1 John 1

Kamba (Mbivilia) 1956

Jump to: Chapter 2 →

1Ũla waĩ kuma mwambĩlĩlyonĩ, ũla tweewie, na ũla twoonie na metho maitũ, ũla twasyaisye, na ũla twavavatie na moko maitũ, ũndũ wa ĩla Ndeto ya thayũ

2(na thayũ ũsu nĩwoonaniw’e na ithyĩ nĩtwonete, na nĩtũũkũsĩĩa, na nĩtũũmũtavya inyw’ĩ thayũ, ũla thayũ ũtathela, ũla waĩ vamwe an Asa, na woonaniw’e kwitũ);

3ũla twoonie na kũwĩw’a nĩw’o tũũmũtavya inyw’ĩ, nĩ kana inyw’ĩ nenyu mwĩthĩwe na mũamba naitũ: ĩĩ, na mũamba witũ nĩ ũmwe na Asa na Mwana wake Yesũ Klĩsto:

4na maũndũ asu nĩtũũmũandĩkĩa nĩ kana ũtanu witũ wusũe.

5Na ũtũmane nĩ ũũ ũla tweewie kwake na twĩmũtavya inyw’ĩ, kana Ngai nĩ kyeni, na nthĩnĩ wake vai kĩvindu nongi.

6Ethĩwa twĩasya kana twĩ mũamba nake na tũendaa na kĩvindu, twĩneena ũvũngũ, na tũtyĩkaa ũla w’o:

7ĩndĩ ethĩwa tũendaa na kyeni, tondũ we wĩ kyeninĩ, twĩ na mũamba ene kwa ene, na nthakame ya Yesũ Mwana wake nĩtũtheasya naĩ syonthe.

8Ethĩwa twĩasya tũi na naĩ, nĩtũkwĩkenga ene, na ũla w’o ndwĩ nthĩnĩ waitũ.

9Ethĩwa nĩtũkumbũla naĩ sitũ, we e kĩthito, na nĩ mũlũngalu wa utũekea naĩ sitũ, na kũtũthesya ũndũ ũte ũlũngalu w’onthe.

10Ethĩwa twĩasya tũtyĩkĩte naĩ, twĩmũtw’a e ũvũngũ, na ndeto yake ndĩ nthĩnĩ waitũ.

Jump to: Chapter 2 →