2 Corinthians 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เยีย โท้ เม่ย บัว หล่ง หน่อย เตี๊ย เจี๊ยน หมวัง เยีย ก๊อง เต๋ย ป๊า กะน้าย-หฮงง หว่า. มป่า เม่ย บัว ฒู้ง เตี๊ย เจี๊ยน เญย.

2เยีย แฑง เจี๊ยน เม่ย บัว ฮนั้ง ทิน-ฮู่ง แฑง เจี๊ยน เม่ย บัว นอ, เหว่ย หฒุ เม่ย บัว เซ ฮนั้ง เต้า ธีง-เหฑ่ง เญย เซียะ เยีย แล์ง ปู๋ง ปุน เหยียด เต้า ตอน. วั้ว เต้า ตอน เซ กีตู่.

3มป่า เยีย เฑ่า เหย ฮาวา ฮนั้ง หาย นอ หฒุ นาง หล่ง กู๊ ไกว๋ เญย สี่ ดั๊ว, เม่ย บัว หย่า ฮนั้ง วั้ว นอ ไฮ่ หฒุ ดั๊ว. เม่ย บัว เญย เฮญี้ยว ฯฒฯ เพียน หมี่ อ๊ะ, ไม้ ธีง-เหฑ่ง, ไม้ เหฒียบ ฒัวะ เญย กัน กีตู่.

4เหว่ย หฒุ หาย เต้า มี่ง เม่ย บัว หน่าย ฒุ่น กั้น เต้า เยซู, ไม้ เฒ์ย เยีย บัว ฒุ่น วั้ว เต้า, เม่ย บัว อะเฮน้ย หมวัง. เม่ย บัว หย่า ฒิบ กั้น เต้า สีง ลี่ง เหธา กั้น หญู่ง คู้ เฝียน, เซ ไม้ ฟี่ ฮนั้ง เยีย บัว ปุน เม่ย บัว ฒิบ วั้ว เต้า สีง ลี่ง เหธา วั้ว หญู่ง คู้ เฝียน.

5เยีย ฮนั้ม ต้าย เยีย ไม้ เฒ์ย เก้า ไฝ เหยียด เต๋ย วั้ว เต๋ย ต้ม กง-โฒ่.

6ไม้ กุ๊น เยีย ไม้ ไฮ่ ก๊อง หว่า บย่าง, เยีย ม่าย ว่วน ฒาง. น้าย เต๋ย เจ๊า, เยีย บัว เยียม หม่าน สี่ ปิ๋ว เม่ง ปุน เม่ย บัว ฮิ้ว ลิ์ว อ๊ะ.

7เยีย ฒุ่น ทิน-ฮู่ง เญย คู้ เฝียน ปุน เม่ย บัว หมวัง หย่า ไม้ เห่ว เม่ย บัว ธ้วด ฟิน-โค้ว. เยีย หย่า ฒัด กั้น โหฒว ไฝ เหว่ย โป้ว เม่ย บัว ฝาว. ฮนั้ง น้าย โหฒว, เยีย โหฒว ต่อง ไฟ?

8เยีย เยียม เม่ย บัว หน่าย โหฒว กง เญย เฒี่ยง โห่ ม่าย กั้น เต๋ย จิว-ปาง จวัง เยีย. น้าย เซ ฮนั้ง เยีย ลู้ กั้น เต๋ย จิว-ปาง เญย ญ่าน เหว่ย เถง เม่ย บัว นอ.

9เยีย เหธา เม่ย บัว เยียม วั้ว หฒั่น, เยีย เฉียม หฒุ หาย หญู่ง เยีย ไม้ เฝย หลุ่ย เม่ย บัว หาย เต้า. เยีย เฉียม หฒุ เญย, เซ เยียม มาซีโดเนีย ต้าย วั้ว เต๋ย ก๋อ-โย์ว เถง เยีย เก๋า หล่ง. ฒิ่น ด่าง เยีย ไม้ เฝย หลุ่ย เม่ย บัว. เถา ฆะฮ้า ฮี้ง เยีย หย่า ไม้ เฝย หลุ่ย เม่ย บัว อ๊ะ.

10เยีย ม่าย กีตู่ เญย เฒียน เล์ย เยียม เยีย เญย เฮญี้ยว ฯฒฯ ก๊าม ก๊อง, เยียม ก๋อม อาคายา แซ้ง ไม้ ม่าย หาย เต้า ไฮ่ ล่าน ตุ๊ เจี๊ยน เยีย ปู๋ง น้าย เต๋ย หว่า-เหมา.

11เยีย เหว่ย หาย ติ่ว ฮนั้ง น้าย นอ ก๊อง? เยีย ไม้ ฮนั้ม เม่ย บัว ไฟ? ทิน-ฮู่ง ฮิ้ว ตุ๊ เยีย ฮนั้ม เม่ย บัว เญย.

12เยีย อี้ หฒั่น ฮนั้ง หาย นอ โหฒว, เยีย หย่า อ๋อย โหฒว เจี๊ยน มี่ง เหว่ย ไม้ ปุน วั้ว เต๋ย “กง-โฒ่” ม่าย กอน-แป๋ง ปู๋ง หว่า-เหมา ก๊อง นิ่น บัว โหฒว เญย เหธา เยีย บัว โหฒว เญย เซ ฟี่ ฮนั้ง.

13วั้ว เต๋ย เมี่ยน โหฒว จ๊า กง-โฒ่, นิ่น บัว โหฒว เญย กง ขูง ดั๊ว เมี่ยน ฮนั้ง. นิ่น บัว หย่า ก๊อย หญู่ง เฒ้ย โหฒว ฮนั้ง กีตู่ เญย กง-โฒ่ นอ.

14มป่า น้าย ไม้ เฒ์ย บัวะ ฮ่อง เญย สี่. เลี่ยม ซาตาน หย่า ไฮ่ ก๊อย หญู่ง เฒ้ย โหฒว ฮนั้ง เต้า ฌัง-หล่าง เญย ฟิน-เมี่ยน.

15ฮนั้ง หน่าย, ซาตาน เญย โปว ก๊อย หญู่ง เฒ้ย โหฒว ฮนั้ง แป้ง ฟิม เญย ทิน-ฮู่ง เญย โปว เซ ไม้ เฒ์ย บัวะ ฮ่อง เญย สี่. เถา เซ้ด เมว์ย เอย นิ่น บัว โหฒว เญย นิ่น บัว ฯฒฯ ตุ๊ เสี่ยว อ๊ะ.

16เยีย แอ๋ง ก๊อง หฑุ่น, หาย เต้า ไม้ ตู๋ง หล่าย เยีย โหฒว เมี่ยน หฮงง เมี่ยน. มป่า เม่ย บัว ฝุน เยีย โหฒว เมี่ยน หฮงง เมี่ยน นอ, โท้ เม่ย บัว เซว่ย เยีย โหฒว ฮนั้ง เมี่ยน หฮงง เมี่ยน, เยีย ฯฒฯ ไฮ่ ปู๋ง เต๋ย หว่า-เหมา.

17เยีย อี้ หฒั่น ก๊อง น้าย เต๋ย หว่า เซ ไม้ เฒ์ย เอย เฒี้ยว เยซู อ๋อย เยีย ก๊อง. เซ ฮนั้ง เมี่ยน หฮงง เมี่ยน ปู๋ง หว่า-เหมา เธง กั้น.

18เหว่ย หฒุ ม่าย เมี่ยน ธั้ม เญย เอย ป้าม เมี่ยน เญย เอ๋ย ปู๋ง หว่า-เหมา, เยีย อ๋อย ฟี่ ฮนั้ง เญย โหฒว อ๊ะ.

19เม่ย บัว ธง-เม่ง ไห่ หธีง ต้าย อะเฮน้ย เตี๊ย เจี๊ยน หมวัง เมี่ยน หฮงง เมี่ยน.

20เหว่ย หฒุ หาย เต้า อ๊าบ เม่ย บัว โป่ว นิ่น, หาย เต้า โหฒว ปุน เม่ย บัว หฒุ เควย, หาย เต้า เผียน เม่ย บัว, ไฟ ท่าย นิ่น กั้น โหฒว โฮล, ไฟ ไบ๋ เม่ย บัว เญย เฮมียน, เม่ย บัว หย่า เตี๊ย เจี๊ยน เซว่ย นิ่น โหฒว.

21เยีย ไญ้ ไห่ อ๋อย หฒุ เหญี่ยม เยีย บัว ต๊าม ไฝ, ไม้ ไฮ่ ฮนั้ง หน่าย นอ โหฒว. ไม้ กุ๊น หาย เต้า ก๊าม ปู๋ง หว่า-เหมา ก๊อง หาย หญู่ง, (เยีย ก๊อง ฮนั้ง เมี่ยน หฮงง เมี่ยน ก๊อง นอ,) เยีย หย่า ก๊าม ปู๋ง หว่า-เหมา ก๊อง วั้ว หญู่ง.

22นิ่น บัว โหฒว ฮิบลู เมี่ยน ไฟ? เยีย หย่า เฒ์ย เญย. นิ่น บัว โหฒว อิสะลาเอน เมี่ยน ไฟ? เยีย หย่า เฒ์ย. นิ่น บัว โหฒว อับลาฮัม เญย เฒ้ย-ฟุน ไฟ? เยีย หย่า เฒ์ย.

23นิ่น บัว โหฒว กีตู่ เญย โปว ไฟ? เยีย หธ่อ โหฒว โปว เก้า หลง นิ่น บัว. (เยีย ก๊อง ฮนั้ง ปุ๊ด ดิน เมี่ยน เญย หว่า นอ.) เยีย โหฒว กง เก้า โค้ว, หฒุ หววน โล่ เก้า ธั้ม นิ่น บัว, หฒุ ปย๊า-ปิน เบ๊าะ เก้า ธั้ม, หย่า ปวั้ง เหฒีย หฑุ่น ค้า เต๋ย ไต่ หมี่ อ๊ะ.

24เยีย หฒุ ยิวไท เมี่ยน หล่ง ปย๊า-ปิน เบ๊าะ ปยา หฑุ่น, หฑุ่นๆ ฟ่า เหฒียบ จั๊ว ปิน.

25เยีย หฒุ โลมา จั๋น หล่ง ปย๊า เบ๊าะ ปัว หฑุ่น. เยีย หฒุ เมี่ยน หล่ง หละเปย๊ย ฒง เหยียด หฑุ่น. เยีย เยียม ฑั้ง หฒุ ฑั้ง หว่าย เฒ่ม ปัว หฑุ่น. แอ๋ง ม่าย หฑุ่น เยีย เบี้ยว เจี๊ยน ค้อย-หมิ่น เหยียด ฮนอย เหยียด ม์วน.

26เยีย หฒั่นๆ อ๋อย หฒุ ธ้วด เจ๊า มี่ง, ปวั้ง ห่อย แหม่ง เญย สี่ ธั้ม เญย. ปวั้ง หฒุ ววม โฮล ไฮ่ ห่อย แหม่ง, หฒุ จั๋น-หฒะ ธ้าง, หฒุ กั้น เญย จวั่ง ฝีง เมี่ยน หย่า หฒุ จั๋น ไฮ่ ห่อย แหม่ง. เยียม ฒี่ง, เยียม หล่ม, เยียม ค้อย หฒุ ปวั้ง ไฮ่ ห่อย แหม่ง เญย สี่, หย่า หฒุ จ๊า ก๋อ-โย์ว อ๋อย ห่อย แหม่ง.

27เยีย โหฒว กง โค้ว, เตี๊ย โค้ว. ธั้ม-หฑุ่น เยีย ไม้ ตุ๊ มฌ่อม, เฮญี้ยว เซีย, จาง ฆ้าด. ธั้ม-หฑุ่น เยีย เตี๊ย หง่อ, ไม้ ม่าย หาย หญู่ง หญั่น, เตี๊ย จวั๊ง, ไม้ ม่าย ลุย-โหว ฒุ.

28ไม้ ตาน น้าย เต๋ย สี่ ฮนั้ง. เยีย ฮนอยๆ เหว่ย หฒวัง จิว-ปาง กว๋า เฮญี้ยว ฮนั้ง เฮนี้ย เญย กะน้าย งัด เจี๊ยน เยีย นอ.

29ม่าย หาย เต้า เมา, เยีย หย่า ไฮ์ เหธา เจี๊ยน เมา อ๊ะ. ม่าย หาย เต้า หฒุ ดั๊ว ป์าม ฒุ์ย เยีย หย่า ไฮ์ เฮญี้ยว มุน เฮญี้ยว เฑ่า.

30สี ก๊อง เยีย อ๋อย หฒุ ปู๋ง หว่า-เหมา, เยีย อ๋อย ปู๋ง หว่า-เหมา ก๊อง ปุน ธีง เยีย เมา วั้ว หญู่ง สี่ ฮนั้ง.

31เฒี้ยว เยซู เญย เตีย, ทิน-ฮู่ง, ต้ง อ๋อย หฒุ เหยียด ลิ์ว เธง เญย ทิน-ฮู่ง, ฮิ้ว ตุ๊ เยีย ไม้ ก๊อง-แปะ.

32เยีย เยียม ดามัดกัด ฒี่ง วั้ว หฒั่น, เยียม อาเลทัด ฮู่ง เญย ปั์ว-เดี๊ย เญย แซ้ง-เฒี้ยว, พ้าย แปง ฒั้ว ฒี่ง อ๋อย เฒาะ เยีย.

33มป่า ม่าย เต๋ย เมี่ยน หล่ง ต้ม บาด ปู๋ง เยีย กัน ฒี่ง หลาด เญย ฟง ม่วน เหฌี่ย, เยีย ฯฒฯ เปย๋า ดุ๊ด นิ่น เญย ปั์ว-เดี๊ย หมี่ อ๊ะ.

← Chapter 10 Jump to: Chapter 12 →