Galatians 4

Kamba (Mbivilia) 1956

← Chapter 3 Jump to: Chapter 5 →

1Ĩndĩ nĩneena kana ĩvinda ya mũtiĩwa e kana, nde kĩvathũkan’yo na ngombo, o na kau nĩ mwene wa syĩndũ syonthe;

2ĩndĩ ke ungu wa asũvĩi na asyaĩĩsya ma syĩndũ syako, kũvika ũla mũthenya watwiwe nĩ ĩthe.

3Naitũ no ta ũu, yĩla twaĩ syana, twalũlũmĩlw’e ũkombonĩ momanyĩsyonĩ ma kwambĩlĩlya ma nthĩ:

4ĩndĩ wianĩu wa ĩvinda wooka, Ngai atũma Mwana wake, wasyaiwe nĩ mũndũ mũka, wasyaiwe ungu wa ĩla mĩao,

5nĩ kana amovosye asu ala maĩ ungu wa ĩla mĩao, nĩ kana tũtuwe ana.

6Na kwa kwĩthĩwa mwĩ ana, Ngai atũmie Veva wa Mwana wake alike ngoonĩ sitũ, akĩtanaa, akyasya, Nau, Asa.

7Na yu ndwĩ ngombo ĩngĩ, ĩndĩ wĩ mwana; na ethĩwa wĩ mwana, wĩ mũtiĩwa ĩndĩ kwondũ wa Ngai.

8Ĩndĩ ĩvinda yĩu, kwa kwĩthĩwa mũtyamwĩsĩ Ngai, mwatwĩe mwĩ ngombo sya ngai ila kwa mũtuo wasyo ti ngai:

9ĩndĩ yu mwamũmanya Ngai, kana kavaa kwasya nĩmwĩsĩkĩwe nĩ Ngai, mũtonya ata kwĩthyũũa na kũsyokea ĩngĩ momanyĩsyo ma kwambĩlĩlya ala monzu na ala mate vata, ala kwondũ wamo nĩmũkwenda kũsyoka ũkombonĩ ĩngĩ?

10Nĩmũsũvĩaa mĩthenya, na myei, na mavinda, na myaka.

11Nĩngũkĩa nũndũ wenyu, no kwĩthĩwa nathĩnĩe wĩa kwondũ wenyu mana.

12Nĩngũmwĩsũva, ana‐a‐asa, ĩthĩwai tondũ nĩilyĩ, nĩkwĩthĩwa nyie nĩilyĩ tondũ inyw’ĩ mũilyĩ. Mũtyaambĩka naĩ:

13ĩndĩ nĩmwĩsĩ kana nũndũ wa wonzu wa mwĩĩ ĩvinda ya mbee nĩnatavanisye ũvoo mũseo kwenyu:

14na ũndũ ũla waĩ ũtatwa kwenyu mwĩĩnĩ wakwa mũtyaavũthya, kana kũlea; ĩndĩ mwambosa ta mũlaĩka wa Ngai, o ta Klĩsto Yesũ.

15Kũĩva ĩndĩ kwĩyĩta aathime? Nũndũ nĩngũmũkũsĩĩa, kana, kethĩwa nĩ ũndũ ũla waĩ ũtonyeka, mwĩthĩwa mwanumĩsye metho menyu mũkanenga.

16Na ĩndĩ yu nĩtw’ĩkĩte mũmaitha wenyu, nũndũ wa kũmũtavya ũla w’o?

17Nĩmeũmũmantha na ũthangaau, ĩndĩ ti kwa ũseo; aiee, nĩmekwenda kũmũvingĩa nza, nĩ kana inyw’ĩ mũmamanthe.

18Ĩndĩ nĩ ũseo kũmanthawa na ũthangaau ũndũnĩ ũseo mavinda onthe, na ti o yĩla nĩ vamwe nenyu.

19Syana syakwa nini, ĩla ngwaũnyĩa ĩngĩ mũvaka Klĩsto ombĩke nthĩnĩ wenyu,

20ĩĩ, nenda nĩthĩwe vamwe nenyu oyu, na kũalyũla wasya wakwa; nũndũ nĩngũsaanĩw’a nĩ inyw’ĩ.

21Ndavyaĩ, inyw’ĩ ala mũkwenda kwĩthĩwa ungu wa mĩao, mũtimĩw’aa ĩla mĩao?

22Nũndũ nĩkũandĩkĩtwe, kana Avalaamu aĩ na ana elĩ aũme, ũmwe asyaĩtwe nĩ ngombo, na ũngĩ asyaĩtwe nĩ mũndũ mũka ũtaĩ ngombo.

23Ĩndĩ mwana ũla wasyaiwe nĩ ngombo asyaiwe kwondũ wa mwĩĩ; na mwana ũla wasyaiwe nĩ mũndĩ mũka ũtaĩ ngombo asyaiwe kwondũ wa watho.

24Maũndũ asu me na ngelekan’yo: nũndũ aka asu nĩ motianĩo elĩ; ũmwe waumie kĩĩmanĩ kya Sinai, ũla ũsyaaa syana sya ũkombo, naw’o nĩ Akali.

25Na Akali ũsu nĩ kĩĩma kya Sinai kĩla kĩ nthĩ ya Alavu, na kĩvw’anene na Yelusaleme ya ĩvinda yĩĩ: nũndũ ĩ ũkombonĩ vamwe na syana syayo.

26Ĩndĩ Yelusaleme ĩla yĩ ĩũlũ nĩ nthasye, nayo nĩ inyia waitũ.

27Nũndũ nĩkũandĩkĩtwe, Tana, we ngũngũ ũtaasyaa; Ũkĩlya wasya ũsĩĩlĩle, we ũla ũtaaũnya: Nũndũ syana sya ũla ũtwĩe e weka nĩ mbingĩ kũte sya ũla wĩ na mũũme.

28Ĩndĩ ithyĩ, ana‐a‐asa, twĩ syana sya watho, o ta Isaka.

29Ĩndĩ o ta ĩvinda yĩu, ũla wasyaiwe kwondũ wa mwĩĩ athĩnisye ũsu wasyaiwe kwondũ wa veva, na ĩvinda yĩĩ no ta ũu.

30Ĩndĩ maandĩko measya ata? Mũlũngye mũndũ mũka ngombo na mwana wake: nũndũ mwana wa ngombo ndakatiĩwa vamwe na mwana wa ũla ũte ngombo.

31Kwondũ wa ũu, ana‐a‐asa, ithyĩ tũi syana sya ngombo, ĩndĩ twĩ syana sya mũndũ mũka ũte ngombo.

← Chapter 3 Jump to: Chapter 5 →