1 John 2

Kamba (Mbivilia) 1956

← Chapter 1 Jump to: Chapter 3 →

1Syana syakwa nini, maũndũ aa nĩmũandĩkĩa nĩ kana mũikeke naĩ. Na ethĩwa mũndũ akeeka naĩ, twĩ na Mũtũvoyei kwa Asa, Yesũ Klĩsto ũla mũlũngalu:

2nake nĩwe nthembo ya wĩw’anĩthyo kwondũ wa naĩ sitũ; na ti sitũ syoka, ĩndĩ nũndũ wa naĩ sya nthĩ yonthe.

3Na ũndũnĩ ũũ nĩtwĩsĩ kana nĩtũmũmanyĩte, ethĩwa nĩtũkwataa mĩao yake.

4Ũla waasya, Nyie nĩnĩmwĩsĩ, na ndakwataa mĩao yake, ũsu e ũvũngũ, na ũla w’o ndwĩ nthĩnĩ wake;

5ĩndĩ ũla ũkwataa ndeto yake, nthĩnĩ wake wendo wa Ngai nĩwĩanĩw’e ki. Kwa ũu nĩtũũmanya kana twĩ nthĩnĩ wake:

6ũla waasya atwĩe nthĩnĩ wake nĩwaĩle mwene kũendaa o ũndũ we waendaa.

7Endwa, ndiũmũandĩkĩa mwĩao mweũ, ĩndĩ nĩ mwĩao wa tene ũla mwaĩ naw’o kuma mwambĩlĩlyonĩ: na mwĩao ũsu wa tene nĩ ndeto ĩla mweewie.

8Na ĩngĩ, nĩmũandĩkĩa mwĩao mweũ, naw’o nĩ wa w’o nthĩnĩ wake na nthĩnĩ wenyu; nĩkwĩthĩwa kĩvĩndu nĩkĩũvĩta na kyeni kya w’o nĩkĩkenaa o na yu.

9Ũla waasya e kyeninĩ na amenaa mwana‐a‐ĩthe, ũsu e kĩvindunĩ kũvika yu.

10Ũla ũmwendaa mwana‐a‐ĩthe atwĩe kyeninĩ, na nthĩnĩ wake vai ũlulutĩkyo.

11Ĩndĩ ũla ũmenaa mwana‐a‐ĩthe e kĩvindunĩ, na aendaa kĩvindunĩ, na ndesĩ kũla ũnũũthi, nũndũ kĩvindu nĩkĩmwaĩtye metho.

12Nĩmũandĩkĩa inyw’ĩ, syana syakwa nini, nũndũ nĩmũekewe naĩ syenyu kwondũ wa syĩtwa yake.

13Nĩmũandĩkĩa inyw’ĩ, aasa, nĩkwĩthĩwa nĩmũmwĩsĩ we ũla wĩ kuma mwambĩlĩlyonĩ. Nĩmũandĩkĩa inyw’ĩ, anake, nĩkwĩthĩwa nĩmwakĩlilye ũla mũthũku vinya. Nĩnamũandĩkĩa inyw’ĩ, syana nini, nũndũ nĩmũmwĩsĩ Asa.

14Nĩnamũandĩkĩa inyw’ĩ, aasa, nũndũ nĩmũmwĩsĩ we ũla wĩ kuma mwabĩlĩlyonĩ. Nĩnamũandĩkĩa inyw’ĩ, anake, nũndũ mwĩ na vinya, na ndeto ya Ngai ĩtwĩe nthĩnĩ wenyu, na nĩmwakĩlilye ũla mũthũku vinya.

15Mũikamyende nthĩ, o na syĩndũ sya nthĩ. Ethĩwa mũndũ o na wĩva nũnũũmyenda nthĩ, wendo wa Asa ndwĩ nthĩnĩ wake.

16Nĩkwĩthĩwa kĩla kĩ kũũ nthĩ, wendi wa mwĩĩ na wendi wa metho na wĩyĩan’yo wa thayũ ityumaa kwa Asa, ĩndĩ nĩ sya nthĩ.

17Na nthĩ nĩnĩũvĩta, na wendi wayo: ĩndĩ ũla wĩkaa kwenda kwa Ngai ekalaa tene na tene.

18Syana nini, nĩ saa wa mũminũkĩlyo: na tondũ mweewie kana nthũ ya Klĩsto nĩnĩkũka, o na yu nthũ sya Klĩsto nĩsyaingĩvie; na ũndũ wa ũu nĩtwĩsĩ kana nĩ saa wa mũminũkĩlyo.

19Nĩmeeyumisye kwitũ, ĩndĩ matyaĩ maitũ; nũndũ kethĩwa maĩ maitũ, methĩwa makĩkala vamwe naitũ: ĩndĩ nĩmeeyumisye, nĩ kana monanw’e atĩ asu onthe ti maitũ.

20Nenyu mwĩ amenesye mauta kuma kwa ũla Mũtheu, na nĩmwĩsĩ maũndũ onthe.

21Ndinamũandĩkĩa nũndũ mũtyĩsĩ ũla w’o, ĩndĩ nũndũ nĩmũwĩsĩ, na vai ũvũngũ o na wĩva wumaa nthĩnĩ wa ũla w’o.

22Ũla wĩ ũvũngũ nũũ, ate o ũla ũnũũlea kana Yesũ nĩwe Klĩsto? Ũsu nĩwe nthũ ya Klĩsto, ũla ũkaĩaa Asa na Mwana.

23O ũla ũnũũmũkaĩa Mwana, ũsu nde na Asa: ũla ũnũũmumbũla Mwana e na Asa nake.

24Ĩndĩ inyw’ĩ, ũekei wĩkale nthĩnĩ wenyu ũvoo ũla mweewie kuma mwambĩlĩlyonĩ. Ethĩwa ũvoo ũsu mweewie kuma mwambĩlĩlyonĩ wĩkalaa nthĩnĩ wenyu, mũkekalaa nthĩnĩ wa Mwana, na nthĩnĩ wa Asa.

25Na ũũ nĩw’o watho ũla watwathie ithyĩ, naw’o nĩ ũla thayũ ũtathela.

26Maũndũ aa namũandĩkĩa ũndũ wa ala mekwenda kũmwasya.

27Nenyu, kũmenew’a mauta kũla mwanengiwe nĩwe nĩkwĩkalĩte nthĩnĩ wenyu na mũi na vata wa kũmanyĩw’a nĩ mũndũ; ĩndĩ nũndũ kũmenew’a mauta kũla kumaa kwake nĩkũmũmanyĩasya maũndũ onthe, na nĩ kwa w’o, na ti ũvũngũ, na o ũndũ kwamũmanyĩisye, ĩkalai nthĩnĩ wake.

28Na yu, syana syakwa nini, ĩkalai nthĩnĩ wake; nĩ kana yĩla wĩonanw’a twĩthĩwe na ũnyiau, na tũtikasonoke mbee wake, ooka.

29Ethĩwa nĩmwĩsĩ kana we nĩ mũlũngalu, manyai kana kĩla mũndũ wĩkaa ũlũngalu nũsyaĩtwe nĩwe.

← Chapter 1 Jump to: Chapter 3 →