Hebrews 13

Mien Bible (Thai Script) © Thailand Bible Society, 2007

← Chapter 12 Jump to:

1เม่ย บัว อ๋อย หฒุ หฒั่นๆ ฮนั้ง มั์ว-ต่อย นอ, ล่าน ฮนั้ม ล่าน.

2อ๋อย หฒุ จั๋ง เจี๊ยน หล่ง เฮญี้ยว ฒิบ ไม้ ปวัด เจี๋ย เญย แคะ เมี่ยน. ม่าย เต๋ย เมี่ยน ฒิบ แคะ ฯฒฯ ฒิบ หฒุ ฟิน-เมี่ยน หย่า เลี่ยม ไม้ ฮิ้ว.

3อ๋อย หฒุ จั๋ง เจี๊ยน หฒุ หววน โล่ เญย เมี่ยน ฮนั้ง เม่ย บัว กั้น หย่า เหธา เจี๊ยน นิ่น บัว หฒุ หววน โล่ นอ. หย่า อ๋อย หฒุ จั๋ง เจี๊ยน หฒุ เมี่ยน โหฒว โตะ วั้ว เต๋ย, ฮนั้ง เม่ย บัว กั้น หย่า หฒุ เหธา เจี๊ยน นิ่น บัว เสี่ยว โค้ว.

4เต้าๆ อ๋อย หฒุ ท่าย ตอง จา เญย เล์ย, ขูง หล่ง กั้น เญย เอ๊า โหฆ จวั่ง โหธว เปว๋ย, เหว่ย หฒุ ทิน-ฮู่ง อ๋อย ตี่ง ปวั้ง เลี่ยว เญย เมี่ยน เหธา เหฮยียน เอ๊า เหฮยียน โหฆ เญย เมี่ยน เญย ฒุ์ย.

5ไม้ ตู๋ง ปุน เม้า ญ่าน เญย เจ๊า กุ๊น เม่ย บัว เญย แหม่ง. เม่ย บัว ม่าย เญย, อ๋อย หฒุ ปวั๊ง เฮญี้ยว เหว่ย หฒุ ทิน-ฮู่ง ก๊อง, “เยีย เหยียด ลิ์ว ไม้ เล่ย เม่ย, เหยียด ลิ์ว หย่า ไม้ กวั่ง เม่ย.”

6ฮนั้ง หน่าย บัว อ๋อย หฒุ ปู๋ง ตี่ง เฮญี้ยว ก๊อง, “เถง เยีย วั้ว เต้า เซ เฒี้ยว, เยีย ฯฒฯ ไม้ กั้ม เหฑีย. ป้าม เมี่ยน ไฮ่ โหฒว หาย หญู่ง ปุน เยีย?”

7อ๋อย หฒุ จั๋ง เจี๊ยน ฒิ่น ด่าง ต้อ เม่ย บัว วั้ว เต๋ย เปย๊ย เฒ้ย, ต้ง ฒุ่น ทิน-ฮู่ง เญย โต์-เล์ย ปุน เม่ย บัว หมวัง วั้ว เต๋ย. ฮนั้ม หมั่ง ก๋า นิ่น บัว เยียม เสย หฒั่ง ฮนั้ง หาย นอ เฒี่ยง, ฮนั้ง หาย นอ ไต่. นิ่น บัว ฮนั้ง หาย นอ เสียน, เม่ย บัว อ๋อย หฒุ หฒวด นิ่น บัว เญย หญู่ง เฒ้ย.

8เยซู กีตู่ ไม้ ก๊อย เหยี่ยน. อะฮนอย, อี้ ฮนอย, เหยียด ลิ์ว ฟี่ ฮนั้ง เญย.

9ไม้ ตู๋ง ปุน หาย หญู่ง กั้น หญู่ง เล์ย ต้อ เม่ย บัว ยั่ง ต่อง เจ๊า. อ๋อย หฒุ เขา ทิน-ฮู่ง เญย เอน ปุน เฮญี้ยว ว้วน เซ เก้า หลง เขา หญั่น ฮบ เญย เล์ย-เหญ่ย. เมี่ยน เขา หญั่น ฮบ เญย เล์ย-เหญ่ย เซ ไม้ เถง เหยียด เต๋ย นิ่น บัว.

10บัว ม่าย นอม เหฒี่ย-ต้อง. เยียม หฒั่ง ทิน-ฮู่ง เญย ด๊บ-ลิ่ว ฟู-สู ทิน-ฮู่ง วั้ว เต๋ย ไซ เมี่ยน ไม้ ม่าย เล์ย หญั่น เยียม บัว เญย เหฒี่ย-ต้อง เหฒี่ย เญย กะน้าย.

11ยิวไท เมี่ยน เญย ต้ม ไซ เมี่ยน ต้อ แซง-คู้ เญย ฑย้าม เปียะ เก้า ธีง-เหฑ่ง เจี๋ย วั้ว ฉง เหว่ย ฟิ ฒุ์ย. มป่า แซง-คู้ เญย เซย ต้อ ธ้วด กะเหญี่ย หฒิ ด๊บ-ลิ่ว เธี้ยง ปั๊ว เหฑ่ง.

12เหว่ย น้าย เยซู หย่า เยียม กะเหญี่ย หฒิ ฒี่ง แก้ง เสี่ยว โค้ว เถา ไต่ เหว่ย หล่ง นิ่น กั้น เญย ฑย้าม หฑาว แปะ ฝีง ธีง-เหฑ่ง ต้าย.

