Galatians 5

Kamba (Mbivilia) 1956

← Chapter 4 Jump to: Chapter 6 →

1Kwa kũthaw’a, Klĩsto nũtũthaĩtye: kwondũ wa ũu ũngamai na ũlũmu, mũikalingisane ĩngĩ kwovwanĩ kwa ũkombo.

2Sisyai, nyie Vaulo nĩmwĩa, mwaĩkwa, Klĩsto ndakamũuna na ũndũ nongi.

3Ĩĩ, nĩngũkũsĩĩa ĩngĩ kĩla mũndũ ũla waĩkawa, kana e na thiĩ wa kwĩka ĩla mĩao yonthe.

4Nĩmũtaanĩtw’e na Klĩsto, inyw’ĩ ala mũkwenda kũtalĩlwa ũlũngalu kwondũ wa ĩla mĩao; nĩmwavalũkĩte kuma mumonĩ.

5Nũndũ ithyĩ kwondũ wa ũla Veva nĩtweteelaa wĩkwatyo wa ũlũngalu kwa nzĩa ya mũĩkĩĩo.

6Nũndũ nthĩnĩ wa Klĩsto Yesũ kwaĩkwa kũiaĩlya ũndũ, kana kũlea kwaĩkwa; ĩndĩ mũĩkĩĩo ũla ũtethasya wĩa kwondũ wa wendo.

7Mwasembete nesa; nũũ ũla wamũsiĩĩe mũikawĩw’e ũla w’o?

8Kũsesengwa ku kũtyumĩte kwa ũla ũmwĩtaa.

9Ĩlawa ĩnini nĩyĩkaatasya kĩmũtũ kyonthe.

10Nĩngũmũĩkĩĩa inyw’ĩ mũno nthĩnĩ wa Mwĩaĩi, kana mũikethĩwa na kĩlilikano kĩngĩ: ĩndĩ ũla ũmũthĩnasya akakua ũsilĩlo wake mwene, o na ethĩwa nũũ.

11Ĩndĩ nyie, ana‐a‐asa, ethĩwa nĩtavan’ya nzaĩko kũvika o na yu, nĩthĩnĩaw’a kĩ? Ethĩwa ũu nĩ w’o ũlulutĩkyo wa ngelan’yo nũvetetwe.

12Nenda asu meũmũthingithya maketile e mo ene.

13Nũndũ inyw’ĩ, ana‐a‐asa, mwetiwe mwĩthĩwe mwĩ athasye; ĩndĩ kũthaw’a kwenyu kũikethĩwe ũthei wa kwendeesya mwĩĩ, ĩndĩ thũkũmanai ene kwa ene kwondũ wa wendo.

14Nũndũ ĩla mĩao yonthe ĩanĩw’e ndetonĩ ĩmwe, nayo nĩ ĩno: Mwende mũtũi waku o ũndũ wĩyendete mwene.

15Ĩndĩ ethĩwa nĩmũkũumana na kũĩsana inyw’ĩ kwa inyw’ĩ, ĩsũviei mũikaminane inyw’ĩ kwa inyw’ĩ.

16Ĩndĩ nĩneena, Kinyaai mũtongoew’e nĩ Veva, na mũikeanĩsya mĩmeo ya mwĩĩ.

17Nũndũ mwĩĩ nĩwendaa ũkĩlan’ya vinya na ũla Veva, na Veva ũkĩlan’ya na mwĩĩ; nũndũ asu elĩ me na kaũ ene kwa ene; nĩ kana mũikatonye kwĩka maũndũ ala mũkwenda.

18Ĩndĩ ethĩwa nĩmũtongoeaw’a nĩ Veva, mũi ungu wa mĩao.

19Na yu mawĩa ma mwĩĩ nĩ moneku, nĩmo aa: ũlaalai, ũvuku, mĩmeo mĩthũku,

20kũthaitha mĩvw’anano, ũoi, ũmaitha, ĩteta kĩwĩu, mothilĩku, ngananĩo, ũtaanĩsyo, momanyĩsyo ma ũvũngũ,

21mawendi, ũthengi, mboka itaĩle, na maũndũ angĩ mailyĩ ta asu; kũla kwi maũndũ asu nĩmũtaa mbee, o ũndũ namũtaie, kana ala mekaa maũndũ ta asu maikatiĩwa ũsumbĩ wa Ngai.

22Ĩndĩ ũsyao wa Veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, kĩthito,

23ũuu, wĩting’o; kũĩ mwĩao kwa maũndũ ala mavw’anene na asu.

24Na ala ma Klĩsto Yesũ nĩmambĩte mwĩĩ vamwe na mĩmeo na mawendi maw’o.

25Ethĩwa twĩĩkala thayũ kwondũ wa ũla Veva, o ta ũu tũendae kwondũ wa Veva.

26Tũikekathĩĩe mana, tũikathatan’ye, na kwĩw’anĩa kĩwĩu.

← Chapter 4 Jump to: Chapter 6 →