1 Chronicles 14

Jinghpaw Common Language Bible © Bible Society of Myanmar, 2009

← Chapter 13 Jump to: Chapter 15 →

1Turu Hkawhkam Hiram gaw hpaga hpung langai mi hpe Dawi hpang de shangun dat wu ai; shi gaw hkawhkam htingnu gap na matu nga nna arit mailung tawng ni, lasama ni hte nlung gaw ai ni hte hpawn Dawi hpe karum madi shadaw dat wu ai.

2Dai Madu gaw shi hpe Israela hkawhkam aya shagrin ya nu ai hpe mung, shi a amyu masha ni a matu shi a mungdan hpe ngamu ngamai shangun nu ai hpe mung Dawi dum chye wa nga ai.

3Dawi gaw Yerusalem mare e nga yang, madu jan ni hpe hkungran la jat wu ai rai nna shayi shadang sha ni law jat wa nga wu ai.

4Yerusalem mare e shi a matu shangai ya ai kashu kasha ni gaw; Shamua, Shoba, Nahtan, Shawlumon,

5Iba, Elishua, Elpelet,

6Noga, Nehpeg, Yahpia,

7Elishama, Beliada hte Elihpelet ni rai nga ai.

8Dawi gaw Israela mung ting hpe up hkang na hkawhkam tai nga sai hpe Hpilisti masha ni na jang, shi hpe rim la na nga, shanhte a hpyen luksuk ni rawt sa wa ma ai. Dai rai nna shanhte hte sa hkrum na nga Dawi pru sa wa wu ai.

9Dai Hpilisti masha ni mung Rehpim kadit de du nna hpya lu hpya sha hpang wa ma ai.

10Dawi gaw Karai Kasang hpe, “Hpilisti masha ni hpe ngai gasat lu na rai kun? Nang ngai hpe awng padang jaw lu na rai ni?,” ngu nna san wu ai. Dai Madu mung, “Rai sa, htim gasat u. Ngai nang hpe awng padang jaw na we ai!,” ngu nna htan wu ai.

11Dai rai nna Dawi gaw Bala Perazim de lung wa nhtawm dai yang e Hpilisti masha ni hpe gasat dang kau wu ai. Shing rai shi gaw, “Karai Kasang gaw ngai hpe jai lang nna nye a gumlau hpyen ni hpe hka mawru e shaza kau ai zawn galun htinggrang kau nu ai,” ngu nna tsun wu ai. Dai rai nna shara dai hpe Bala Perazim ngu nna shamying wu ai.

12Hpilisti masha ni hprawng mat wa ai shaloi shanhte a hpara sumla ni hpe kau da mu ai rai nna dai ni hpe nat kau na, Dawi hkang da wu ai.

13Dai hpang kade n na yang, Hpilisti masha ni kadit de bai nhtang sa nhtawm kalang mi bai hpya lu hpya sha hpang wa nga ma ai.

14Dawi gaw ya kalang mi bai dai Karai Kasang hpe san yu wu yang, “Ndai yang kaw nna shanhte hpe hkum gasat; rai ti mung shinggrup nna balsam hpun ni tu nga ai makau htep kaga maga hku nna shanhte hpe htim gasat na shajin da u.

15Hpun ndung ni hta rawt hkawm wa ai nsen hpe na jang chyawm gaw gasat sanu; hpa majaw nga yang, Hpilisti hpyen luksuk hpe gasat dang kau na matu na a shawng e ngai sa wa na rai nga nngai,” ngu nna htan wu ai.

16Karai Kasang hkang da nu ai hte maren Dawi hkan galaw ai rai nna dai Hpilisti masha ni hpe Gibeon kaw nna Gezera mare du hkra gawt shachyut kau mu ai.

17Dawi a kajai gumhkawng ai lam gaw mung shagu hta dan hkung wa nna, dai Madu mung amyu baw shagu ni shi hpe hkrit mu ga nga, shabyin dat wu ai.

← Chapter 13 Jump to: Chapter 15 →