1 Peter 4

Kamba (Mbivilia) 1956

← Chapter 3 Jump to: Chapter 5 →

1Ĩndĩ nĩkwĩthĩwa Klĩsto nĩwathĩniw’e e na mwĩĩ, nenyu o ta ũu ĩkĩai miio ya kau ya kĩlilikano kyu; nĩkwĩthĩwa ũla wathĩniw’e e na mwĩĩ nũekanĩte na naĩ;

2nĩ kana kuma yu, ĩvinda yenyu yĩla yĩtiele mwĩ mwĩĩnĩ, mũikekalae mĩmeonĩ ya andũ, ĩndĩ kwendanĩ kwa Nagi.

3Nũndũ ĩvinda yĩla ĩvitu nĩyeanĩe kwĩka ũndũ Andũ‐ma‐mbaĩ‐ingĩ mendaa, na kũkinya maũndũnĩ ma ũlaalai, na mĩmeo mĩthũku, na ũthengi, na mboka itaĩle, na ũnywi, na ũthaithi wa mĩvw’anano ũtosana na mĩao:

4nao monaa nĩ ũseng’yo inyw’ĩ kũlea kũsemba vamwe nao kũendeeaa naĩnĩ isũ vate kwĩsiĩĩa, makĩmũneenea naĩ:

5na nĩmakamũnenga ũtalo we ũla wĩyũmbanĩtye kũsilĩla ala me thayũ na ala akw’ũ.

6Nũndũ wa ũu ũla ũvoo mũseo nĩwataviw’e ala makwie, nĩ kana masilĩlwe o tondũ andũ me na mwĩĩ masilĩlawa, ĩndĩ methĩwe thayũ vevanĩ o tondũ Ngai ũnũkwenda.

7Ĩndĩ mũminũkĩlyo wa maũndũ onthe nĩ mũthengeeu: kwondũ wa ũu ĩthĩwai na kĩlĩko kĩanu, na mũkĩsyaĩĩsya kũvoyanĩ:

8na mbee wa maũndũ onthe ĩthĩwai mũkyendana mũno na wendo mũvyũ inyw’ĩ kwa inyw’ĩ; nũndũ wendo nũvw’ĩkaa wingĩ wa naĩ:

9mũkĩthokan’ya ene kwa ene mũtekũnyungunyĩsya:

10kwĩanana na ũndũ kĩla mũndũ wosie mũthĩnzĩo, thũkũmanai ene kwa ene, ta asuvĩi aseo ma mumo wa Ngai wa mĩthemba mingĩ;

11ethĩwa mũndũ nũkũneena, naneene o ta ndeto syaneeniwe nĩ Ngai; ethĩwa mũndũ nũkũthũkũma, nathũkũme na vinya ũla ũnengetwe nĩ Ngai: nĩ kana maũndũnĩ onthe Ngai ataĩwe ũndũ wa Yesũ Klĩsto, ũtaĩo na ũsumbĩko nĩ wake tene na tene. Ameni.

12Endwa, mũikone ta ũndũ wa ũseng’ya ũtatwa ũilyĩ ta mwaki ũla wĩ kwenyu, ũla ũmũvikĩaa ũmũtate, ta ũndũ weũ wamũkwata:

13ĩndĩ o ũndũ mwĩ osi ma mathĩna ma Klĩsto, tanai; nĩ kana mũtane ũtanu mũnene mũno ĩvinda ya ũvuan’yo wa ũtheu wake mũtisu.

14Ethĩwa mwĩvũthw’a kwondũ wa syĩtwa ya Klĩsto, mwĩ aathime: nĩkwĩthĩwa Veva wa ũtaĩo, o Veva wa Ngai, ekalaa ĩũlũ wenyu.

15Kũikethĩwe ũmwe wenyu kũthĩnw’a nĩkwĩthĩwa nĩ mũaani, kana kĩng’ei, kana mwĩki wa naĩ, kana mwĩlikya maũndũnĩ ma andũ angĩ:

16ĩndĩ ethĩwa mũndũ nũthĩnaw’a nĩkwĩthĩwa nĩ Mũklĩsto, ndakasonoke; ĩndĩ namũkathe Ngai syĩtwanĩ yĩũ.

17Nũndũ ĩvinda nĩ ĩviku ya ũsilĩlo kwambĩlĩlw’a nyũmbanĩ ya Ngai: na ethĩwa wĩambĩlĩlw’a kwa ithyĩ, mũminũkĩlyo wa ala matew’aa ũvoo mũseo wa Ngai ũkeethĩwa ata?

18Na ethĩwa mũndũ mũlũngalu evonoka na vinya, ũla ũtakĩaa Ngai na ũla mwathe akooneka va?

19Kwondũ wa ũu nao ala mathĩnaw’a kwĩanana na kwenda kwa Ngai nĩmamwiĩe Mũmbi ũla wĩ kĩthito ngoo syoo, makĩka nesa.

← Chapter 3 Jump to: Chapter 5 →