2 Corinthians 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1ทิน-ฮู่ง ค้อ-เลี่ยน เยีย บัว, ปุน เยีย บัว ม่าย น้าย หญู่ง กง โหฒว, เยีย บัว ฯฒฯ ไม้ หนัม เฮญี้ยว.

2เยีย บัว ซิ้ม ฆอย เป่ย เดี๊ย, ไญ้ ไห่ เญย สี่. เยีย บัว ไม้ โหฒว กู๊ ไกว๋ เญย เจ๊า ดั๊ว เมี่ยน, หย่า ไม้ อ๋าว ทิน-ฮู่ง เญย หว่า ก๊อง จ๊า. ต๋าว หฑวน เยีย บัว ก๊อง เฒียน เล์ย เม่ง เญย, หย่า ตอง เจี๊ยน ทิน-ฮู่ง อ๋อย โหฒว หอบ หฒวัง เมี่ยน เญย เฮญี้ยว.

3สี ก๊อง เยีย บัว ฒุ่น เญย คู้ เฝียน เซ ฮนั้ง ม่าย เดีย ปวัง เจี๊ยน ปุน เมี่ยน ไม้ เม่ง แปะ นอ, เซ ขูง ปวัง เจี๊ยน ปุน หฒุ เหมียด เญย เมี่ยน ไม้ เม่ง แปะ ฮนั้ง.

4นิ่น บัว ไม้ เสียน เหว่ย หฒุ กุ๊น ป้าม เกน วั้ว เต้า เมี้ยน เญย ฮู่ง, ซาตาน, ปุน นิ่น บัว เญย เฮญี้ยว หฮมวัง, ไม้ เม่ง แปะ. นิ่น แฆะ เจี๊ยน ไม้ ปุน คู้ เฝียน เญย ฌัง หฒิว นิ่น บัว. น้าย คู้ เฝียน เซ ก๊อง กีตู่, ต้ง ฒวั้ง ทิน-ฮู่ง วั้ว เต้า, เญย ฌัง-หล่าง.

5เยีย บัว ไม้ เฒ์ย ฒุ่น เยีย บัว กั้น. เยีย บัว ฒุ่น เญย เซ เยซู กีตู่ โหฒว เฒี้ยว, เยีย บัว หย่า เหว่ย เยซู กีตู่ โหฒว เม่ย บัว เญย โปว.

6เหว่ย หฒุ ทิน-ฮู่ง, ต้ง ปุน ฌัง เยียม หฮมวัง หฒิว ธ้วด ต้าย วั้ว เต้า, ปุน นิ่น เญย ฌัง หฒิว เจี๊ยน เยีย บัว เญย เฮญี้ยว. นิ่น เญย ฌัง ปุน เยีย บัว ฮิ้ว ตุ๊ ทิน-ฮู่ง เญย ฌัง-หล่าง, ต้ง เยียม กีตู่ เญย เฮมียน หฒิว ธ้วด ต้าย เญย ฌัง-หล่าง.

7มป่า เยีย บัว เซ ฮนั้ง เนีย-อ๋ง หย่า ม่าย น้าย หญู่ง จ๋าย เญย กะน้าย ตั๊บ เจี๊ยน กะญั์ว, ปุน ธีง โฮล เจี๋ย เญย ต้ม ชะ เซ เยียม ทิน-ฮู่ง ต้าย, ไม้ เฒ์ย เยียม เยีย บัว ต้าย.

8เยีย บัว หฒุ หญู่งๆ ขวน น่าน มป่า ไม้ เซวย. ม่าย เฒี่ยง โห่ เยีย บัว ไม้ ฮิ้ว ตุ๊ ฮนั้ง หาย นอ โหฒว มป่า หธ่อ ม่าย ลั่ม ฮนั้ม เญย.

9หฒุ เมี่ยน โหฒว โตะ มป่า ทิน-ฮู่ง ไม้ กวั่ง เยีย บัว. หฒุ เบ๊าะ คีง มป่า ไม้ ไต่.

10เยีย บัว เญย ซิน หฒั่นๆ ปวั้ง หฒุ ไฮ่ ไต่ เญย สี่ ฮนั้ง เยซู หฒุ ไต่ นอ, เยีย บัว เญย ซิน ฯฒฯ ปุน เมี่ยน เฒียะ ตุ๊ เยซู เฒี่ยง เจี๊ยน เญย.

11เยีย บัว เฒี่ยง เสย หฒั่ง หฒั่นๆ เหว่ย เยซู หฒุ ปวั้ง ไฮ่ ไต่ เญย สี่ เหว่ย ปุน นิ่น เญย แหม่ง เยียม เยีย บัว ไฮ่ ไต่ เญย ซิน ปิ๋ว เม่ง ธ้วด ต้าย.

12ฮนั้ง หน่าย, ไต่ เญย ชะ เยียม เยีย บัว กะญั์ว โหฒว กง, มป่า ปุน เมี่ยน ตุ๊ เฒี่ยง เจี๊ยน เญย ชะ เยียม เม่ย บัว กะญั์ว โหฒว กง.

13เยีย บัว ม่าย เฮญี้ยว เสียน ฮนั้ง เฟี้ย เจี๊ยน กีง-โซว วั้ว เต้า ก๊อง นอ. นิ่น ก๊อง, “เหว่ย หฒุ เยีย เสียน, เยีย หธีง ต้าย ก๊อง.” เยีย บัว หย่า เสียน ฯฒฯ ก๊อง.

14เยีย บัว ฮิ้ว ตุ๊ ปุน เฒี้ยว เยซู นั่ง ต้าย วั้ว เต้า หย่า อ๋อย ปุน เยีย บัว ฮนั้ง เยซู นอ นั่ง ต้าย, ต้อ เยีย บัว เหธา เจี๊ยน เม่ย บัว ล่ม ฑ่อย มี่ง เยียม นิ่น เญย หฑะเฮมียน.

15น้าย เหยียด ฒู้ง เซ เหว่ย ปุน เม่ย บัว ตุ๊ หลง. ทิน-ฮู่ง เญย เอน ฯฒฯ มี่ง เถา เมี่ยน ธั้ม ปุน เมี่ยน จา ธั้ม แล์ง ฒี่ง ทิน-ฮู่ง. ฮนั้ง หน่าย, เมี่ยน ธั้ม จา ท่าย ทิน-ฮู่ง.

16เหว่ย น้าย บัว ไม้ หนัม เฮญี้ยว. ไม้ กุ๊น บัว เญย ซิน กุ๊น โหฒว กุ๊น เฮย เจี๊ยน เหฌี่ย, มป่า บัว เญย เฮญี้ยว เหยียด ฮนอย เป๊ย เหยียด ฮนอย เซียง.

17บัว ปวั้ง หฒุ ตั้ง ป๊า น้าย เต๋ย ไฝ-ฟิ้ว สี่ อ๋อย ปุน บัว ตุ๊ เหยียด ลิ์ว เญย ฌัง-หล่าง, เลี่ยม ไม้ ลั่ม เป๊ย ต๋อง เญย ฌัง-หล่าง.

18เหว่ย หฒุ บัว ไม้ โต้ว หมั่ง ตุ๊ ปวัด เญย หาย หญู่ง. ขูง โต้ว หมั่ง ไม้ ปวัด เญย ฮนั้ง. หมั่ง ตุ๊ ปวัด เญย วั้ว เต๋ย ไฮ่ เจี๋ย เหฑ่ง, มป่า หมั่ง ไม้ ปวัด เญย เหยียด ลิ์ว เยียม.

← Chapter 3 Jump to: Chapter 5 →