James 2

Kamba (Mbivilia) 1956

← Chapter 1 Jump to: Chapter 3 →

1Ana‐a‐asa makwa, mũĩkakwatanĩsye mũĩkiĩo wa Mwĩaii waitũ Yesũ Klĩsto, Mwĩaii ũla ũtaĩawa, na wendeesyo wa andũ.

2Nũndũ ethĩwa vakooka ũmbanonĩ wenyu mũndũ wĩ na ngome ya thaavu, wĩkĩĩte ngũa nzeo, na vakooka mũndũ ũngĩ ngya wĩkĩĩte ngũa nthũku;

3na inyw’ĩ mũkĩmũtaĩa ũla wĩkĩĩte ngũa nzeo mũkĩmwĩa, Ĩkala nthĩ vaa vandũ vaseo; na mũkĩmwĩa ũla ngya, Naku ũngama vaya, kana ĩkala nthi maũũnĩ makwa;

4mũtikwĩvathan’ya inyw’ĩ, na kũtw’ĩka asili me na malilikano mathũku?

5Ĩthukĩĩsyei, ana‐a‐asa endwa; Ngai ndaamanyuva ala ngya ma kũũ nthĩ methĩwe athwii mũĩkĩĩonĩ, na atiĩwa ma ũsumbĩ ũla wamathie ala mamwendaa?

6Ĩndĩ inyw’ĩ nĩmwanangĩe ndaĩa ũla ngya. Ala athwii maiũmũthĩn’ya, na kũmũtwaa na vinya mbee wa ivĩla sya sila?

7Matiũyiuma syĩtwa yĩ ndaĩa yĩla mwĩtanĩaw’a nayo.

8Ĩndĩ ethiwa mũkeanĩsya mwiao ũla ũkĩlĩte ĩla ĩngĩ yonthe, kwĩanana na maandĩko, Mwende ũngĩ o tondũ wiyendete mwene, mmwĩkaa nesa:

9ĩndĩ ethiwa mwĩendeesya andũ, nĩmũkwĩka nai na nĩmũũsilĩlwa nĩ ĩla mĩao kwĩthĩwa avĩtan’ya.

10Nĩkwĩthĩwa mũndũ o na wĩva asũvĩa ĩla mĩao yonthe, na avĩtya kamwe kayo, atw’ĩkĩte avĩtĩtye yonthe.

11Nũndũ ũla waisye, Ndũkalaalae, nowe waisye, Ndũkoae. Ĩndĩ walea kwĩka ũlaalai, ĩndĩ nũkũaa, nũtw’ĩkĩte mũvĩtan’ya wa ĩla mĩao.

12Neenaaĩ na ĩkaai ta andũ ala makasilĩlwa nĩ mwĩao wa ũthasyo.

13Nũndũ ũsilĩlo ndwĩ na tei kwa ũla ũleaa kwĩw’ĩa angĩ tei: tei wĩtaiaa ĩũlũ wa ũsilĩlo.

14Kũuna kyaũ, ana‐a‐asa makwa, ethĩwa mũndũ easya e na mũĩkĩĩo, ĩndĩ nde na meko? Mũĩkĩĩo ũsu nũtonya kũmũtangĩĩa?

15Ethĩwa mwana‐a‐asa kana mwĩĩtu‐a‐asa nde na ngũa na aĩwe nĩ kya ũya.

16Na ũmwe wenyu aimea, Endai na ũvoo, mũkote mwaki na kũvũna; ĩndĩ mũiũmanenga syĩndũ syĩ vata sya mwĩĩ; kũuna kyaũ?

17O ta ũu mũĩkĩĩo, ethĩwa ndwĩ na meko, nĩ mũkw’u naw’o.

18Ĩĩ, mũndũ nũtonya kwasya, We, wĩ na mũĩkĩĩo, nakwa nĩ na meko: mbon’ya mũĩkĩĩo waku ute na meko, nakwa nĩngũkwon’ya mũĩkĩĩo wakwa na meko makwa.

19We wĩtĩkĩlaa, atĩ Ngai nĩ ũmwe; wĩkaa nesa: ndaimoni nasyo nĩsyĩtĩkĩlaa, na kũtetema.

20Ĩndĩ nũkwenda kũmanya, we mũndũ wa mana, kana mũĩkĩĩo ũte na meko ndwĩ na ũsyao?

21Avalaamu, ĩthe waitũ, ndaatalĩlwa ũlũngalu ũndũ wa meko, yĩla wathembie Isaka mwana wake kĩthembeonĩ?

22Nũkwona ũndũ mũĩkĩĩo watethanisye na meko make, na kwondũ wa meko mũĩkĩĩo nĩweanĩw’e;

23na maandĩko nĩmeanĩw’e ala maĩtye, Na Avalaamũ nĩwetĩkĩlĩle Ngai, na kwatalilwe kwake nĩ ũlũngalu; na nĩwetiwe mũnyanyae wa Ngai.

24Nĩmũkwona ũndũ mũndũ ũtalĩlawa ũlũngalu kwondũ wa meko, na ti kwondũ wa mũĩkĩĩo wi w’oka.

25No ta ũu Laavi, yĩla ĩlwaya, ndaatalĩlwa ũlũngalu kwondũ wa meko, amathokya ala matũmĩtwe, na amaumaalya mathi na nzĩa ĩngĩ?

26Nũndũ o tondũ mwĩĩ ũte na veva nĩ mũkw’ũ, no ta ũu mũĩkĩĩo ũte na meko nĩ mũkw’ũ.

← Chapter 1 Jump to: Chapter 3 →