1 Peter 2

Kamba (Mbivilia) 1956

← Chapter 1 Jump to: Chapter 3 →

1Mũkĩveta ĩndĩ ũthũku w’onthe, na ũĩ wa ũkengani w’onthe, na myangangan’yo, na iwĩu, na kwilĩanĩla kw’onthe,

2ta tũũkenge tũsyaĩtwe mĩtũkĩ, endaĩ mũno ĩia ya kĩlĩko yĩte ĩthũkye, nĩ kana mwĩane ũtangĩĩonĩ kwondũ wayo;

3ethĩwa nĩmũsamĩte kana Mwĩaĩi nĩ mũseo:

4mũkĩmũendea we, ĩvia yĩla yĩ thayũ, yaleilwe ki nĩ andũ, ĩndĩ nĩyĩnyuvĩtwe nĩ Ngai, yĩ vata mũno,

5inyw’ĩ nenyũ, ta mavia me thayũ, nĩmwakawa mwĩthĩwe nyũmba ya veva, ũthembi mũtheu, mũthembae nthembo sya veva, ila syĩtĩkĩlawa nĩ Ngai kwondũ wa Yesũ Klĩsto.

6Nĩkwĩthĩwa ndeto ii syĩ vo maandĩkonĩ, Sisya, nĩngwia nthĩnĩ wa Saioni ĩvia ĩnene ya kĩkotonĩ, ĩnyuve, yĩ vata mũno: Na ũla ũmwĩtĩkĩlaa ndakasonoka.

7Kwenyu inyw’ĩ ala mwĩtĩkĩlaa e vata mũno: ĩndĩ kwa ala matetĩkĩlaa, Ĩvia yĩla aki maleile, Nĩyo yatw’ĩkie ĩnene ya kĩkotonĩ;

8na ĩngĩ, Ĩvia ya ũtulya, na ĩvia ĩnene ya ũlulutĩkya; nũndũ nĩmalulutĩkaa nĩ ĩla ndeto, makĩmĩlea, nao maiĩwe ũndũ ũsu.

9Ĩndĩ ĩnyw’ĩ mwĩ ũsyao mũnyuve, ũthembi wa kĩũsumbĩ, mbaĩ ntheu, andũ make ki, nĩ kana mwonan’ye moseo manene ma ũla wamwĩ tie mume kĩvindunĩ mũlike kyeninĩ kyake kya ũseng’ya:

10inyw’ĩ ala tene mũtaĩ andũ, ĩndĩ yu mwĩ andũ ma Ngai: ala mũteew’ĩwe tei, ĩndĩ yu nĩmwĩw’ĩwe tei.

11Endwa, nĩngũmwĩsũva ta mwĩ ekali ma ũeninĩ na aendi ma kyalo, mwĩvathane na mĩmeo mĩthũku ya mwĩĩ, ĩla yũkitaa na ngoo;

12mwĩthĩwe na mwĩkalĩle waĩle kwa Andũ‐ma‐mbaĩ‐ingĩ; nĩ kana o na vala mamwilĩĩlaa ta mwĩ eki ma naĩ, yĩla meona meko menyu maseo, mamũtaĩe Ngai mũthenya wa kũsiw’a nĩwe.

13Ĩnyivĩsyei kĩla ũtw’ĩo wa mũndũ kwondũ wa Mwĩaĩi: ethĩwa nĩ wa mũsumbĩ, ta mũnene mbee;

14kana wa makavana, tao matũmĩtwe nĩwe kũmasilĩla ala mekaa naĩ na kũtaĩa ala mekaa nesa.

15Nĩkwĩthĩwa ũu nĩw’o kwenda kwa Ngai, nĩ kana kwondũ wa kwĩka nesa mũtonye ũvindĩthya kũtamanya kwa andũ atumanu:

16ta mwĩ athaw’a, na kũthaw’a kwenyu kũikethĩwe ũthei wa kũvw’ĩka ũthũku, ĩndĩ ta mwĩ ngombo sya Ngai.

17Taĩai andũ onthe. Endai ana‐a‐asa. Mũkĩei Ngai. Mũtaĩei mũsumbĩ.

18Athũkũmi, ĩnyivĩsyei mavwana menyu na kũkĩa kwingĩ; ti ala aseo na auu oka, ĩndĩ o na ala ai.

19Nũndũ ũu nĩ ũseo mũno, ethĩwa kwondũ wa wasya wa ngoo ũla welekele Ngaĩ, mũndũ nĩwũmĩĩasya mawoo akĩnyamaw’a ũndũ ũte wa w’o.

20Nũndũ nĩ ũtaĩo mwaũ, ethĩwa yĩla mũkwĩka naĩ, na mũikũnwa, nĩmũkũmĩĩsya? ĩndĩ ethĩwa yĩla mũkwĩka nesa, na mũithĩnw’a nĩmũkũmĩĩsya, ũu nĩw’o ũseo mũno mbee wa Ngai.

21Nũndũ mweetĩwe ũndũ ũsu: nĩkwĩthĩwa Klĩsto nake nĩwathĩniw’e kwondũ wenyu, aimũtiĩa ngelekan’yo, nĩ kana mũatĩĩae nyaĩĩ syake:

22we ũla ũtaaĩka naĩ, o na ũseleke ndwaaoneka kanyw’anĩ wake:

23we ũla, aumwa, ndaaĩumĩa; athĩnw’a, ndaakanda; ĩndĩ eeyia mwene kwa ũla ũsilaa w’o;

24nake mwene akua naĩ sitũ mwĩĩnĩ wake mũtĩnĩ ĩũlũ, nĩ kana ithyĩ, tũkw’ĩte kwa naĩ, twĩthĩwe thayũ kwa ũlũngalu; na kwondũ wa makũnwa make nĩmwavoiw’e.

25Nũndũ mwaendaa mwaĩte ta malondu; ĩndĩ yu nĩmũmũsyokee Mũĩthi na Mũsyaĩĩsya wa ngoo syenyu.

← Chapter 1 Jump to: Chapter 3 →