James 1

Kamba (Mbivilia) 1956

Jump to: Chapter 2 →

1Yakovo, ngombo ya Ngai na ya Mwĩaĩi Yesũ Klĩsto, valũa ũũ wakwa wivikĩe ila mbaĩ ĩkũmi na ili syi Ũnyaĩĩkyonĩ, nĩ ngethi.

2Ana‐a‐asa makwa ĩtalĩlei kwĩthĩwa nĩ ũtanu mũthei, yila mũũlika matatwanĩ ma mĩthemba mingĩ;

3mũkĩmanya atĩ kũtatwa kwa mũĩkĩĩo wenyu kũetae wũmĩĩsyo.

4Na wũmĩĩsyo nĩwĩthĩwe na wĩa waw’o mwĩanĩũ, nĩ kana inyw’ĩ mũtw’ĩke eanĩu na aima, mũtatielye ũndũni o na wĩva.

5Ĩndĩ ethĩwa ũmwe wenyu nũtielye ũĩ, namũvoye Ngai, ũla ũnengae andũ onthe na ũlau na ndeũkan’ya; nake akanengwa.

6Ĩndĩ navoye na mũĩkĩĩo, ate nzika nongi: nũndũ ũla ũĩsaa nzika ailyĩ ta kĩtũlũmo kya ũkanga kĩkyũkĩlangw’a nĩ kĩseve na kũtwawa kũũ na kũũ.

7Nũndũ mũndũ ũsu ndakatalĩlye kana akanengwa kĩndũ o na kĩva nĩ Mwĩaĩi;

8mũndũ wĩ na mĩtwe ĩlĩ, ũtalũmaa nzĩanĩ syake syonthe.

9Ĩndĩ mwana‐a‐asa ũla ũte ndaĩa natane ũndũ wa kũnenevw’a kwake:

10na ũla mũthwii, ũndũ wa kũnyivĩw’a kwake: nĩkwĩthĩwa o ta ĩlaa ya nyeki akavĩta.

11Nũndũ syũa nĩyumaa vamwe na kĩseve kĩla kĩvĩvasya, na kũmya nyeki; na ĩlaa yasyo nĩyĩtĩkaa, na ũseo wa wũmbĩle wayo nĩwaaa: o ta ũu nake mũthwii akaaĩa mĩendelenĩ yake.

12Nĩ mũathime mũndũ ũla wũmĩĩasya matatwa; nũndũ eetĩkĩlwa, akanengwa ngovia ya ũsumbĩ ya thayũ, ĩla Mwĩaĩi wamathie ala mamwendaa.

13Mũndũ o na wĩva atatwa ndakasye, Nĩngũtatwa nĩ Ngai; nũndũ Ngai ndatonya kũtatwa nĩ ũthũku, o nake mwene ndatataa mũndũ:

14ĩndĩ kĩla mundũ atatawa akĩkusw’a na kũkengwa nĩ ĩtomo yake mwene.

15Na ĩndĩ ĩtomo yaya ĩvu, yĩsyaaa naĩ: na ĩla naĩ yeana, ĩsyaaa kĩkw’ũ.

16Mũikakengwe, ana‐a‐asa makwa endwa.

17Kĩla kũnengwa kũseo na kĩla kũnengwa kwĩthĩanu nikumaa ĩũlũ, kũtheeaa kuma kwa Ĩthe wa syeni, na kwake kũitonyeka kwĩthĩwa kũalyũkĩka, kana kyuu kya kũalyũka.

18Kwondũ wa kwenda kwake nũtũsyaĩte na ndeto ya ũla w’o, nĩ kana twĩthĩwe twĩ mosyao ma mbe ma syũmbe syake.

19Nĩmwĩsĩ ũu, ana‐a‐asa makwa endwa. Ĩndĩ kĩla mũndũ nĩethĩwe mwiwi wa mĩtũki, na kũlea kũneena mĩtũkĩ, na kũlea kũthata mĩtũkĩ:

20nũndũ ũthilĩku wa mũndũ ndwĩkaa ũlũngalu wa Ngai.

21Kwondũ wa ũu ĩndĩ vetai kũasa nenyu ũvukyo w’onthe na wingĩ wa ũthũku, mũkyosa na ũuu ndeto ĩla ĩvandĩtwe, ĩla ĩtonya kũtangĩĩa mathayũ menyu,

22Ĩndĩ ĩthĩwai mwĩ eki ma ndeto, na ti ewi oka, mũkĩkenga ene.

23Nũndũ ethĩwa mũndũ ni mwĩwi wa ndeto na ti mwĩki, ailyi mũndũ ũla ũsyaasya ũthyũ wake, ũla wasyaiwe naw’o, kĩsisyonĩ:

24nũndũ esisya mwene, na aithi, oyu niwũlawa ũndũ eĩĩlyi.

25Ĩndĩ ũla ũsyaasya nthĩnĩ wa mwĩao mwĩthĩanu, naw’o nĩ mwĩao wa ũthasyo, na ekalaa vo, na akĩthĩwa ti mwĩwi ũla wũlawa ĩndĩ nĩ mwĩki ũla wĩkaa, mũndũ ũsu akaathimwa mawĩanĩ ala wĩkaa.

26Ethĩwa mũndũ o na wĩva eyonaa mwene ta ũmũkĩaa Ngai, na ndeũsiĩĩa ũĩmĩ wake ĩndĩ ekenga ngoo yake, kũmũkĩa Ngai kwa mũndũ ũsũ nĩ kwa mana.

27Kũmũkĩa Ngai kũla kũtheu na kũte na ũthũku mbee wa Ngai Asa waitũ nĩ kũũ, kũthi, kũsisya syana ila ikw’ĩĩwe nĩ aaĩthe na aka ndiwa thĩnanĩ woo, na kwĩsũvĩa mwene ndakavukw’e nĩ maũndũ ma nthĩ.

Jump to: Chapter 2 →