1 Chronicles 29

Jinghpaw Common Language Bible © Bible Society of Myanmar, 2009

← Chapter 28 Jump to:

1Hkawhkam Dawi gaw shawa hpawng ting hpe ning ngu nna ndau tsun wu ai: “Ngai sha Shawlumon gaw Karai Kasang e lata la hkrum ai wa rai nga ti mung, shi gaw naw kaji nga ai hte mahkrum madup garai n nga ai wa rai nga ai. Dai amu gaw masha a matu hkawhkam htingnu galaw ai n rai; Madu Karai Kasang a matu Nawku Htingnu galaw ai rai nga ai majaw galaw na amu grai kaba nga ai.

2Nawku Htingnu a matu ja, gumhpraw, magri mang, hpri, hpun ngau, manu dan ai nlung, lungseng, nsam amyu myu hte maka ka na nlung hte lung hpraw law law re ai arung arai ni hpe hkyen da na matu n-gun lagaw mahkra hte ngai lajang shajin da ni ai.

3Karai Kasang a Nawku Htingnu hpe tsaw ra ai majaw ngai jaw ya sai ndai ni yawng hta jan nna, nye a sut gan hta na ja, gumhpraw ni hpe mung ngai ap ya se ai.

4Ngai gaw jet htum ai ja tan 115 hte jet ai gumhpraw tan 265 daram hpe mung Nawku Htingnu shakum mawn shatsawm na matu hte,

5lata sama masha ni galaw na arung arai yawng a matu jaw ya ni ai. Dai rai yang, dai Madu hpe kumhpa sa nawng ya na kadai wa awng sharawng nga a ni?

6Dai hpang amyu lakung ni a ningbaw ni, amyu bawsang ni a du salang ni, hpyen luksuk hpe up hkang ai ni, madu myit hte jaw ya ai hkawhkam sut gan ni hpe up hkang hpareng ai ni gaw

7Nawku Htingnu galaw na matu nga nna jaw ya sai aja tan 190, gumhpraw tan 380, magri mang tan 675, hpri tan 3,750 hte rai nga ai.

8Manu dan ai lungseng lu ai ni mung Gershon lakung Lewi masha Yehiela up hkang ai lata hku nna Nawku Htingnu sutdek hta sa bang shajang ma ai.

9Amyu masha ni gaw dai Madu hpe awng sharawng ai myit hte grau jaw ya lu manu ai majaw shanhte kabu gara shajang nga ma ai. Hkawhkam Dawi mung nachying kabu gara nga ai.

10Hkawhkam Dawi gaw shawa hpawng ting a man e dai Madu hpe shakawn kungdawn wu ai. Shi gaw, “Dai Madu anhte a kaji kawa Yaku a Karai Kasang e, nang gaw htani htana prat dingsa shakawn kungdawn hkrum ging nga ndai!

11Nang gaw galu kaba nna daru magam n-gun hte hpung shingkang mung, hkik hkam ai hte arawng aya kaba hkam la ai wa rai nga ndai. Sumsing lamu hte ginding aga ntsa na nga manga hte gaw na a rai nga ai; nang gaw hkawhkam wa rai nna yawng mayawng a ntsa na tsaw dik htum ai up hkang ai wa rai nga ndai.

12Sut gan hte sut su ngamu ngamai ai lam yawng mayawng mung nang kaw na rai nga ai rai nna, lam shagu hpe na a atsam marai hte daru magam n-gun hte up hkang nga ndai. Nang gaw kadai hpe mung galu kaba ai hte n-gun ja shangun lu nga ndai.

13Ya chyawm gaw anhte a Karai Kasang e, anhte nang hpe chyeju dum ga ai, na a hpung shingkang mying ningsang hpe anhte shakawn kungdawn nga ga ai law.

14“Rai tim, lam magup gaw nang kaw na kumhpa hkrai rai nga ai majaw nye a amyu masha ni hte ngai mung n lu jaw nga ga ai. Nang jaw ya nit dai hpe chyu sha anhte htang jaw nga ga ai.

15O Madu e, anhte a kaji kawa ni hkrum sha ai zawn, bawng dung hkrum ai hte tsasam masha ni hte maren, anhte a asak hkrun lam hpe lai di nga ga ai. Anhte a shani nhtoi ni gaw shingnip zawn lai mat wa nna si hkrung si htan kaw na n lawt lu nga ga ai gaw nang chye nga ndai.

16O Madu anhte a Karai Kasang e, na a chyoi pra ai mying ningsang hpe shagrau sha-a na matu Nawku Htingnu galaw na sut gan ndai ni yawng hpe anhte rau la sa wa ga ai; rai ti mung dai arai ni yawng nang kaw na hkrai rai nga ai hte dai ni yawng hpe nang madu da nga ndai.

17Nang gaw masha shagu hte a myit masin hpe chyam dinglik yu nna ding hpring ai myit rawng ai masha ni hpe ra sharawng nga ndai hpe ngai chye nngai. Teng man ding man ai hte ndai arai ni yawng hpe awng sharawng ai myit hte nang hpe ngai jaw ya de ai. Ndai yang e hpawng nga ai na a amyu masha ni mung na a man de hkungga ni sak jaw ai lam gade sha kabu gara nga ma ai hpe ngai mu ni ai.

18Anhte a kaji kawa Abraham, Isak hte Yaku ni a Madu Karai Kasang e, na a amyu masha ni hta dai zawn ap nawng chye ai myit hpe htani htana n-gun shaja ya nna nang hta shanhte tut nawng sadi sahka dung nga shangun u law.

19Nye a kasha Shawlumon hpe mung, nang hkang da ai lam magup hpe madat mara hkan sa nhtawm ngai hkyen tawn da sai arai ni hte Nawku Htingnu gaw gap na matu awng sharawng ai myit masin mahkra jaw ya u law,” ngu nna hpyi wu ai.

20Dai hpang Dawi gaw amyu masha ni hpe, “Dai Madu nanhte a Karai Kasang hpe shakawn kungdawn mu!,” ngu nna hkang da wu ai. Shaloi shawa hpawng ting gaw dai Madu shanhte a kaji kawa ni a Karai Kasang hpe shakawn kungdawn nhtawm dai Madu hpe mung, hkawhkam wa hpe mung, shanhte dingnyawm gum dagup nna shagrau hkungga jaw mu ai.

21Hpang shani e, shagu hkungga shatai na yam nga ni hpe shanhte sat nhtawm dai Madu hpe nawng ya mu ai; dai hpang amyu masha ni sha na matu jaw ma ai. Dai sha n-ga, tawn hkungri ntsa hkum ting nat nawng na matu usu hkying mi, sagu la hkying mi hte sagu kasha hkying mi hpe mung shanhte nawng jau mu ai. Shanhte gaw sabyi hkungga ni hpe mung la sa ma ai.

22Dai rai nna shanhte gaw dai shani Madu a man e lu lu sha sha rai kabu gara nga ma ai. Lahkawng lang ngu na hta, shanhte gaw Shawlumon hpe hkawhkam shatai na tsun ndau nga ma ai. Shing rai dai Madu a mying ningsang hta mung du tai na matu shi hpe namman jaw ya nhtawm Zadok hpe mung hkinjawng aya dang ya ma ai.

23Dai rai nna Shawlumon gaw dai Madu shagrin da nu ai shi kawa Dawi a tingnyang hta galai dung nga wu ai. Shi gaw awng dang ai hkawhkam wa rai nna Israela amyu baw ting mung shi a ga madat mara nga ma ai.

24Du salang ni yawng hte hpyenla ni, kaga Dawi a shadang sha ni yawng du hkra pyi hkawhkam rai nga sai Shawlumon hta sadi dung nga na lam ga sadi jaw ma ai.

25Dai Madu gaw amyu baw ting Shawlumon hpe hkrit hkungga shangun ai hte Israela mung hpe up hkang lai wa sai kaga hkawhkam ni kadai hta mung shi hpe grau nna dan hkung shangun nga ai.

26Yese a kasha Dawi gaw Israela mung ting hpe

27mali shi ning up nga ai. Hebron mare hta sanit ning, Yerusalem mare hta sumshi masum ning up nga ai.

28Dawi gaw sut su ngamu ngamai ai hte shagrau hkungga hkam la let dingla ugut gu ai aten hta si mat wa sai; shi a kasha Shawlumon gaw shi a hkang hta hkawhkam tai wa sai.

29Hkawhkam Dawi a labau npawt ndung mahkra hpe myihtoi masum rai nga ai Samuela, Nahtan hte Gad ni a laika ni hta ka matsing da nga ai.

30Dai labau gawn laika gaw shi kaning rai up hkang ai, shi gade daram daru magam n-gun rawng ai, shi hta hkrum mahkrum mabyin lam yawng hte Israela mung hte grup yin mungdan ni hkan byin ai lam ni hpe ka da nga ai.

← Chapter 28 Jump to: