1 Corinthians 16

Mien Bible (Thai Script) © Thailand Bible Society, 2007

← Chapter 15 Jump to:

1อี้ หฒั่น เยีย อ๋อย ก๊อง กั๊บ ญ่าน เถง ทิน-ฮู่ง เญย เมี่ยน วั้ว หญู่ง เจ๊า. เยีย บั๋ว กาลาเทีย เต่ย-ปูง เญย หฒวัง จิว-ปาง ฮนั้ง หาย นอ โหฒว, เม่ย บัว หย่า อ๋อย หฒุ ฮนั้ง วั้ว นอ โหฒว.

2นอมๆ เล์ย-ป๋าย เญย ตะเยี้ยด ฮนอย, เม่ย บัว โม์ว เต้า เมี่ยน หฒิว เม่ย บัว หฒ่อน ตุ๊ เญย ญ่าน อ๋อย หฒุ เฒาะ เต๋ย ธ้วด ต้าย เซียว เจี๊ยน. เยีย ต้าย วั้ว หฒั่น ฯฒฯ ไม้ หฒุ กั๊บ ญ่าน อ๊ะ.

3เยีย เถา เม่ย บัว หน่าย วั้ว หฒั่น, เม่ย บัว พ้าย หาย เต๋ย เมี่ยน มี่ง นอ, เยีย ฯฒฯ ปุน เฝียน ปุน ธีง นิ่น บัว ต้ง หาย เต้า หย่า ปุน นิ่น บัว ต้อ วั้ว เต๋ย กั๊บ ต้าย เญย ญ่าน มี่ง เยลูซาเลม ฒี่ง.

4สี ก๊อง เยีย หอบ หฒุ มี่ง นอ, นิ่น บัว เหธา เจี๊ยน เยีย มี่ง หย่า ตุ๊.

5เยีย ยั่ง มาซีโดเนีย แซ้ง เจี๋ย, เยีย ฯฒฯ มี่ง เม่ย บัว หน่าย, เหว่ย หฒุ เยีย ตี่ง เฮญี้ยว ยั่ง มาซีโดเนีย แซ้ง มี่ง.

6เหฑีย เยีย ม่าย เฒี่ยง โห่ เหธา เม่ย บัว เยียม หธาม, ฒู้ง ไฮ่ เยียม เถา เจี๋ย ลิ์ว ตง-เกน ฮนอย มเปย. ฆะฮ้า เยีย อ๋อย หฒุ มี่ง หาย, เม่ย บัว ฯฒฯ ไฮ่ เถง เยีย ธ้วด เจ๊า.

7เยีย ไม้ เฒ์ย อ๋อย เจี๋ย เจ๊า ปวัด ตั้ง เม่ย บัว ฮนั้ง. สี ก๊อง เฒี้ยว เญย หฒะเอ๋ย นอ, เยีย อ๋อย เหธา เม่ย บัว เยียม หธาม.

8มป่า เยีย หธ่อ อ๋อย เยียม น้าย เอเฟโซ ฒี่ง เถา เพนเทค้อด.

9เหว่ย หฒุ เยียม น้าย ม่าย ฉัง โหฒว ม่าย ลั่ม หล่ง เญย กง ธั้ม ไห่, หย่า ม่าย เมี่ยน ธั้ม เหธา เยีย ต๋อย-เตก.

10สี ก๊อง ทิโมไท เถา เม่ย บัว หน่าย, อ๋อย หฒุ หลงๆ เญย ฒิบ. ไม้ ตู๋ง ปุน นิ่น กั้ม เหฑีย หาย หญู่ง, เหว่ย หฒุ นิ่น ฮนั้ง เยีย นอ โหฒว เฒี้ยว เญย กง.

11ไม้ ตู๋ง ปุน หาย เต้า หมั่ง เผีย นิ่น. อ๋อย หฒุ เถง นิ่น แป้ง ออน เญย ธ้วด เจ๊า หฑวน เถา เยีย น้าย, เหว่ย หฒุ เยีย ฒั้ว เจี๊ยน นิ่น เหธา วั้ว เต๋ย ก๋อ-โย์ว หฑวน.

12บัว เญย ก๋อ-โย์ว อาปอโล แอ๊ะ, เยีย ชะ ขวิน นิ่น เหธา เจี๊ยน วั้ว เต๋ย ก๋อ-โย์ว บัว มี่ง หมั่ง เม่ย บัว, มป่า นิ่น ไฮ์ ไม้ แก้ง หอบ หฒุ มี่ง. ฒั้ว นิ่น ม่าย ฉัง นิ่น ฯฒฯ มี่ง อ๊ะ.

13อ๋อย หฒุ กีง เจี๊ยน เฮญี้ยว, หย่า เสียน ว้วน. อ๋อย หฒุ ต๊าม โฮล, หย่า เฮ้น.

14เม่ย บัว โหฒว หาย หญู่ง อ๋อย หฒุ ม่าย เฮญี้ยว ฮนั้ม เมี่ยน.

15เม่ย บัว ฮิ้ว ตุ๊ สะเทฟานัด บัว เหยียด เปย๊า เมี่ยน เยียม อาคายา แซ้ง เสียน เยซู ด่าง. นิ่น บัว เก้ง จอม เฮญี้ยว ฟู-สู ทิน-ฮู่ง เญย เมี่ยน.

16ก๋อ-โย์ว อ่า, เยีย ขวิน เม่ย บัว อ๋อย หฒุ บัวะ น้าย หญู่ง เมี่ยน เหธา เหยียด ฒู้ง จวั่ง กง โหฒว เญย เมี่ยน.

17สะเทฟานัด, ฟอทูนาทัด เหธา อาคายคัด ต้าย เถา น้าย, เยีย อะเฮน้ย ไห่, เหว่ย หฒุ เม่ย บัว เถง ไม้ เถา เญย, นิ่น บัว เถง เหฑ่ง.

18นิ่น บัว โหฒว ปุน เยีย เญย เฮญี้ยว ออน-เหลาะ, ฮนั้ง นิ่น บัว ปุน เม่ย บัว เญย เฮญี้ยว ออน-เหลาะ นอ. น้าย หญู่ง เมี่ยน เม่ย บัว หฒะเก้ง อ๋อย หฒุ ท่าย.

19เยียม เอเซีย แซ้ง เญย หฒวัง จิว-ปาง จั๋ง เถา เม่ย บัว. อาควินลา เหธา ปิดสินลา แอ๋ง เหธา เยียม นิ่น บัว เญย เปย๊า โหฒว เล์ย-ป๋าย วั้ว นอม จิว-ปาง, เหว่ย บัว ล่ม ฑ่อย เสียน เฒี้ยว นิ่น บัว ฯฒฯ จั๋ง เถา เม่ย บัว.

20เยียม น้าย เญย หฒวัง ก๋อ-โย์ว หย่า จั๋ง เถา เม่ย บัว. เม่ย บัว อ๋อย หฒุ โหฒว เฮญี้ยว ธีง-เหฑ่ง, ล่าน เหธา ล่าน ฒม เฮมียน หน่าย แป้ง ออน.

21เยีย กั้น นั้น ปั๊ด เฟี้ย น้าย เต๋ย หว่า, “เยีย, เปาโล, จั๋ง เถา เม่ย บัว.”

22สี ก๊อง หาย เต้า ไม้ ฮนั้ม เฒี้ยว, ปุน นิ่น หฒุ เหฒียว อ๊ะ. เยีย บัว เญย เฒี้ยว อ้า! โท้ เม่ย ต้าย อ๊ะ ม่าะ!

23โท้ เฒี้ยว เยซู เหธย เอน ปุน เม่ย บัว.

24บัว เหธา กีตู่ เยซู จวั่ง แหม่ง เฒี่ยง. เยีย หย่า ฮนั้ม ไห่ เม่ย บัว หฒวัง เมี่ยน อ๊ะ. อาเมน.

← Chapter 15 Jump to: