Galatians 3

Kamba (Mbivilia) 1956

← Chapter 2 Jump to: Chapter 4 →

1Inyw’ĩ Akalatia mũte na kĩlĩko, nũũ, ũla ũmũalyũlĩte inyw’ĩ ala Yesũ Klĩsto wonanĩtw’e nesa mbee wa metho menyu ambĩtwe?

2Nĩngwenda kũmanya ũndũ ũũ ũmwe kwenyu, Mwosete ũla Veva nũndũ wa meko ma ĩla mĩao, kana nũndũ wa kwĩw’a kumĩte mũĩkĩĩonĩ?

3Kaĩ, mũtumanĩte ũũ? Mwambĩlĩlye Vevanĩ, na yu mwĩĩanĩw’a mwĩĩnĩ?

4Nĩmwathĩnie mathĩna maingĩ meana ũu mana? Ethĩwa nĩ w’o ni mana.

5Ĩndĩ we ũla ũmũnengae ũla Veva, na kwĩka mavinya katĩ wenyu, nĩwĩkaa kwondũ wa meko ma ĩla mĩao, kana nũndũ wa kwĩw’a kumĩte mũĩkĩĩonĩ?

6O ũndũ Avalaamu wetĩkĩlile Ngai, na nĩkwatalilwe kwake kwĩthĩwa ũlũngalu.

7Manyai ĩndĩ kana ala me na mũĩkĩĩo, asu nĩo ana ma Avalaamu.

8Na ũandĩko, woonie mbee kana Ngai akamatalĩla Andũ‐ma‐mbaĩ‐ingĩ ũlũngalu kwondũ wa mũĩkĩĩo, watavisye Avalaamu ũvoo mũseo tene, ũkyasya, Nthĩnĩ waku mbaĩ syonthe nikaathimwa.

9Na kwondũ wa ũu ala ma mũĩkĩĩo nĩmaathimĩtwe vamwe na Avalaamu ũla waĩ mũĩkĩĩi.

10Nũndũ onthe ala ma meko ma ĩla mĩao me ungu wa kĩumo: nũndũ nĩkũandĩkĩtwe, Nũumanĩwe kĩla mũndũ ũtekalaa aiĩkaa maũndũ onthe ala maandĩkĩtwe ĩvukunĩ ya mĩao.

11Ĩndĩ nĩkwonekete kana vai mũndũ ũtalĩlawa ũlũngalu kwa Ngai kwondũ wa ĩla mĩao: nũndũ, Ũla mũlũngalu akekala thayũ kwondũ wa mũĩkĩĩo;

12na ĩla mĩao ti ya mũĩkĩĩo; ĩndĩ, Ũla wĩkaa maũndũ ma ĩla mĩao akekala thayũ nthĩnĩ wayo.

13Klĩsto atwovoisye kuma kĩumonĩ kya ĩla mĩao, nũndũ nĩwatw’ĩkie kĩumo kwondũ witũ; nĩkwĩthĩwa nĩkũandĩkĩtwe, Nũumanĩwe, kĩla mũndũ ũsũaw’a mũtĩnĩ ĩũlũ:

14nĩ kana ũathimo wa Avalaamu nthĩnĩ wa Klĩsto Yesũ ũtonye ũmavikĩa Andũ‐ma‐mbaĩ‐ingĩ; nĩ kana ithyĩ tũtonye kwosa watho wa Veva kwondũ wa mũĩkĩĩo.

15Ana‐a‐asa, nĩngũneena o tondũ andũ makothaa kũneena: O na ethĩwa no ũtianĩo wa mũndũ, ĩndĩ yĩla ũlũlũmĩlw’e, vai mũndũ ũkoveta, kana kũwongela ũndũ.

16Na ĩndĩ Avalaamu nĩwe wataviw’e matho, na ũsyao wake. Ndaasya, Kwa mosyao, ta andũ aingĩ; ĩndĩ ta mũndũ ũmwe, Kwa ũsyao waku, naw’o nĩ Klĩsto.

17Ĩndĩ nĩngũneena ũũ: Ũtianĩo walũlũmĩlw’e mbee nĩ Ngai, ĩla mĩao, ĩla yokie ĩtina wa myaka maana ana na mĩongo ĩtatũ, ndyaananga, ta kũtw’ĩkĩthya watho ta wa mana.

18Nũndũ ethĩwa ũtiĩwa nĩ kwondũ wa ĩla mĩao, ti wa watho ĩngĩ: ĩndĩ Ngai amũnengie Avalaamu nũndũ wa watho.

19Ĩndĩ ĩla mĩao nĩ myaũ? Yongeleelwe nũndũ wa mavĩtyo, kũvika yĩla ũsyao ũkoka ũla wathiwe watho; na yatwiwe nĩ alaĩka ĩnenganĩtwe na kw’oko kwa mwĩw’anĩthya.

20Ĩndĩ mwĩw’anĩthya ndethĩawa mwĩw’anĩthya wa ũmwe; ĩndĩ Ngai ni ũmwe.

21Ĩndĩ mĩao ko ĩkananĩsye matho ma Ngai? Aiee: kũikethĩwe ũu: nũndũ ethĩwa kwaĩ mwĩao wanenganiwe ũla ũtonya kũnenga andũ thayũ, nĩ w’o ũlũngalu wĩthĩwa waĩ wa ĩla mĩao.

22Ĩndĩ maandĩko nĩmavingĩĩte maũndũ onthe ungu wa naĩ, nĩ kana watho kwondũ wa mũĩkĩĩo nthĩnĩ wa Yesũ Klĩsto, ũtonye ũnengwa ala metĩkĩlaa.

23Ĩndĩ mbee wa mũĩkĩĩo ũtanoka, twekalĩte twovetwe ungu wa mĩao, tũvingĩĩtwe kũvika ũla mũĩkĩĩo ũkonanw’a.

24Kwondũ wa ũu ĩla mĩao yatw’ikie mũmanyĩsya waitũ kũtũete kwa Klĩsto, nĩ kana tũtonye kũtalĩlwa ũlũngalu kwondũ wa mũĩkĩĩo.

25Ĩndĩ yu, mũĩkĩĩo wooka, tũi ungu wa mũmanyĩsya ĩngĩ.

26Nũndũ inyw’onthe mwĩ ana ma Ngai, kwondũ wa mũĩkĩĩo, nthĩnĩ wa Klĩsto Yesũ.

27Nũndũ inyw’ĩ o ala mwavatisiwe kũlikw’a nthĩnĩ wa Klĩsto nĩmwĩvw’ĩkĩte Klĩsto.

28Kũitonya kwĩthĩwa Mũyuti o na Mũkiliki, na kũitonya kwĩthĩwa mwove na ũte mwove, na kũitonya kwĩthĩwa mũndũ mũũme na mũndũ mũka; nũndũ inyw’onthe mwĩ ũmwe nthĩnĩ wa Klĩsto Yesũ.

29Na ethĩwa mwĩ ma Klĩsto, mwĩ ũsyao wa Avalaamu, na atiĩwa kwĩanana na watho.

← Chapter 2 Jump to: Chapter 4 →