1 John 3

Kamba (Mbivilia) 1956

← Chapter 2 Jump to: Chapter 4 →

1Sisyai ũndũ wendo wa Asa ũilyĩ ũla ũtwendete naw’o, kana twĩtwe syana sya Ngai; na nĩ w’o twĩ syo. Ũndũ wa ũu nthĩ ndĩtwĩsĩ, nĩkwĩthĩwa ndyaamũmanya we.

2Endwa, yu twĩ syana sya Ngai, na ndũnamba kwonanw’a ũndũ tũkethĩwa tũilyĩ. Nĩtwĩsĩ kana, yĩla wĩonanw’a, tũkavw’anana nake; nũndũ tũkamwona we o ũndũ ũilyĩ.

3Na kĩla mũndũ wĩ na wĩkwatyo ũũ nĩwĩtheasya mwene, o tondũ nake nĩ mũtheu.

4Kĩla mũndũ wĩkaa naĩ ekaa ũng’endu; na naĩ nĩ ũng’endu.

5Nenyu nĩmwĩsĩ kana nĩwonaniw’e avete naĩ; na nthĩnĩ wake vai naĩ.

6O mũndũ ũla ũtwĩe nthĩnĩ wake ndekaa naĩ: ũla wĩkaa naĩ ndaamwona, o na ndamwĩsĩ.

7Syana syakwa nini, mũiketĩkĩle mũndũ amwasye: ũla wĩkaa ũlũngalu nĩ mũlũngalu, o ũndũ we nĩ mũlũngalu:

8ũla wĩkaa naĩ nĩ wa ndevili; nũndũ ndevili atwĩe ekaa naĩ kuma mwambĩlĩlyonĩ. Kwondũ wa ũu Mwana wa Nagi nĩwonaniw’e, nĩ kana anange mawĩa ma ndevili.

9O mũndũ ũla ũsyaĩtwe nĩ Ngai ndekaa naĩ, nĩkwĩthĩwa mbeũ yake ĩtwĩe nthĩnĩ wake: na ndatonya kwĩkaa naĩ, nĩkwĩthĩwa nũsyaĩtwe nĩ Ngai.

10Ũndũnĩ ũũ syana sya Ngai nikwonanw’a, o na syana sya ndevili: o mũndũ ũla ũtekaa ũlũngalu ti wa Ngai, o na ũla ũtamwendaa mwana‐a‐ĩthe.

11Nũndũ ũtũmane ũla mweewie kuma mwambĩlĩlyonĩ nĩ ũũ, twendane ene kwa ene:

12na ti ta Kaini ũla waĩ wa ũla mũthũku, na ooaa mwana‐a‐ĩnyia. Na amũaie nũndũ wa kĩ? Nũndũ mawĩa make maĩ mathũku, na ma mwana‐a‐inyia maĩ malũngalu.

13Mũikaseng’e, ana‐asa, ethĩwa nthĩ nĩnĩũmũmena.

14Nĩtwĩsĩ kana nĩtũvĩtĩte twauma kĩkw’ũnĩ twavota thayũnĩ, nĩkwĩthĩwa nĩtũmendaa ana‐a‐asa. Ũla ũtendanaa atwĩe kĩkw’ũni.

15O mũndũ ũla ũmenaa mwana‐a‐ĩthe nĩ mũaani: nenyu nĩmwĩsĩ kana vai mũaani wĩ na thayũ ũtathela ũtwĩe nthĩnĩ wake.

16Ũndũnĩ ũũ nĩtũũmanya wendo, nũndũ we anenganie thayũ wake kwondũ witũ; naitũ nĩtwaĩle kũnengane mathayũ maitũ kwondũ wa ana‐a‐asa.

17Ĩndĩ o ũla wĩ na syĩndũ sya kũũ nthĩ, nake aimwona mwana‐a‐ĩthe e na vata, na ailea ũmwĩw’ĩa tei, wendo wa Ngai ũtwĩe nthĩnĩ wake ata?

18Syana syakwa nini, tũikendane na ndeto, kana na ũĩmĩ; ĩndĩ twendane na kwĩka, na twendane w’o.

19Kwondũ wa ũu nĩtũũmanya kana twĩ ma ũla w’o, na nĩtũtonya kũvindĩthya ngoo sitũ, twĩ mbee wake:

20nũndũ ethĩwa ngoo sitũ niũtũsilĩla, Ngaĩ nĩ mũnene kwĩ ngoo sitũ, na nĩwĩsĩ maũndũ onthe.

21Endwa, ethĩwa ngoo sitũ itiũtũsilĩla, twĩ na ũnyiau vala ve Ngai;

22na o ũndũ ũla tũũvoya nĩtũũnengwa nĩwe, nĩkwĩthĩwa nĩtũkwataa mĩao yake na nĩtwĩkaa maũndũ ala mamwendeeasya.

23Na mwĩao wake nĩ ũũ, kana twĩtĩkĩle syĩtwa ya Mwana wake Yesũ Klĩsto, na kwendana, o ũndũ watwĩaĩe.

24Na ũla ũkwataa mĩao yake ũsu atwĩe nthĩnĩ wake, nake atwĩe nthĩnĩ wake. Na ũndũnĩ ũũ nĩtwĩsĩ kana nũtwĩe nthĩnĩ waitũ, nũndũ wa Veva ũla watũnengie.

← Chapter 2 Jump to: Chapter 4 →