Galatians 6

Kamba (Mbivilia) 1956

← Chapter 5 Jump to:

1Ana‐a‐asa, o na ethĩwa mũndũ ekwatwa nĩ ĩvĩtyo o na yĩva, inyw’ĩ ala mwĩ ma Veva, mũtũngĩĩei ta ũsu na veva wa ũuu; ũkĩsyaĩĩsya mwene, ndũkatatwe.

2Kuan’yai mĩio ene kwa ene, na ũu mũkeanĩsya mwĩao wa Klĩsto.

3Nũndũ ethĩwa mũndũ eĩtalĩlya kwĩthĩwa kĩndũ, nake ti kĩndũ, eĩkenga mwene.

4Ĩndĩ kĩla mũndũ aosye wĩa wake mwene, na nĩvo ĩndĩ wĩĩthĩwa na ũndũ wa kwĩkathĩĩa e we mwene, na ti kwĩelekan’ya na ũngĩ ũndũ wĩkaa.

5Kwa kwĩthĩwa kĩla mũndũ akakua mũio wake mwene.

6Ĩndĩ mũmanyĩw’a wa ĩla ndeto namũaĩe mũmanyĩsya syĩndũ syake syonthe nzeo.

7Mũikakengeke; Ngai ndavũĩawa ngũĩ: nũndũ o kĩla mũndũ ũvuĩaa, nokyo ũkaketha.

8Nũndũ ũla ũvuĩĩaa mwĩĩ wake, kwa mwĩĩ wake akaketha wanangĩko; ĩndĩ ũla ũvuĩĩaa ũla Veva, kwa Veva akaketha thayũ ũtathela.

9Na tũikanoe nĩ kwĩka nesa: nũndũ kyathĩ kyavika tũkaketha, ethĩwa tũileela.

10Kwondũ wa ũu, o ũndũ twĩĩthĩwa na ũthei, twĩkei andũ onthe nesa, ĩndĩ mũno ala ma nyũmba ya mũĩkĩĩo.

11Sisyai ũndũ maandĩko manenevete aa ngũmũandĩkĩa na kw’oko kwakwa mwene.

12Onthe ala mekwenda kwoneka me aseo mwĩĩnĩ, nĩmeũmũthing’ĩĩsya mwaĩkwe; no kana maikathĩnw’e nũndũ wa ngelan’yo ya Klĩsto.

13Nũndũ o na asu ala maĩkawa nao ene matikwataa ĩla mĩao; ĩndĩ nĩmekwenda inyw’ĩ mwaĩkwe, nĩ kana mone ũndũ wa kwĩkathĩĩa mĩĩnĩ yenyu.

14Ĩndĩ kũikethĩwe nyie kwĩkathĩĩa, ate o ngelan’yonĩ ya Mwĩaĩi waitũ Yesũ Klĩsto, nayo kwondũ wayo nthĩ nĩyambĩtwe kwakwa, nakwa kwa nthĩ.

15Nũndũ kwaĩkwa ti ũndũ, o na kũlea kwaĩkwa, ĩndĩ nĩ kyũmbe kyeũ.

16Na onthe ala makaendaa maatĩĩe kĩeleelo kĩĩ, mũuo nĩwĩthĩwe kwamo, na tei, o na kwa Isilaeli ma Ngai.

17Kuma yu mũndũ o na wĩva ndakanyamasye; nũndũ nĩngũkua movano ma Yesũ mwĩĩnĩ wakwa.

18Mumo wa Mwĩaĩi waitũ Yesũ Klĩsto nĩwĩthĩwe vamwe na maveva menyu, ana‐a‐asa. Ameni.

← Chapter 5 Jump to: