1 John 4

Kamba (Mbivilia) 1956

← Chapter 3 Jump to: Chapter 5 →

1Endwa, mũiketĩkĩle kĩla veva, ĩndĩ ĩkuũei maveva, kana nĩ ma Ngai; nũndũ athani aingĩ ma ũvũngũ nĩmanyaĩĩkie kũũ nthĩ.

2Ũndũnĩ ũũ nĩmũũmanya Veva wa Ngai: kĩla veva wumbũlaa kana Yesũ Klĩsto nĩwokie e na mwĩĩ nĩ wa Ngai:

3na kĩla veva ũtaumbũlaa Yesũ, ti wa Ngai: na ũsu nĩw’o veva wa ĩla nthũ ya Klĩsto, ũndũ mweewie kana ũkooka; o na yu wĩ kũũ nthĩ.

4Inyw’ĩ, syana syakwa nini, mwĩ ma Ngai, na nĩmũmakĩlĩtye vinya: nĩkwĩthĩwa ũla wĩ nthĩnĩ wenyu nĩ mũnene kwĩ ũla wĩ kũũ nthĩ.

5Asu nĩ ma nthĩ: na kwondũ wa ũu maneenaa ta ma nthĩ, na nthĩ nĩmew’aa.

6Ithyĩ twĩ ma Ngai: ũla ũmwĩsĩ Ngai nũtwĩw’aa; ũla ũte wa Ngai ndatwĩw’aa. Kwondũ wa ũu nĩtũũmanya veva wa ũla w’o, na veva wa kwasya.

7Endwa, twendanei ene kwa ene: nũndũ wendo nĩ wa Ngai; na kĩla mũndũ wendanaa nũsyaĩtwe nĩ Ngai, na nũmwĩsĩ Ngai.

8Ũla ũtendanaa ndamwĩsĩ Ngai; nũndũ Ngai nĩ wendo.

9Ũndũnĩ ũũ wendo wa Ngai nĩwonanĩtw’e kwitũ, nũndũ Ngai nĩwamũtũmie Mwana wake kũũ nthĩ, ũla wasyaiwe e ũmwe, nĩ kana twĩthĩwe na thayũ kwondũ wake.

10Ũũ nĩw’o wendo, ti ithyĩ twamwendie Ngai, ĩndĩ nĩwe watwendie ithyĩ, na atũma Mwana wake ethĩwe nthembo ya wĩw’anĩthyo kwondũ wa naĩ sitũ.

11Endwa, ethĩwa Ngai nĩwatwendie ũu, naitũ nĩtwaĩlwe nĩ kwendana.

12Vai mũndũ waamwona Ngai o na ĩndĩĩ: ethĩwa nĩtũkwendana, Ngai nũtwĩe nthĩnĩ waitũ, na wendo wake nĩwĩanĩw’e nthĩnĩ waitũ;

13ũndũnĩ ũũ nĩtũũmanya kana tũtwĩe nthĩnĩ wake nake nthĩnĩ waitũ, nũndũ nũtũnengete Veva wake.

14Naitũ nĩtwonete na twĩ na ũkũsĩ kana Asa nĩwatũmie Mwana ethĩwe Mũtangĩĩi wa nthĩ.

15O ũla wumbũlaa kana Yesũ nĩ Mwana wa Ngai, Ngai nũtwĩe nthĩnĩ wake, nake atwĩe nthĩnĩ wa Ngai.

16Naitũ nĩtwĩsĩ na nĩtwĩkĩlĩte wendo ũla Ngai wĩ naw’o nthĩnĩ waitũ. Ngai nĩ wendo; na ũla wĩkalaa wendonĩ ekalaa nthĩnĩ wa Ngai, na Ngai ekalaa nthĩnĩ wake.

17Kwondũ wa ũu wendo, nĩwĩanĩw’e kwitũ, nĩ kana twĩĩthĩwa na ũnyiau mũthenya wa ũsilĩlo; nũndũ ũndũ ũilyĩ we, nĩw’o ithyĩ tũilyĩ kũũ nthĩ.

18Vai w’ĩa nthĩnĩ wa wendo: ĩndĩ wendo mwĩanĩu nĩwĩkasya w’ĩa ũtee, nũndũ w’ĩa wĩ thĩna; na ũla wĩ na w’ĩa ti mwĩanĩu wendonĩ.

19Ithyĩ nĩtwendanaa nĩkwĩthĩwa nĩwambie ũtwenda.

20Ethĩwa mũndũ easya, Nyie nĩnĩmwendete Ngai, na emena mwana‐a‐ĩthe, nĩ mũneeni wa ũvũngũ: nũndũ ũla ũtamwendaa mwana‐a‐ĩthe ũla wonaa, ndatonya kũmwenda Ngai ũla ũtaamwona.

21Naitũ twĩ na mwĩao ũũ kuma kwake, kana ũla ũmwendaa Ngai namwende mwana‐a‐ĩthe nake.

← Chapter 3 Jump to: Chapter 5 →