13วั้ว หญู่ง, ปุน บัว ธ้วด กะเหญี่ย หฒิ ด๊บ-ลิ่ว เธี้ยง มี่ง เหธา นิ่น หฒุ เตี๊ย ไญ้.

14เหว่ย หฒุ เยียม น้าย ป้าม เกน บัว ไม้ ม่าย เหยียด ลิ์ว ว้วน เญย ฒี่ง, มป่า บัว ล์อ ฆะฮ้า ฮี้ง อ๋อย ต้าย วั้ว นอม ฒี่ง.

15ฮนั้ง หน่าย, บัว อ๋อย หฒุ เขา เยซู หฒั่นๆ หล่ง เธง ทิน-ฮู่ง เญย หว่า เหว่ย โหฒว เหฒี่ย เญย กะน้าย เหฒี่ย ปุน ทิน-ฮู่ง. น้าย เซ หล่ง บัว เญย ฑุ่ย เหญี่ยม นิ่น เญย บั๋ว วั้ว เต๋ย หว่า.

16ไม้ ตู๋ง หละคุ โหฒว คู้ สี่, ล่าน หย่า เถง ล่าน. น้าย เต๋ย สี่ ฯฒฯ เป๋น เหฒี่ย เญย กะน้าย ปุน ทิน-ฮู่ง หอบ เฮญี้ยว.

17อ๋อย หฒุ หมวัง เม่ย บัว เญย เปย๊ย เฒ้ย หย่า บัวะ นิ่น บัว กุ๊น. นิ่น บัว หฒั่นๆ โก๋ว เจี๊ยน เม่ย บัว เหว่ย หฒุ นิ่น บัว อ๋อย หฒุ ก๊อง เม่ง นิ่น บัว โหฒว เญย กง บั๋ว ทิน-ฮู่ง. อ๋อย หฒุ หมวัง นิ่น บัว เหว่ย ปุน นิ่น บัว เฌียน-โย่ว เญย โหฒว นิ่น บัว เญย กง. ไม้ เฒย แอ๊ะ, นิ่น บัว เฑ่า. น้าย หย่า ไม้ เถง หาย หญู่ง เม่ย บัว.

18โท้ เถง เยีย บัว เต๋า เก๋า. เยีย บัว ฮิ้ว ตี่ง เยีย บัว เญย เฮญี้ยว ธีง-เหฑ่ง, หฒั่นๆ ขูง อ๋อย โหฒว หอบ เญย เจ๊า ฮนั้ง.

19เยีย หย่า ชะ โท้ เม่ย บัว เต๋า เก๋า โจ้ว ทิน-ฮู่ง ปุน เยีย เซี้ยบๆ เญย ไฮ่ หฑวน เม่ย บัว หน่าย.

20โท้ เหธย แป้ง ออน เญย ทิน-ฮู่ง, ต้ง บัว เญย เฒี้ยว เยซู ไต่ มี่ง ปุน นิ่น นั่ง ต้าย วั้ว เต้า, ปุน เม่ย บัว ตุ๊ หญู่งๆ หลง เหว่ย เอย เจี๊ยน นิ่น เญย เอ๋ย โหฒว. หย่า โท้ ทิน-ฮู่ง หล่ง เยซู กีตู่ เยียม บัว กะญั์ว ปุน บัว โหฒว หญู่งๆ หอบ นิ่น เญย เฮญี้ยว. เยซู กีตู่ หล่ง นิ่น เญย ฑย้าม เหลียบ เจี์ย เหยียด ลิ์ว เยียม เญย แหง่ง หว่า หย่า โหฒว โก๋ว ปะกี ยู่ง เญย ต้ม เฒี้ยว. บัว อ๋อย หฒุ เหยียด ลิ์ว เธง นิ่น เถา หม่าน โก๊ว หม่าน ต่อย. อาเมน.

22หฒวัง ก๋อ-โย์ว อ้า! เยีย โท้ เม่ย บัว หมวัง หลง เยีย ขวิน เม่ย บัว น้าย เต๋ย หว่า, เหว่ย หฒุ เยีย เฟี้ย ปุน เม่ย บัว น้าย เฒ้ย เฝียน เซ ไม้ หนั่ง ด๊าว.

23เยีย อ๋อย เม่ย บัว ฮิ้ว ตุ๊ บัว เญย โย์ว, ทิโมไท, ตุ๊ ปู๋ง ธ้วด โล่ ต้าย อ๊ะ. สี ก๊อง นิ่น เถา เซี้ยบ เต๋ย นอ, นิ่น ไฮ่ เหธา เยีย มี่ง หมั่ง เม่ย บัว.

24บั๋ว เม่ย บัว เญย หฒวัง เปย๊ย เฒ้ย เหธา ทิน-ฮู่ง เญย เมี่ยน เหยียด ฒู้ง, เยีย บัว จั๋ง เถา นิ่น บัว. เยียม อิตาลี ต้าย เญย ก๋อ-โย์ว หย่า จั๋ง เถา เม่ย บัว.

25โท้ ทิน-ฮู่ง เหธย เอน ปุน เม่ย บัว หฒวัง เมี่ยน.

← Chapter 12 Jump to: