

10ลู้ เมี่ยน, เม้า กะน้าย, ฮบ ติ๊ว ฆวิน, ก๊อง โตะ เมี่ยน ไฟ โหฒว หฒะ, น้าย หญู่ง เมี่ยน ไม้ ตุ๊ เยียม ทิน-ฮู่ง เญย กั๊วะ.

11ฒิ่น ด่าง เม่ย บัว หย่า ม่าย เต๋ย โหฒว น้าย หญู่ง เมี่ยน. มป่า อี้ หฒั่น เม่ย บัว เขา เฒี้ยว เยซู กีตู่ เหธา บัว เญย ทิน-ฮู่ง เญย สีง ลี่ง ฯฒฯ ตุ๊ หฑาว เหฑ่ง เม่ย บัว เญย ฒุ์ย, ปุน เม่ย บัว เป๋น ทิน-ฮู่ง เญย ธีง-เหฑ่ง เมี่ยน, หย่า ตุ๊ เหธา ทิน-ฮู่ง หอบ เฮญี้ยว ต้าย.

12ม่าย เมี่ยน อ๋อย ก๊อง, “หาย หญู่ง เยีย ม่าย เล์ย โหฒว ตุ๊ เญย.” เฒ์ย เญย, มป่า ไม้ เฒ์ย หญู่งๆ ม่าย ลั่ม หล่ง. เยีย ไฮ่ ก๊อง, “หาย หญู่ง เยีย ม่าย เล์ย โหฒว ตุ๊ เญย,” มป่า เยีย ไม้ ปุน หาย หญู่ง ห่อย เยีย โหฒว โน่ว.

13แอ๋ง ม่าย เมี่ยน อ๋อย ก๊อง, “หญั่น ฮบ เซ เหว่ย กะเซีย, กะเซีย เซ เหว่ย หญั่น ฮบ.” เฒ์ย เญย, มป่า อี หญู่ง ฒู้ง ทิน-ฮู่ง อ๋อย เหมียด เหฑ่ง. เมี่ยน เญย ซิน เซ ไม้ เฒ์ย เหว่ย ปวั้ง เลี่ยว เญย เจ๊า, เซ เหว่ย ฟู-สู เฒี้ยว. เฒี้ยว หย่า โก๋ว บัว เญย ซิน.

14ทิน-ฮู่ง ปุน เฒี้ยว นั่ง ต้าย. ทิน-ฮู่ง หย่า อ๋อย หล่ง นิ่น เญย ชะ ปุน บัว แอ๋ง นั่ง ต้าย ฟี่ ฮนั้ง เญย.

15เม่ย บัว ไม้ ฮิ้ว ไฟ? เม่ย บัว เญย ซิน เซ กีตู่ เญย ซิน เญย เหยียด หญู่ง. ฮนั้ง หน่าย, เยีย อ๋อย หฒุ ต้อ กีตู่ เญย ซิน มี่ง เป๋น หม่าย ป๊วน-ซิน เญย มเซียะ ตอน เญย ซิน เญย เหยียด หญู่ง ไฟ? ฒู้ง ไม้ เฒ์ย!

16เม่ย บัว ไม้ ฮิ้ว ไฟ? เมี่ยน เหฮยียน หม่าย ป๊วน-ซิน เญย มเซียะ ตอน ฯฒฯ เหธา วั้ว เต้า เป๋น เหยียด นอม ซิน, เหว่ย หฒุ กีง-โซว ก๊อง, “นิ่น บัว อี เต้า ฯฒฯ เป๋น เหยียด นอม ซิน หมี่ อ๊ะ.”

17มป่า หาย เต้า เหธา เฒี้ยว กั๊บ เจี๊ยน, วั้ว เต้า ฯฒฯ เหธา เฒี้ยว เป๋น เหยียด ติ่ว เฮญี้ยว อ๊ะ.

18อ๋อย หฒุ ซิ้ม ฆอย เหฮยียน เญย เจ๊า. เมี่ยน ป์าม เญย หาย หญู่ง ฒุ์ย เซ ห่อย ไม้ หฒุ ซิน. มป่า โหฒว เหฮยียน เญย สี่ เซ ห่อย กั้น เญย ซิน.

19เม่ย บัว ไม้ ฮิ้ว ไฟ? เม่ย บัว เญย ซิน เซ สีง ลี่ง เญย ติ่น. ทิน-ฮู่ง ปุน ต้าย เญย สีง ลี่ง เยียม เม่ย บัว กะญั์ว. เม่ย บัว เญย ซิน เซ ไม้ เฒ์ย เม่ย บัว กั้น เญย, เซ ทิน-ฮู่ง เญย,

20เหว่ย หฒุ ทิน-ฮู่ง ม์าย เม่ย บัว จ๋าย ไห่. ฮนั้ง หน่าย, เม่ย บัว อ๋อย หฒุ หล่ง เม่ย บัว เญย ซิน ท่าย ทิน-ฮู่ง.

← Chapter 5 Jump to: Chapter 7 →