1 Chronicles 10

Jinghpaw Common Language Bible © Bible Society of Myanmar, 2009

← Chapter 9 Jump to: Chapter 11 →

1Hpilisti masha ni gaw Israela masha ni hpe Gilaboa Bum ntsa e sa gasat ma ai. Dai yang e Israela masha ni law law sat kau ai hkrum ma ai; ngam nga ai shanhte hta na Hkawhkam Shawlu hte shi a kasha ni du hkra hprawng lawm mat ma ai.

2Rai ti mung Hpilisti masha ni shanhte hpe hkan shachyut dep nna Shawlu a kasha ni rai nga ai Yonahtan, Abinadab hte Mahkishua hte hpe sat kau ma ai.

3Dai gasat gala ai gaw Shawlu a grup grup e laja lana rai nga ai majaw shi hkum nan hpyen wa a ndan pala wa jung hkrum wu ai hte grai yu matsan dum na zawn hkala hkrum da wu ai.

4Shi gaw shi a laknak hpai ya ai shabrang wa hpe, “Na a nhtu shaw la nna ngai hpe sat kau e, shaloi ndai n kam n sham ai Hpilisti masha ni ngai hpe n yu roi ai hte n sat kau lu mu ga,” ngu nna tsun wu ai. Rai ti mung dai shabrang wa mahtang shing re ai amu galaw na matu gaw grai hkrit gari nga wu ai. Shaloi Shawlu gaw shi a nhtu shaw la nhtawm shi hkum nan dai hta abraw si mat wu ai.

5Shawlu si mat sai hpe dai shabrang wa mu jang, shi mung shi a nhtu hta abraw si mat wu ai.

6Dai rai nna Shawlu hte shi a shadang sha masum hte yawng rau sha si mat ma ai rai nna, shi a amyu matu ni galoi mung n up lu nga masai.

7Ya Israela hpyen luksuk ni hprawng htaw mat wa nna Shawlu hte shi a shadang sha ni sat kau ai hkrum masai lam hpe Yezrela kadit e nga ai Israela masha ni na jang, shanhte a mare ni hpe kau da nhtawm hprawng mat wa ma ai. Dai hpang Hpilisti masha ni du sa nhtawm shanhte hpe madu la kau nga ma ai.

8Hpilisti masha ni gaw majan a hpang shani e si mang ni hta na lanep hpyu la na nga, pru sa wa mu yang, Shawlu a moi mang hte shi a kasha masum hte gaw Gilaboa Bum ntsa e si taw nga ai hpe shanhte mu ma ai.

9Shanhte gaw Shawlu a baw daw la nhtawm shi a hpyen palawng hpe mung raw la nna shanhte a hpara sumla ni hpe mung, shanhte a mung masha ni hpe mung dai awng padang shiga a lam tsun dan na matu dai arai ni hte hpawn Hpilisti mung ting de kasa ni hpe shangun dat ma ai.

10Shi a laknak ni hpe shanhte a htingnu langai mi hta tawn da nhtawm shi a baw hpe chyawm gaw shanhte a karai Dagon a htingnu kata hta noi da nga ma ai.

11Hpilisti masha ni Shawlu hpe shing di kau manu ai lam hpe Gilead mung na Yabesha masha ni na ma yang,

12Magrau grang htum ai masha ni sa nna Shawlu hte shi a shadang sha ni a moi mang ni hpe shayu la nhtawm Yabesha mare de la wa ma ai. Shanhte gaw dai yang na wamyi hpun npu e shanhte hpe lup makoi nhtawm sanit ya tup lusha gam nga ma ai.

13Shawlu gaw dai Madu hta sadi n dung nga ai majaw shi si mat sai. Shi gaw dai Madu a hkang da ai ga hpe n madat ai sha shi hpe lam woi la na matu,

14Dai Madu hpe san la na malai si mat sai wenyi minla ni hpe san wu ai majaw dai Madu gaw shi hpe sat kau nhtawm mungdan hpe mung Yese a kasha Dawi a lata de ap kau ya wu ai.

← Chapter 9 Jump to: Chapter 11 →