Genesis 14

Kamba (Mbivilia) 1956

← Chapter 13 Jump to: Chapter 15 →

1Na kweethĩwa matukũ ma Amulaveli mũsumbĩ wa Sinali, na Alioko mũsumbĩ wa Elasali, na Ketololaomeli mũsumbĩ wa Elamu, na Titali mũsumbi wa Ngoiimu,

2makwatya kaũ na Vela mũsumbĩ wa Sotomo, na Mbilisa mũsumbĩ wa Ngomola, na Sinavu mũsumbĩ wa Atima, na Semeveli mũsumbĩ wa Nzevoiimu, na mũsũmbĩ wa Mbela (nĩyo Nzoali).

3Asu onthe makomanĩa mwandanĩ wa Sitimi (nĩw’o Ũkanga wa Mũnyũ).

4Myaka ĩkũmi na ĩlĩ mathũkũmaa Ketololaomeli, na mwaka wa ĩkũmi na ĩtatũ mamũng’endea.

5Na mwaka wa ĩkũmi na ĩna Ketololaomeli ooka na asũmbĩ ala maĩ nake, na makũnĩa Alevai nthĩnĩ wa Asetelothi‐kalinaimu, na Asusi nthĩnĩ wa Amu, na Aemi nthĩnĩ wa Save‐kiliathaimu.

6Na Aoli kĩĩmanĩ kyoo Seili, kũvika Eli‐valani, ĩla yĩ ũtee wa weũ.

7Na masyoka, na mavika Eni‐misivati (nĩyo Katesi), makũna nthĩ yonthe ya Aamaleki, o na ya Aamoli, ala matwĩe Asasoni‐tamali.

8Na mũsũmbĩ wa Sotomo, na mũsumbĩ wa Ngomola, na mũsũmbĩ wa Atima, na mũsumbĩ wa Nzevoiimu, na mũsumbĩ wa Mbela (nĩyo Nzoali) maumaala; na maselelya ita mamelekele mwandanĩ wa Sitimi;

9mokite na Ketololaomeli mũsũmbĩ wa Elamu, na Titali mũsumbĩ wa Ngoiimu, na Amulaveli mũsumbĩ wa Sinali, na Alioko mũsumbĩ wa Elasali; asumbĩ ana mokite na atano.

10Na ĩndĩ mwanda wa Sitimi wausũĩte maima ma lami; na asumbĩ ma Sotomo na Ngomola makũka, na mavalũka vo, na ala matialile makũka maelete kĩĩmanĩ.

11Na makua ũthwii w’onthe wa Sotomo na Ngomola, na lĩu woo w’onthe, na makwata nzĩa mathi.

12Na moosa Loto, mwana wa mwana‐a‐inyia wa Avalamu, ũla watwĩe Sotomo, na ũthwii wake, na mathi.

13Na ũmwe ũla wavonokie ooka, na atavya Avalamu Mũevelania: nake atwĩe mĩtĩnĩ ya myaloni yĩ Mamile, Mũamoli, mwana‐a‐inyia wa Esikoli, na mwana‐a‐inyia wa Aneli; nao nĩmeew’anĩte na Avalamu.

14Na yĩla Avalamu wewie kana mwana‐a‐ĩthe nũtavĩtwe, aumya andũ make ala wamamanyĩĩtye, ala masyaĩwe nyũmbanĩ yake, maana atatũ na ĩkũmi na nyanya, na amaatĩĩa kũvika Ndani.

15Na ũtukũ eeyĩaan’ya okite nao, we na athũkũmi make, na amakũna, na amaatĩĩa kũvika Ova, ĩla yĩ ngalĩ ya kw’oko kwa aka ya Ndamasiku.

16Nake atũnga ũthwii w’onthe, na ĩngĩ atũnga mwana‐a‐ĩthe Loto, na ũthwii wake, na aka nao na andũ.

17Na mũsumbĩ wa Sotomo athi kũmũthaũa, ĩtina wa kũsyoka kwake kuma kũaa Ketololaomeli na asumbĩ ala maĩ vamwe nake, mwandanĩ wa Save (nĩw’o Mwanda wa Mũsumbĩ).

18Na Melikiseteki mũsumbĩ wa Saleme aete kĩmũtũ na mbinyu: nake aĩ mũthembi wa Ngai Ũla Wĩ Ĩũlũ wa Onthe.

19Na amũathima, na asya, Naathimwe Avalamu wa Ngai Ũla Wĩ Ĩũlũ wa Onthe, mwene wa ĩtu na nthĩ:

20na nataĩwe Ngai Ũla wĩ Ĩũlũ wa Onthe, ũla ũnenganĩte amaitha maku kw’okonĩ kwaku. Na amũnenga kĩlungu kya ĩkũmi kya syonthe.

21Na mũsumbĩ wa Sotomo amwĩa Avalamu, Nenga andũ, na ũkĩyosea ũthwii.

22Na Avalamu amwĩa mũsumbĩ wa Sotomo, Nĩnookĩlya kw’oko kwakwa kwa Yeova, Ngai Ũla Wĩ Ĩũlũ wa Onthe, mwene wa ĩtu na nthĩ,

23kana ndikosa ũlii, kana ũlii wa kĩatũ, kana kĩndũ o na kĩva kyaku, ndũkese kwasya, Nĩthuĩtye Avalamu:

24ate o kĩla anake maĩe, na kĩlungu kya andũ ala maendie nakwa, Aneli, na Esikoli, na Mamile; asu nĩmose kĩlungu kyoo.

← Chapter 13 Jump to: Chapter 15 →