1 Chronicles 11

Jinghpaw Common Language Bible © Bible Society of Myanmar, 2009

← Chapter 10 Jump to: Chapter 12 →

1Israela amyu masha ni yawng hte gaw Hebron mare e nga ai Dawi kaw sa du nhtawm shi hpe, “Anhte gaw na a hkum shan, na a sai nan rai nga ga ai.

2Lai sai aten, Shawlu gaw anhte a hkawhkam naw rai nga ai aten kaw nna pyi, Israela amyu masha ni hpe majan pa hkan nang woi awn yu nit dai; nang mung dai Madu a amyu masha ni hpe woi awn nna shanhte hpe up hkang ai wa tai wa na mung, shi nang hpe ga sadi jaw da nga nit dai,” ngu nna tsun ma ai.

3Dai rai nna Israela ningbaw ni yawng Hebron mare de Hkawhkam Dawi kaw du sa ma ai. Shi mung shanhte hte chyoi pra ai ga shaka galaw nna jinghku hku tawn wu ai; shing rai shanhte gaw shi hpe namman jaw ya nhtawm dai Madu gaw Samuela hku nna ga sadi jaw da nu ai hte maren, shi mung Israela a hkawhkam tai wa nu ai.

4Hkawhkam Dawi hte Israela masha ni yawng gaw Yerusalem mare hpe sa htim gasat ma ai. Dai mung hpe Yebu ngu nna shawng sa nga ai Yebusi masha ni mung dai mare e naw nga nga ma ai.

5Dai Yebusi masha ni chyawm gaw mare kata de galoi mung shang lu ai n rai, ngu nna Dawi hpe tsun ma ti mung, Dawi mahtang shanhte a Ziun Hpyen Dap hpe gasat dang la kau nhtawm dai mare gaw “Dawi a Mare” ngu nna gumhkawng wa sai.

6Dawi gaw, “Yebusi masha langai mi hpe shawng sat lu ai wa gaw hpyen luksuk hpe up hkang ai wa tai lu na ra ai!,” ngu nna tsun wu ai hte maren, Zeruia a kasha Yoab gaw shawng woi gasat lu ai wa rai nna up hkang du tai wa sai.

7Dawi gaw hpyen dap kata e sa nga nga ai majaw dai mare hpe “Dawi a Mare” ngu nna shamying ma ai.

8Shi gaw kawng a sinpraw maga na lamu ga jahpring bang ai shara kaw nna dai mare hpe shawng de da nga ai; Yoab gaw dai mare a kaga daw mi hpe bai gram lajang da wu ai.

9Chyahtum Chyalai n-gun rawng ai dai Madu gaw Dawi hte rau rai nga ai majaw shi gaw grau grau nna n-gun ja wa nga ai.

10Ndai ni gaw gumhkawng ai Dawi a hpyenla ni a mying jahpan rai nga ai. Dai Madu gaw ga sadi tawn da nu ai hte maren, naw ngam nga ai Israela amyu masha ni hte rau, shi hkawhkam tai wa na matu shanhte karum mu ai hte shi a mungdan hpe n-gun ja shangun ma ai.

11Hakmoni amyu lakung na Yashobeam gaw ningbaw Masum hta na ningshawng ningla rai nga ai. Shi gaw majan langai mi hta masha masum tsa hte hpe shi a nri hte gasat nna shanhte yawng hpe sat kau wu ai.

12Dai hpang Aho amyu lakung na Dodo a kasha Eleaza mung gumhkawng ai share masum hta lawm nga ai.

13Shi gaw Dawi maga de tsap nna Pas Damim majan pa e Hpilisti masha ni hpe gasat wu ai. Israela masha ni hprawng htaw mat wa yang, shi mahtang muk-yaw mam hkaibang yi langai hta nga nga wu ai,

14shaloi shi hte shi a masha ni hkaibang yi ka-ang e rawt tsap nhtawm Hpilisti masha ni hpe gasat wu ai. Dai Madu mung shi hpe awng padang ninglaw kaba jaw wu ai.

15Lani mi hta du sumshi hta na marai masum hte gaw Rehpim Kadit e Hpilisti masha hpung mi dap jung nga yang, Dawi nga ai Adulam ginlawng hku makau na lunghkrung langai mi de sa wa ma ai.

16Dai aten hta Dawi gaw kawng ntsa na hpyen dap e nga nga yang, Hpilisti masha hpung mi mahtang Betlehem mare hpe madu la kau rau nga masai.

17Dawi gaw myit garen ai hte, “Betlehem mare chyinghka makau na hka htung ntsin htinggap mi hpe marai langai ngai e la wa ya na hpe ngai gade sha ra sharawng nga n hka!,” ngu nna tsun wu ai.

18Share gumhkawng ai hpyenla masum hte gaw Hpilisti dap kata de kayen shang wa nhtawm hka htung ntsin ja wa let Dawi hpe wa jaw ma ai. Rai ti mung shi gaw ntsin dai hpe n lu wu ai; shing di na malai dai Madu hpe hkungga nawng ya ai zawn dai hpe shi ru hkaw kau let,

19“Ndai ntsin hpe ngai galoi mung n lu na sai! Dai gaw tinang asak dan ai ndai masha ni a asai lu ai zawn tai na ra ai!,” ngu nna tsun wu ai. Dai rai nna shi gaw dai ntsin hpe n lu hkraw nga ai. Dai gaw gumhkawng ai hpyenla masum hte a share shagan ai sat lawat kumla ni rai nga ai.

20Yoab a kanau Abishai gaw dai “Gumhkawng Ai Share Sumshi” a ningbaw wa rai nga ai. Shi gaw masha masum tsa hpe shi a nri hte gasat nna sat kau lu ai wa rai nga ai majaw “Dai Sumshi” hta gumhkawng ai wa tai wa sai.

21Shi gaw dai share sumshi ni hta gumhkawng htum ai wa rai nna, shanhte a ningbaw tai wa nga ai; rai ti mung “Share Masum” ni zawn gumhkawng nga ai n rai.

22Kabazela mare kaw na kaga gumhkawng ai hpyenla langai mi gaw Yehoiada a kasha Benaia rai nga ai; shi galaw ai share shagan ai amu law law hta galu kaba ai Moba hpyenla lahkawng hpe mung sat kau wu ai. Lang mi mung hkyen htat ai shani e, nhkun kata de shang nna hkanghkyi langai mi hpe sat kau wu ai.

23Shi gaw hkum shingyan kaba nna pe sanit jan tsaw ai Egutu masha langai mi hpe dai wa lang da ai nri kaba hte rau sat kau wu ai. Benaia gaw shi hpe hkawn hte sha htim gasat nna Egutu wa a lata na nri hpe shi kashun la nhtawm dai hte shi hpe sat kau wu ai.

24Dai gaw share “Sumshi” hta langai lawm nga ai Benaia a share shagan ai sat lawat rai nga ai.

25Shi gaw share “Sumshi” hta laklai ai hku gumhkawng ti mung share “Masum” ni zawn dan hkung nga ma ai n rai. Dawi gaw shi hpe shi a asak sin ya na sin langa hpareng shatai da wu ai.

← Chapter 10 Jump to: Chapter 12 →