Hebrews 1

Mien Bible (Thai Script) © Thailand Bible Society, 2007

Jump to: Chapter 2 →

1โล์- ฮนอย ทิน-ฮู่ง หล่ง นิ่น เญย หฒวัง โต่ว หว่า เมี่ยน หย่า หล่ง ธั้ม-หญู่ง หฒะเอ๋ย เหธา บัว เญย อง-ถาย บัว ก๊อง ธั้ม-หฑุ่น.

2มป่า เยียม น้าย เต๋ย เซ้ด เมว์ย เญย ฮนอย ทิน-ฮู่ง หล่ง นิ่น เญย ตอน เหธา บัว ก๊อง. น้าย เต้า ตอน ทิน-ฮู่ง หล่ง เหฒย หม่าน หมวด หย่า พ้าย นิ่น หฑิบ หม่าน หมวด เป๋น นิ่น เญย จา-ตี้ง.

3นิ่น แอ๊ง ทิน-ฮู่ง เญย ฌัง-หล่าง, หย่า ฒวั้ง เหฑ่ง ทิน-ฮู่ง, แอ๋ง หล่ง นิ่น ม่าย หลี่ง เญย หว่า โป้ว เจี๊ยน หม่าน หมวด. นิ่น หฑาว ลิ์ว ป้าม เมี่ยน เญย ฒุ์ย, ฆะฮ้า เยียม ทิน-ต้อง เฒว์ย เจี๊ยน ม่าย ฮ่าง ต้าว เญย ทิน-ฮู่ง เญย บย่าว แหมง.

4น้าย เต้า ตอน ตุ๊ โหฒว เก้า โฮล เจี๋ย ฟิน-เมี่ยน ด่ง ทิน-ฮู่ง ธ้วด ปุน นิ่น วั้ว นอม บั๋ว เก้า โฮล เจี๋ย หฒวัง ฟิน-เมี่ยน เญย บั๋ว.

5เหว่ย หฒุ ทิน-ฮู่ง ไม้ บั๋ว เจี๋ย หาย เต้า ฟิน-เมี่ยน, “เม่ย โหฒว เยีย เญย ตอน. อี้ ฮนอย เยีย เป๋น เม่ย เญย เตีย.” นิ่น หย่า ไม้ นุ เจี๋ย หาย เต้า ฟิน-เมี่ยน ก๊อง, “เยีย อ๋อย โหฒว นิ่น เญย เตีย. นิ่น อ๋อย เป๋น เยีย เญย ตอน อ๊ะ.”

6แอ๋ง ม่าย หฑุ่น, ต้ง ทิน-ฮู่ง อ๋อย พ้าย นิ่น เญย ตอน-หละเก๊า เปียะ ป้าม เกน วั้ว หฒั่น, นิ่น ก๊อง, “ทิน-ฮู่ง เญย หฒวัง ฟิน-เมี่ยน อ๋อย หฒุ ป๋าย นิ่น.”

7ก๊อง เถา ฟิน-เมี่ยน วั้ว หฒั่น ทิน-ฮู่ง ก๊อง, “ทิน-ฮู่ง ปุน นิ่น เญย ฟิน-เมี่ยน เป๋น หฑยาว, หย่า ปุน นิ่น เญย โปว เป๋น โต์ว-เบียด.”

8มป่า ก๊อง เถา นิ่น เญย ตอน วั้ว หฒั่น, ทิน-ฮู่ง ก๊อง, “ทิน-ฮู่ง อ่า, เม่ย เญย เหว่ย อ๋อย เหยียด ลิ์ว เยียม เถา หม่าน โก๊ว หม่าน ต่อย. เม่ย หย่า อ๋อย แป้ง ฟิม เญย กุ๊น เม่ย เญย กั๊วะ.

9โหฒว หอบ เญย เจ๊า เม่ย ฮนั้ม, โหฒว เอ๊าะ เญย เม่ย ฑอง. เหว่ย น้าย, ทิน-ฮู่ง, ต้ง เม่ย เญย ทิน-ฮู่ง, หล่ง ออน เมี่ยน เญย โย่ว เฮยี้ยด เม่ย, ออน เม่ย โหฒว เก้า โฮล เจี๋ย เม่ย เญย เหยียด ฒู้ง ต่อย.”

10ทิน-ฮู่ง หย่า ก๊อง, “เฒี้ยว อ่า, เยียม กอน วั้ว หฒั่น เม่ย เหฒย ธ้วด เดา เญย กอน-โด๊ะ ต้าย, หย่า หล่ง กั้น เญย ปั์ว เหฒย ธ้วด ลู่ง.

11ลู่ง เดา ฒู้ง อ๋อย หฒุ เหมียด, มป่า เม่ย เหยียด ลิ์ว เยียม. ลู่ง เดา อ๋อย ฮนั้ง ลุย-โหว นอ, โล์ เหฑ่ง.

12เม่ย อ๋อย เฒาะ ลู่ง เดา หฌุ่น เจี๊ยน ฮนั้ง หฌุ่น ต้ม ลุย. ลู่ง เดา ฯฒฯ ก๊อย เหยี่ยน ฮนั้ง เหยี่ยน ลุย มป่า เม่ย เหยียด ลิ์ว ฮนั้ง โล์ วั้ว นอ. เม่ย เญย หฮญัง-เจ๊ย เหยียด ลิ์ว หย่า ไม้ จ่ม.”

13ทิน-ฮู่ง ไม้ บั๋ว เจี๋ย หาย เต้า ฟิน-เมี่ยน, “เฒว์ย เจี๊ยน เยีย เญย บย่าว แหมง, ฒั้ว เยีย ปุน เม่ย เญย วิน-วั้ง เหฌี่ย เม่ย เญย เหฒา-เดี๊ย โหฒว หลอง เหฒา เญย ต๋อง.”

14วั้ว หญู่ง, ฟิน-เมี่ยน ฮนั้ง หาย นอ? ฟิน-เมี่ยน ไม้ ม่าย ซิน, เมี่ยน หย่า หมั่ง ไม้ ปวัด. นิ่น บัว หย่า ฟู-สู ทิน-ฮู่ง. ทิน-ฮู่ง พ้าย นิ่น บัว มี่ง เถง อ๋อย ตุ๊ เหฌียว เญย เมี่ยน.

Jump to: Chapter 2 →