1 Chronicles 20

Jinghpaw Common Language Bible © Bible Society of Myanmar, 2009

← Chapter 19 Jump to: Chapter 21 →

1Ya hkawhkam ni majan bai gasat na ladu bai wa hkrum ai aten hta, Yoab gaw hpyen luksuk hpe woi nna Amon mung hpe shang gasat wu ai; Hkawhkam Dawi chyawm gaw Yerusalem e nga nga ai. Shaloi shanhte gaw Raba mare hpe wang da nna htim gasat sharun kau ma ai.

2Dawi gaw ja hte san san galaw da nna pawng 75 li ai Amon hkawhkam wa a janmau la wu ai. Dawi gaw dai hta rawng ai lungseng la nna shi a janmau hta nan dai hpe bang da wu ai. Shi gaw dai mare na lanep law law hpe mung la wa wu ai.

3Shi gaw mare masha ni hpe mung woi wa nhtawm zingret ni, hpri shanghkawp hte ningwa ni hte amu galaw shangun wu ai. Shi gaw dai zawn Amon mung na kaga mare hkan na masha yawng mayawng hpe galaw shangun wu ai. Dai hpang shi hte shi a masha ni Yerusalem mare de nhtang mat wa ma ai.

4Dai hpang jang, Gezera mare e Hpilisti masha ni hte majan byin wa sai. Shaloi Husha mare na Sibehkai gaw Sipai mying ai galu kaba ai masha wa hpe sat kau wu ai rai nna Hpilisti masha ni sum mat ma ai.

5Hpilisti masha ni hte majan bai byin wa ai rai nna, Yaira a kasha Elhanan gaw Gat mare na dahkaw daram kaba ai nri numdu lang ai Goliat a kanau Lami hpe sat kau wu ai.

6Dai hpang Gat mare e gasat gala ai lam bai byin wa ai rai nna, dai yang e lata maga mi de layung kru kru, lagaw maga mi de yungnu kru kru tu ai masha kaba langai nga nga ai. Shi gaw moi prat na marim mangam rai galu kaba ai amyu matu na masha langai rai nga ai.

7Shi gaw Israela masha ni hpe grang dakat nna ninghkap ai majaw Dawi a kahpu Shama a kasha Yonahtan shi hpe sat kau wu ai.

8Dawi hte shi a masha ni e sat kau ai ndai masha masum hte gaw Gat mare e nga ai dai marim mangam rai galu kaba ai ni a amyu matu ni rai ma ai.

← Chapter 19 Jump to: Chapter 21 →