1 Peter 3

Kamba (Mbivilia) 1956

← Chapter 2 Jump to: Chapter 4 →

1O ta ũu, inyw’ĩ iveti, ĩnyivĩsyei aũme menyu; nĩ kana ethĩwa ve amwe mate ewi ma ĩla ndeto, matonye kwonw’a nĩ mwĩkalĩle wa iveti syoo vate ĩla ndeto;

2makyona mwĩkalĩle wenyu mũtheu wĩ na w’ĩa.

3Kwĩseũvya kwenyu kũikethĩwe kwĩseũvya kwa ũtheinĩ kwa kwokotha nzw’ĩĩ, na kwĩkĩa mĩio ya wanake ya thaavu, kana kwĩkĩa ngũa;

4ĩndĩ nĩkwĩthĩwe mũndũ ũla ũtonekaa wa ngoo, kwĩvw’ĩkanĩ kũla kũtanangĩkaa kwa veva wa wĩnyivyo na wa ũuu, ũla wĩ vata mũno mbee wa Ngai.

5Nũndũ ũu nĩw’o aka atheu ma tene ala mekwatĩtye Ngai meeseũvisye, makĩnyivĩsya aũme moo:

6o tondũ Sala wamwĩw’aa Avalaamu, akĩmwĩta vwana: nenyu mwĩ syana syake, ethĩwa mwĩkaa nesa, mũteũtĩsw’a nĩ w’ĩa o na wĩva.

7O ta ũu, inyw’ĩ aũme, ĩkalai na iveti syenyu kwĩanana na ũmanyi, mũkĩmũnenga mũndũ mũka ndaĩa, ta mũio ũte na vinya, ta mwĩ atiĩwa vamwe ma mumo wa thayũ; nĩ kana mboya syenyu itikaisĩĩwe.

8Kũminũkĩlya, inyw’onthe ĩthĩwai na kĩlilikano o kĩmwe, mwĩw’anĩe tei, mwendene ta ana‐a‐asa, mwĩ na ngoo yĩ ĩnee, mwĩ na wĩnyivyo:

9mũikekũle, kana kwĩumĩa mwaumwa; ĩndĩ athimaai; nũndũ mweetĩwe ũndũ ũũ, nĩ kana mũtiĩwe ũathimo.

10Nũndũ, Ũla wĩenda thayũ, Na kwona matukũ maseo, Nasiĩĩe ũĩmĩ wake ndũkaneene ũthũku, Na ilomo syake itikaneene na ũseleke:

11Nĩevathane na naĩ, naiĩka ũseo; Namanthe mũuo, naiũatĩĩa.

12Nũndũ metho ma Mwĩaĩi masyaasya ala alũngalu, Na matũ make nĩmethukĩĩasya mboya syoo: Ĩndĩ ũthyũ wa Mwĩaĩi wĩ ĩũlũ wa ala mekaa naĩ.

13Nũũ ũla wĩmwĩka naĩ, ethĩwa mwĩthangaaĩa ũndũ ũseo?

14Ĩndĩ o na ethĩwa mũkathĩnw’a kwondũ wa ũlũngalũ, mwĩ aathime; na mũikakĩe kũtĩsya kwoo, o na mũikaũũye;

15ĩndĩ mũtw’ei Klĩsto ethĩwe Mwĩaĩi ngoonĩ syenyu: ĩthĩwai mwĩyũmbanĩtye mavĩnda onthe kũmũsũngĩa kĩla mũndũ ũnũũmũkũlya ũndũ ũtumaa mwĩthĩwa na wĩkwatyo ũla wĩ nthĩnĩ wenyu ĩndĩ ũu nĩwĩkwe na ũuu na w’ĩa:

16mwĩ na wasya mũseo wa ngoo: nĩ kana, ũndũnĩ ũla mũkwilĩĩlwa, masonokw’e ala mekũumanga mwĩkalĩle wenyu mũseo nthĩnĩ wa Klĩsto.

17Nũndũ nĩ ũseo mbee, kũthĩnw’a kwondũ wa kwĩka nesa kwĩ kũthĩnw’a kwondũ wa kwĩka naĩ, ethĩwa nĩw’o kwenda kwa Ngai.

18Nũndũ Klĩsto nake nĩwathĩniw’e kwondũ wa naĩ ĩvinda o yĩmwe, ũla mũlũngalu vandũ va ala mate alũngalu, nĩ kana atũete kwa Ngai; akyũawa mwĩĩ, ĩndĩ akĩkĩwa thayũ vevanĩ;

19na e nthĩnĩ waw’o athi atavan’ya kwa maveva ala me kolokolonĩ,

20ala maleile kwĩw’a tene, yĩla wũmĩĩsyo wa Ngai weteelile matukũ ma Noa, yĩla ngalawa yakawa, na nthĩnĩ wayo andũ anini, namo nĩ nyanya, matangĩĩwe ũndũ wa manzĩ;

21ala memũtangĩĩa inyw’ĩ yu ta ngelekan’yo ya w’o, nayo nĩ ũvatiso, na ti kũveta ĩko ya mwĩĩ, ĩndĩ nĩ ũsũngĩo wa wasya mũseo wa ngoo mbee wa Ngai, ũndũ wa ũthayũũkyo wa Yesũ Klĩsto;

22ũla waendie ĩtunĩ na e ngalĩ ya kw’oko kwa aũme kwa Ngai: alaĩka na mokũmũ na mavinya manyivĩtw’e kwake.

← Chapter 2 Jump to: Chapter 4 →