1 Peter 5

Kamba (Mbivilia) 1956

← Chapter 4 Jump to:

1Ĩndĩ nĩngũtaa atumĩa ala me kwenyu, nakwa nĩ mũtumĩa o tao, na nĩ ngũsĩ ya mathĩna ma Klĩsto, o na nĩ mwosi wa ũtheu mũtisu ũla ũkonanw’a:

2sũvĩai ĩĩthya ya Ngai yĩla yĩ kwenyu, mũkĩyĩsisya, ti ũndũ wa kũingĩĩw’a, ĩndĩ na kwenda, o na ti ũndũ wa kũunwa nĩ syĩndũ itaĩle, ĩndĩ na kĩlĩko kĩyũmbanĩtye;

3o na ti kwĩsumbĩkya kĩandanĩ kĩla mũnengetwe, ĩndĩ mũkĩtw’ĩkĩthya ene ngelekan’yo sya yĩla ĩĩthya.

4Na yĩla Mũĩthi mũnene ũkaumĩla, mũkoosa ngovia ya ũsumbĩ ya ũtheu mũtisu ĩla ĩtaalyũkaa.

5O ta ũu, inyw’ĩ ma mũika mũninangi, ĩnyivĩsyei atumĩa. Ĩĩ, inyw’onthe ĩvotoei wĩnyivyo, mũtethan’ye inyw’ĩ kwa inyw’ĩ: nĩkwĩthĩwa Ngai nũsiĩĩaa ala mekwĩnenevya, ĩndĩ amanengae mumo ala menyivasya.

6Ĩnyivyei ĩndĩ ungu wa kw’oko kwa Ngai kwĩ na vinya, nĩ kana amũnenevye ĩvinda yeanĩa;

7mũkĩmwiĩa kwĩmakĩa kwenyu kw’onthe, nũndũ nĩwe ũmũsũvĩaa.

8Ĩthĩwai na kĩlĩko, syaĩĩsyai: mũvinganĩsya wenyu ndevili angangaa kũũ na kũũ ta mũnyambũ ũkũluma, aimantha mũndũ aye:

9nake mũsiĩĩei mũlũmite mũĩkĩĩonĩ wenyu mũkĩmanya kana mathĩna o asu meanĩaw’a nthĩnĩ wa ana‐a‐ĩthe menyu ala me kũũ nthĩ.

10Na Ngai wa mumo w’onthe, ũla wamwĩtie inyw’ĩ mũlike ndaĩanĩ yake ya tene na tene nthĩnĩ wa Klĩsto, mwamina kũthĩnw’a ĩvinda ĩnini, we mwene akamwĩanĩsya, na ũmũlũlũmĩlya, na ũmwĩkĩa vinya.

11Ũsumbĩko nĩ wake tene na tene. Ameni.

12Namũandĩkĩa ndeto mbũthũ na kũmũetee na kw’oko kwa Silivano, mwana‐a‐asa waitũ wĩ kĩthito, o tondũ nĩtalaa, ngĩmũtaa, na kũkũsĩĩa kana ũũ nĩ mumo wa w’o wa Ngai: ũngamai na ũlũmu nthĩnĩ waw’o.

13Ũla mũnyuve tenyu, ũla wĩ Mbaviloni, nĩwamũkethya; na Maliko mwana wakwa nĩwamũkethya.

14Kethan’yai na ũmumunyano wa wendo. Mũuo nĩwĩthĩwe na inyw’onthe ala mwĩ nthĩnĩ wa Klĩsto.

← Chapter 4 Jump to: