Hebrews 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เสียน กีตู่ เญย ก๋อ-โย์ว อ่า, เม่ย บัว เป๋น ทิน-ฮู่ง เห่ว ต้าย เญย เมี่ยน. อ๋อย หฒุ ฮนั้ม เถา เยซู, ต้ง หฒิว บัว เหญี่ยม เญย เจ๊า โหฒว กง-โฒ่ หย่า โหฒว ต้ม ไซ เมี่ยน วั้ว เต้า.

2เยซู เหฒียบ ฒัวะ เญย โหฒว พ้าย นิ่น ต้าย วั้ว เต้า เญย กง, ฮนั้ง โมเซ เหฒียบ ฒัวะ เญย เหว่ย ทิน-ฮู่ง เญย เปย๊า ฒง เมี่ยน โหฒว กง.

3เยซู หย่า ผุย ตุ๊ เมี่ยน ท่าย เก้า ธั้ม โมเซ, ฮนั้ง ก๊ม เปย๊า หฒั่ง ตุ๊ เมี่ยน ท่าย นิ่น เก้า ธั้ม ท่าย นิ่น ก๊ม เญย เปย๊า.

4โม์ว นอม เปย๊า มต้าย ม่าย ล่าน เมี่ยน ก๊ม. มป่า หม่าน หมวด เซ ทิน-ฮู่ง กั้น เหฒย ต้าย.

5โมเซ เหฒียบ ฒัวะ เญย โหฒว โปว เถง ทิน-ฮู่ง เญย เปย๊า ฒง เมี่ยน เหว่ย โหฒว ฒอง-เหฒง ก๊อง ทิน-ฮู่ง ฆะฮ้า ฮี้ง อ๋อย ก๊อง เญย สี่.

6มป่า กีตู่ โหฒว ตอน เหฒียบ ฒัวะ เญย กุ๊น ทิน-ฮู่ง เญย เปย๊า ฒง เมี่ยน. สี ก๊อง บัว ปู๋ง หล่าง เสียน ว้วน บัว ม่าย ลั่ม ฮนั้ม อ๋อย ตุ๊ เญย, บัว ฯฒฯ เป๋น ทิน-ฮู่ง เญย เปย๊า ฒง เมี่ยน.

7วั้ว หญู่ง, ฮนั้ง สีง ลี่ง ก๊อง นอ, “สี ก๊อง เม่ย บัว อี้ ฮนอย ไฮ์ ทิน-ฮู่ง ก๊อง เญย หว่า,

8ไม้ ตู๋ง โหฒว เฮญี้ยว แหง่ง ฮนั้ง เม่ย บัว เญย อง-ถาย เยียม เต่ย-ปูง-ฮวาง แหง่ง เจี๊ยน เสย ทิน-ฮู่ง วั้ว หฑุ่น นอ.

9เฝย เหฒียบ หฮญัง กะญั์ว เม่ย บัว เญย อง-ถาย ปวัด เยีย โหฒว เญย เจ๊า, มป่า นิ่น บัว หธ่อ ธัวะ เยีย, เสย เยีย.

10เยีย ฯฒฯ โน์ว ไห่ วั้ว ต่อย เมี่ยน หย่า ก๊อง, ‘นิ่น บัว เญย เฮญี้ยว หฒั่นๆ ไม้ อ๋อย กัน เยีย. นิ่น บัว หย่า ไม้ ฮิ้ว ตุ๊ เยีย เญย เจ๊า.’

11เยีย เฉีย เจี์ย ไห่, ฯฒฯ โฮ้ว เจี๊ยน ก๊อง, ‘นิ่น บัว เหยียด ลิ์ว ไม้ ตุ๊ เปียะ เยีย เญย ฮิด ขวน ต๋อง.’”

12หฒวัง ก๋อ-โย์ว อ่า, อ๋อย หฒุ ไฝ ฟิม, เยียม เม่ย บัว หน่าย ไม้ ตู๋ง ปุน หาย เต้า ม่าย เอ๊าะ เฮญี้ยว, ไม้ เสียน ฯฒฯ เล่ย เฒี่ยง เจี๊ยน เญย ทิน-ฮู่ง.

13เม่ย บัว อ๋อย หฒุ ฮนอยๆ ล่าน ขวิน ล่าน, ตะฟ่าน หธ่อ ม่าย ต้ง เมี่ยน เห่ว, “อี้ ฮนอย” เญย ฮนอย, เหว่ย ไม้ ปุน เม่ย บัว หาย เต้า หฒุ ฒุ์ย ดั๊ว นิ่น เฮญี้ยว แหง่ง.

14สี ก๊อง บัว เสียน ว้วน เถา ต้าว เถา เมว์ย ฮนั้ง เยียม กอน เสียน วั้ว นอ, บัว ฯฒฯ เหธา กีตู่ ม่าย ป่วน.

15กีง-โซว ก๊อง, “สี ก๊อง เม่ย บัว อี้ ฮนอย ไฮ์ ทิน-ฮู่ง ก๊อง เญย หว่า, ไม้ ตู๋ง โหฒว เฮญี้ยว แหง่ง ฮนั้ง เม่ย บัว เญย อง-ถาย แหง่ง เจี๊ยน ทิน-ฮู่ง วั้ว หฑุ่น นอ.”

16ไฮ์ ทิน-ฮู่ง เญย หว่า มป่า หธ่อ ธัวะ นิ่น วั้ว เต๋ย เซ ต้ง หาย เต๋ย? ต้ง โมเซ ต้อ ธ้วด อียิบ เต่ย-ปูง วั้ว เต๋ย เหยียด ฒู้ง ไม้ เฒ์ย?

17ทิน-ฮู่ง โน์ว เฝย เหฒียบ หฮญัง วั้ว เต๋ย ต้ง หาย เต๋ย? ต้ง ป์าม ฒุ์ย หฒุ กวั่ง เซย เยียม เต่ย-ปูง-ฮวาง วั้ว เต๋ย ไม้ เฒ์ย?

18ต้ง ทิน-ฮู่ง โฮ้ว เจี๊ยน ก๊อง, “นิ่น บัว เหยียด ลิ์ว ไม้ ตุ๊ เปียะ เยีย อ๋อย ปุน นิ่น บัว ฮิด ขวน เญย ต๋อง” วั้ว เต๋ย หว่า, นิ่น ก๊อง หาย เต๋ย เมี่ยน? เซ ต้ง แหง่ง เจี๊ยน ไม้ หมวัง นิ่น วั้ว เต๋ย.

19ฮนั้ง หน่าย, บัว ฮิ้ว ตุ๊ นิ่น บัว ไม้ ตุ๊ เปียะ ฮิด ขวน เญย ต๋อง เซ หลาย นิ่น บัว ไม้ เสียน.

← Chapter 2 Jump to: Chapter 4 →