Hebrews 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1ทิน-ฮู่ง แล์ง ปุน บัว ตุ๊ เปียะ นิ่น ฮิด ขวน เญย ต๋อง วั้ว เต๋ย หว่า หธ่อ ไม้ แก้ง เจี๋ย. วั้ว หญู่ง, บัว อ๋อย หฒุ ไฝ ฟิม, เหฑีย เม่ย บัว ม่าย หาย เต้า มี่ง ไม้ เถา.

2เยีย บัว ไฮ์ ลิ์ว คู้ เฝียน ฮนั้ง นิ่น บัว ไฮ์ นอ. มป่า นิ่น บัว ไฮ์ ลิ์ว เญย คู้ เฝียน ไม้ เถง หาย หญู่ง นิ่น บัว, เหว่ย หฒุ ไฮ์ ลิ์ว นิ่น บัว หย่า ไม้ เสียน.

3บัว เสียน เญย เมี่ยน หฒะเก้ง ตุ๊ เปียะ ทิน-ฮู่ง แล์ง ปุน เญย ฮิด ขวน ต๋อง. วั้ว นอม ฮิด ขวน ต๋อง เซ ต้ง ทิน-ฮู่ง ก๊อง, “เหว่ย น้าย เยีย เฉีย เจี์ย ฯฒฯ โฮ้ว เจี๊ยน ก๊อง, “นิ่น บัว เหยียด ลิ์ว ไม้ ตุ๊ เปียะ เยีย เญย ฮิด ขวน ต๋อง.” ‘นิ่น บัว เหยียด ลิ์ว ไม้ ตุ๊ เปียะ เยีย อ๋อย ปุน นิ่น บัว ฮิด ขวน เญย ต๋อง.’” ทิน-ฮู่ง ฮนั้ง น้าย นอ ก๊อง ไม้ กุ๊น เยียม นิ่น เหฒย ลู่ง เหฒย เดา วั้ว หฒั่น นิ่น โหฒว เหฒียง กง หมี่ อ๊ะ.

4เหว่ย หฒุ เยียม กีง-โซว ม่าย นอม ต๋อง ก๊อง, “ตะเธี้ยด ฮนอย วั้ว ฮนอย ทิน-ฮู่ง ตี้ง เหฌี่ย นิ่น เญย เหยียด ฒู้ง กง ฮิด ขวน.”

5แอ๋ง ฮนั้ง อะจัง ก๊อง ลิ์ว วั้ว เต๋ย หว่า, “นิ่น บัว เหยียด ลิ์ว ไม้ ตุ๊ เปียะ เยีย เญย ฮิด ขวน ต๋อง.”

6ไฮ์ คู้ เฝียน ด่าง วั้ว เต๋ย ไม้ ตุ๊ เปียะ ทิน-ฮู่ง เญย ฮิด ขวน ต๋อง เหว่ย หฒุ นิ่น บัว ไม้ หมวัง หว่า. มป่า ม่าย เต๋ย ตุ๊ เปียะ เญย.

7เหว่ย น้าย, ทิน-ฮู่ง แอ๋ง ตี่ง นอม ฮนอย เห่ว “อี้ ฮนอย.” ฆะฮ้า เล่า เญย, ทิน-ฮู่ง หล่ง ดาวิด ฮู่ง ก๊อง วั้ว นอม ฮนอย, ฮนั้ง ก๊อง เจี๋ย วั้ว เต๋ย กีง-โซว เญย หว่า, “สี ก๊อง เม่ย บัว อี้ ฮนอย ไฮ์ ทิน-ฮู่ง ก๊อง เญย หว่า, ไม้ ตู๋ง โหฒว เฮญี้ยว แหง่ง.”

8สี ก๊อง โยซูวา ปุน นิ่น บัว ตุ๊ ฮิด ขวน, ฆะฮ้า ทิน-ฮู่ง ไม้ ก๊อง แอ๋ง กั้น ม่าย นอม ฮนอย.

9ฮนั้ง หน่าย, เหว่ย ทิน-ฮู่ง เญย แปะ ฝีง แอ๋ง กั้น ม่าย นอม ตี้ง กง ฮิด ขวน ฮนอย,

10เหว่ย หฒุ หาย เต้า ตุ๊ เปียะ ทิน-ฮู่ง ปุน เญย ฮิด ขวน ต๋อง, วั้ว เต้า ตุ๊ ตี้ง นิ่น กั้น เญย กง ฮิด ขวน, ฮนั้ง ทิน-ฮู่ง ตี้ง กง ฮิด ขวน วั้ว นอ.

11ฮนั้ง หน่าย, บัว อ๋อย หฒุ เหฌี่ย ชะ โหฒว เหว่ย เปียะ ทิน-ฮู่ง เญย ฮิด ขวน ต๋อง, เหว่ย ไม้ ปุน หาย เต้า ฮนั้ง วั้ว เต๋ย เมี่ยน ไม้ หมวัง หว่า ฯฒฯ ไม้ ตุ๊ เปียะ.

12ทิน-ฮู่ง เญย หว่า เซ นั่ง เญย, ม่าย ชะ เญย, เก้า ไหล่ เจี๋ย เหยียด ฒู้ง อี แหมง ไหล่ เญย หฑุ ด๊าว. ไฮ่ ฑบ เปียะ เถา เฮญี้ยว เหธา ลี่ง ว่วน กั๊บ เญย ต๋อง, บู๊ง-ฟิม เหธา บู๊ง-ต๋าว กั๊บ เญย ต๋อง. ฒู้ง ไฮ่ เซี้ยม ตุ๊ เมี่ยน เฮญี้ยว หญุ่น โหฒว เญย เหธา เฮญี้ยว ฮนั้ม ธ้วด เญย สี่.

13ไม้ ม่าย หาย หญู่ง ปี๋ง ตุ๊ ทิน-ฮู่ง เจี๊ยน. ต๋าว หฑวน หม่าน หมวด เหยียด ฒู้ง เยียม ทิน-ฮู่ง เญย หฑะเฮมียน คอย ฆอย เหฑ่ง. บัว หย่า อ๋อย หฒุ เฒาะ บัว เญย หญู่งๆ ปิ๊น เม่ง บั๋ว นิ่น.

14ฮนั้ง หน่าย, อ๋อย หฒุ เสียน ว้วน บัว เหญี่ยม เญย โต์, เหว่ย หฒุ บัว ม่าย เต้า โหฒว โฮล เญย ต้ม ไซ เมี่ยน เปียะ เถา ทิน-ฮู่ง เญย หฑะเฮมียน, ต้ง ทิน-ฮู่ง เญย ตอน, เยซู.

15บัว เญย ต้ม ไซ เมี่ยน ไม้ เฒ์ย ไม้ ฮิ้ว บัว เมา เญย ต๋อง, เหว่ย หฒุ นิ่น กั้น หย่า หฒุ หญู่งๆ เสย เจี๋ย, ฮนั้ง บัว หฒุ เสย นอ, มป่า นิ่น ไม้ ป์าม ฒุ์ย.

16เหว่ย น้าย บัว อ๋อย หฒุ ปู๋ง หล่าง เญย มี่ง เถา ทิน-ฮู่ง เหธย เอน เญย เหว่ย. เยียม หน่าย บัว เฉียม หฒุ เญย เฒี่ยง โห่ ฯฒฯ ตุ๊ ทิน-ฮู่ง ค้อ-เลี่ยน หย่า เหธย เอน ปุน บัว.

← Chapter 3 Jump to: Chapter 5 →