Galatians 2

Kamba (Mbivilia) 1956

← Chapter 1 Jump to: Chapter 3 →

1Na ĩndĩ ĩtina wa myaka ĩkũmi na ina, nambatie ĩngĩ Yelusaleme nyie na Valanava, na Tito naĩ nake.

2Nakwa nambatie nũndũ nĩnavuanĩw’e; na nĩnamonisye ũvoo mũseo ũla nĩtavanasya kwa Andũ‐ma‐mbaĩ‐ingĩ, ĩndĩ nĩnamatavisye ala maĩ na nguma me oka, nĩ kana kwa ũndũ o na wĩva ndikethĩwe ngĩsemba mana, kana nasembie mana.

3Ĩndĩ o na Tito ũla waĩ vamwe nakwa, nake aĩ Mũkiliki, ndaathing’ĩĩw’a kwaĩkwa:

4na ũu nĩ kwondũ wa ana‐a‐asa ma ũvũngũ ala malikilw’e nthĩnĩ na kĩmbithĩ, ala mavotie na kĩmbithĩ mathiane kũthaw’a kwitũ kũla twĩ nakw’o nthĩnĩ wa Klĩsto Yesũ, nĩ kana matũtwae ũkombonĩ:

5nao tũtyaamanenga ũthei ta kũmenyivĩsya, aiee, o na saa ũmwe; nĩ kana ũla w’o wa ũvoo mũseo wikale nenyu.

6Ĩndĩ kwa asu ala maĩ na nguma ya kwĩthĩwa nĩ anene (ũndũ mekalile, vai ũndũ kwakwa: Ngai ndendeeaw’a nĩ wũmbe wa mũndũ) — nao, nĩasya, ala maĩ na nguma matyaambongeleela ũndũ:

7ĩndĩ ngalĩ ĩla, ĩngĩ, yĩla moonie kana nĩwaiiwe kwakwa ũvoo mũseo nĩtavan’ye kwa ala mate aĩke, o ũndũ Vetelo waĩ na ũvoo mũseo aitavan’ya kwa ala aĩke

8(nũndũ ũla wamũtonyethisye Vetelo kwĩthĩwa mũtũmwa kwa asu aĩke wandonyethisye nĩtw’ĩke mũtũmwa kwa Andũ‐ma‐mbaĩ‐ingĩ);

9na yĩla mamanyie ũla mumo nanengiwe, Yakovo na Keva na Yoana, ala matalawa kwĩthĩwa nĩmo ituĩ, manengie nyie vamwe na Valanava moko ma aũme ma mũamba, nĩ kana ithyĩ tũthi kwa Andũ‐ma‐mbaĩ‐ingĩ, nao mathi kwa ala maĩkawa;

10ĩndĩ no ũndũ ũmwe mendie nĩ kana tũmalilikane ala ngya; naw’o ũndũ ũsu naĩ na ũthangaau kũwĩka.

11Ĩndĩ yĩla Keva wokie Andiokia, nĩnamũkananĩsye twenene, nũndũ aĩ mũsilĩle kwĩthĩwa nĩ mũvĩtan’ya.

12Nũndũ mbee wa andũ amwe matanauma kwa Yakovo, aĩsaa lĩu na Andũ‐ma‐mbaĩ‐ingĩ; ĩndĩ yĩla mookie, atundua na eevathana nao, aimakĩa asu ala maĩkawa.

13Na Ayuti ala angĩ meealyũlile vamwe nake; o na Valanava nĩwaiwe nĩ wangangan’yo woo.

14Ĩndĩ yila noonie kana maiendaa na mĩendele myaĩlu kwĩanana na ũla w’o wa ũvoo mũseo, namũtavĩsye Keva mbee wamo onthe, Ethĩwa we, wĩ Mũyuti, ũvikĩlaa maũndũ ma Andũ‐ma‐mbaĩ‐ingĩ, na ti ala ma Ayuti, kũilyĩ ata we kũingĩĩsya Andũ‐ma‐mbaĩ‐ingĩ kũvikĩlaa maũndũ ma Ayuti?

15Ithyĩ ala twĩ Ayuti kwa mũtuo witũ, na ti andũ athe ma Andũ‐ma‐mbaĩĩngi,

16ĩndĩ twĩsĩ mũndũ ndatalĩlawa ũlũngalu kwondũ wa meko ma ĩla mĩao ĩndĩ nĩ kwondũ wa kũĩkĩĩa Yesũ Klĩsto, o naitũ nĩtwĩtĩkĩlĩte Klĩsto Yesũ, nĩ kana tũtalĩlwe ũlũngalu nũndũ wa kũmũĩkĩĩa Klĩsto, na ti kwa meko ma ĩla mĩao: nĩkwĩthĩwa kwondũ wa meko ma ĩla miao vai mwĩĩ ũtonya kũtalĩlwa ũlũngalu.

17Ĩndĩ ethĩwa, yĩla twamanthie kũtalwa kwĩthĩwa alũngalu nthĩnĩ wa Klĩsto, ithyĩ naitũ twonekie twĩ andũ athe, Klĩsto nĩ mũthũkũmi wa naĩ? Aiee, kũikethĩwe ũu.

18Nũndũ ethĩwa nĩngwaka ĩngĩ maũndũ asu ala naanangie, nĩngwĩyonan’ya kana nĩ mũvĩtan’ya.

19Nũndũ kwa nzĩa ya ĩla mĩao nĩnakwie kwa ĩla mĩao, nĩ kana nĩthĩwe thayũ kwa Ngai.

20Nĩnambiwe ngelan’yonĩ vamwe na Klĩsto; na tii nyie nĩ thayũ ĩngĩ, ĩndĩ no Klĩsto wĩ thayũ nthĩnĩ wakwa: na thayũ ũũ nĩ naw’o yu mwĩĩnĩ nĩngwĩkala naw’o mũĩkĩĩonĩ, mũĩkĩĩo ũla wĩ nthĩnĩ wa Mwana wa Ngai, ũla wambendie, na eenengane kwondũ wakwa.

21Ndiũvetanga mumo wa Ngai: nũndũ ethĩwa ũlũngalu wonekaa kwondũ wa ĩla mĩao, Klĩsto akeethĩwa ta wakwie mana.

← Chapter 1 Jump to: Chapter 3 →