Hebrews 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1เยีย บัว ก๊อง น้าย ติ้ว เจ๊า เก้า หล่ง เจี๊ยน เจี๋ย เญย เซ, บัว ม่าย น้าย หญู่ง ต้ม ไซ เมี่ยน เฒว์ย เจี๊ยน ทิน-ต้อง, เก้า โฮล เจี๋ย วั้ว เต้า เญย เหว่ย บย่าว แหมง ปูง.

2นิ่น เยียม วั้ว นอม สีง ติ่น กะญั์ว, เซ เยียม หฒั่ง เฒี้ยว เญย เฒียน วั้ว นอม ด๊บ-ลิ่ว, โหฒว ต้ม ไซ เมี่ยน เญย กง. น้าย นอม ด๊บ-ลิ่ว ไม้ เฒ์ย ป้าม เมี่ยน ธอง, เซ เฒี้ยว ธอง ต้าย.

3เต้าๆ ต้ม ไซ เมี่ยน เซ พ้าย ต้าย เหว่ย ต้อ ฒี่ง เหญ่ย เหธา เหฒี่ย เญย กะน้าย มี่ง ฝูง ปุน ทิน-ฮู่ง. ฮนั้ง หน่าย, น้าย เต้า ต้ม ไซ เมี่ยน หย่า อ๋อย หฒุ ม่าย กะน้าย ฝูง ปุน ทิน-ฮู่ง.

4สี ก๊อง นิ่น เยียม ป้าม เกน นอ, นิ่น ฒู้ง ไม้ โหฒว ไซ เมี่ยน เหว่ย หฒุ ม่าย ไซ เมี่ยน เอย เจี๊ยน เล์ย-หลัด ฝ่ง ห่อ ฒี่ง เหญ่ย หมี่ อ๊ะ.

5น้าย เต๋ย ไซ เมี่ยน โหฒว เญย กง เซ ขูง โหฒว เยียม ทิน-ต้อง ม่าย เญย หญู่ง เฒ้ย เหธา โมว เฒ้ย ฮนั้ง. โมเซ หย่า ฟี่ ฮนั้ง เญย. นิ่น อ๋อย โหฒว หฒั่ง เฒี้ยว เญย ด๊บ-ลิ่ว วั้ว หฒั่น, ทิน-ฮู่ง หัด นิ่น, “อ๋อย หฒุ ไฝ ฟิม โหฒว หญู่งๆ เอย เหฑ่ง ฒิ่น ด่าง เยียม บง บั๋ว เม่ย เญย หญู่ง เฒ้ย.”

6มป่า อี้ หฒั่น เยซู โหฒว ไซ เมี่ยน เญย กง เก้า ฮลัง นิ่น บัว เญย, ฮนั้ง นิ่น โหฒว บุด๋ง เมี่ยน เถง ทิน-ฮู่ง เหธา นิ่น เญย เมี่ยน เหลียบ เจี์ย เญย แหง่ง หว่า เซ เก้า ฮลัง, เหว่ย หฒุ น้าย เต๋ย แล์ง แหง่ง หว่า เญย กอน-โด๊ะ เซ เก้า หลง.

7สี ก๊อง แล์ง ตะเยี้ยด หฑุ่น เญย แหง่ง หว่า ตุ้น ยุ่น นอ, ไม้ หฒุ แอ๋ง เหลียบ ตะเหญ่ย หฑุ่น แหง่ง หว่า.

8มป่า ทิน-ฮู่ง เฆ่ม นิ่น เญย เมี่ยน โหฒว ต่อง. วั้ว หฒั่น นิ่น ก๊อง, “เฒี้ยว ก๊อง, ‘ฮนอย-เหญียะ อ๋อย เถา, เยีย อ๋อย เหธา อิสะลาเอน เญย เฒ้ย-ฟุน เหธา ยูดา เญย เฒ้ย-ฟุน เหลียบ เจี์ย เซียง-แหง่ง หว่า.

9เยีย อ๋อย เหลียบ เจี์ย เญย แหง่ง หว่า เซ ไม้ ฮนั้ง เยีย เหธา นิ่น บัว เญย อง-ถาย บัว เหลียบ เญย, ต้ง เยีย นั้น เจี๊ยน ปั์ว เคน นิ่น บัว ธ้วด อียิบ เต่ย-ปูง วั้ว หฒั่น นอ. นิ่น บัว ไม้ เอย เจี๊ยน เยีย เหธา นิ่น บัว เหลียบ เจี์ย เญย แหง่ง หว่า, เยีย ฯฒฯ ไม้ กุ๊น นิ่น บัว อ๊ะ.’ น้าย เซ เฒี้ยว ก๊อง เญย หว่า.

10เฒี้ยว ก๊อง, ‘วั้ว เต๋ย ฮนอย-เหญียะ เจี๋ย ลิ์ว, เยีย อ๋อย เหธา อิสะลาเอน เญย เฒ้ย-ฟุน เหลียบ เจี์ย เญย แหง่ง หว่า เซ ฮนั้ง น้าย. เยีย อ๋อย เฒาะ เยีย เญย เล์ย-หลัด ฟับ เจี๊ยน นิ่น บัว เญย บะฑิว-กอน, หย่า เฟี้ย เจี๊ยน นิ่น บัว เญย เฮญี้ยว กะญั์ว. เยีย ฯฒฯ โหฒว นิ่น บัว เญย ทิน-ฮู่ง, นิ่น บัว หย่า โหฒว เยีย เญย แปะ ฝีง.

11นิ่น บัว หาย เต้า ไม้ หฒุ หฌาว นิ่น เญย ล์าง หฒั่ง เมี่ยน ไฟ หฌาว นิ่น เญย ก๋อ-โย์ว, “เม่ย อ๋อย หฒุ ฮิ้ว ตุ๊ เฒี้ยว.” เหว่ย หฒุ เยียม โหฒว ไฝ เจี๋ย วั้ว เต๋ย เถา โหฒว โฮล เจี๋ย วั้ว เต๋ย, นิ่น บัว เหยียด ฒู้ง อ๋อย ฮิ้ว ตุ๊ เยีย.

12เยีย อ๋อย กวั่ง นิ่น บัว โหฒว เญย หว่าย สี่, หย่า ไม้ จั๋ง เถา นิ่น บัว โหฒว เญย ฒุ์ย.’”

13ทิน-ฮู่ง ก๊อง เถา เซียง-แหง่ง หว่า ฯฒฯ ปุน ต้าว หฑุ่น เญย แหง่ง หว่า เจี๋ย หมี่ อ๊ะ. หาย หญู่ง เจี๋ย เฒี่ยง โห่ หย่า โล์, ไม้ เล่า ฯฒฯ หฒุด เหฑ่ง อ๊ะ.

← Chapter 7 Jump to: Chapter 9 →