1 Peter 1

Kamba (Mbivilia) 1956

Jump to: Chapter 2 →

1Vetelo, mũtũmwa wa Yesũ Klĩsto, valũa ũũ wakwa ũmavikĩe anyuve ala me Ũnyaĩĩkyonĩ, matwĩe ũeninĩ nthĩ sya Vondo, Kalatia, Kavatosia, Asĩa, na Vithinia,

2kwĩanana na ũndũ Ngai Asa wamanyie kuma tene, kwondũ wa kũvathanw’a nĩ Veva kwĩthĩwe atheu kũvika kwĩw’a na kũminzangĩw’a nthakame ya Yesũ Klĩsto: Mumo nĩwĩthĩwe nenyu na mũuo nĩwingĩvw’e.

3Nakathwe Ngai, Ĩthe wa Mwĩaĩi waitũ Yesũ Klĩsto, ũla kwĩanana na tei wake mwingĩ watũsyaie ĩngĩ twĩthĩwe na wĩkwatyo wĩ thayũ kwondũ wa kũthayũũka kwa Yesũ Klĩsto kuma akw’ũnĩ,

4twĩthĩwe na ũtiĩwa ũtanangĩkaa, na ũtavukaa, na ũtathelaa, wiĩtwe ĩtunĩ kwondũ wenyu,

5ala mũsũvĩawa nĩ vinya wa Ngai ũndũ wa mũĩkĩĩo mwĩthĩwe na ũtangĩĩo wũmbanĩtw’e kwonanw’a ĩvinda ya mũminũkĩlyo.

6Mwĩtana mũno maũndũnĩ asu, o na kau yu kavinda kanini, ethĩwa kwĩ vata, nĩmwĩw’ĩthaw’a woo nĩ matatwa ma mĩthemba mingĩ,

7nĩ kana kũtatwa kwa mũĩkĩĩo wenyu, nakw’o kwĩ vata mũno kwĩ thaavu ũla wanangĩkaa o na watatwa na mwaki, kũtonye kũete ngatho na ndaĩa na nguma ĩvinda ya kwonanw’a kwa Yesũ Klĩsto:

8ũla mũmwendaa o na kau mũiaamwona; o na mũtiũmwona yu, ĩndĩ mũkĩmwĩtĩkĩla, mwĩtana mũno na ũtanu ũtaneeneka na wusũĩtwe nĩ ndaĩa:

9mũkyosa mũminũkĩlyo wa mũĩkĩĩo wenyu, naw’o nĩ ũtangĩĩo wa mathayũ menyu.

10Na athani makũlilye na kũmantha mũno ũvoo wa ũtangĩĩo ũsu, namo nĩmathanie ũndũ wa mumo ũla ũkoka kwenyu:

11makĩmantha nĩ ĩvinda yĩva kana nĩ ĩvinda yĩilyĩ ata yĩla yoonaniw’e nĩ Veva wa Klĩsto ũla waĩ nthĩnĩ woo, yĩla wambie ũkũsĩĩa mathĩna ma Klĩsto, na ndaia ila ikethĩwa ĩtina wamo.

12Nao nĩmooniw’e, kana ti kwondũ woo ene, ĩndĩ nĩ kwondũ wenyu, mathũkũmie maũndũ asu, ala matavaniw’e kwenyu nĩ andũ ala mamũtavisye ũvoo mũseo nthĩnĩ wa Veva Mũtheu ũla watũmiwe kuma ĩtunĩ; maũndũ asu alaĩka mendaa ũkunĩkĩla.

13Kwondũ wa ũu ĩvotoei ilĩkonĩ syenyu, na ĩthĩwai na kĩlĩko mũkĩkwatya vyũ mumo ũla mwĩetewe ũv uan’yonĩ wa Yesũ Klĩsto;

14ta syana mbĩwi, mũtekwĩvw’anan’ya na mĩmeo yenyu mĩthũku ya tene ĩvinda yĩla mũteesĩ:

15ĩndĩ o tondũ ũla wamwĩtie nĩ mũtheu, o ta ũu ĩthĩwai atheu mwĩkalĩlenĩ wenyũ w’onthe wa thayũ;

16nĩkwĩthĩwa nikũandĩkĩtwe, Ĩthĩwai atheu; nũndũ nyie nĩ mũtheu.

17Na ethĩwa nĩmũmwĩkaĩlaa Asa, we ũla ũsilĩlaa kĩla mũndũ kwĩanana na wĩa wake vate wendeesyo, ĩkalai na w’ĩa ĩvinda yenyu yĩla mwĩ vaa ũeninĩ:

18mũkũmanya kana nĩmwoovoiw’e mume mwĩkalĩlenĩ wenyu wa mana ũla mwoosie kuma kwa aaũmae menyu, na mũiaaovow’a na syĩndũ ila syanangĩkaa, ta vetha kana thaavu;

19ĩndĩ mwovoetw’e na nthakame yĩ vata mũno, ta ya katena ka ĩlondu kate kawathe kana kaũndũ nongi, nayo nĩ nthakame ya Klĩsto;

20ũla wambie ũmanyĩka w’o mbee wa nthĩ itanambĩlĩlw’a, ĩndĩ nĩwumĩlĩtw’e mũminũkĩlyo wa mavinda kwondũ wenyu,

21inyw’ĩ ala kwondũ wake mwĩtĩkĩlĩte Ngai, ũla wamũthayũũkisye kũmumya kwa akw’ũ, na kũmũnenga ndaĩa; nĩ kana mũĩkĩĩo wenyu na wĩkwatyo wenyu wĩthĩwe nthĩnĩ wa Ngai.

22Nũndũ nĩmũtheetye ngoo syenyu kwondũ wa kwĩw’a kwenyu kwa ũla w’o kũvika kwenda ana‐a‐asa kũte wangangan’yo, endanai na wendo mũvyũ kuma ngoonĩ:

23nũndũ mũsyaĩtwe ingĩ, na ti kwa mbeũ ĩla yanangĩkaa, ĩndĩ nĩ ĩla ĩtanangĩkaa, ũndũ wa ndeto ya Ngai, ĩla yĩ thayũ na yĩkalaa.

24Nũndũ, Mĩĩ yonthe nĩ ta nyeki, Na ndaĩa yonthe yayo nĩ ta ĩlaa ya nyekĩ. Nyeki nĩyũmaa, na ĩlaa nĩyĩtĩkaa:

25Ĩndĩ ndeto ya Mwĩaĩi nĩyĩkalaa tene na tene. Na ndeto ĩno nĩ ndeto ya ũla ũvoo mũseo ũla watavaniw’e kwenyu.

Jump to: Chapter 2 →