James 4

Kamba (Mbivilia) 1956

← Chapter 3 Jump to: Chapter 5 →

1Kaũ na kũkita kwĩ katĩ wenyu kumaa va? Kũtyumaa vau mĩmeonĩ mĩthũku yenyu ĩla yũkitaa mamuthanĩ menyu?

2Nĩmwendaa, na mũti na kĩndũ: nĩmũaa, na kwĩw’ĩaa kĩwĩu, na mũtitonya kwosa; nĩmũkwatasya kaũ na kũkita; na mũi na kĩndũ nũndũ mũivoyaa.

3Nĩmũvoyaa, na mũtĩunengwa nũndũ nĩmũvoyaa naĩ, nĩ kana mwanange motanunĩ menyu.

4Inyw’ĩ ilaalai, mũiĩsĩ kana ũnyanya wa nthĩ nĩ ũmaitha na Ngai? Kwondũ wa ũu o ũla ũkwenda kwĩthĩwa e mũnyanyae wa nthĩ nũtw’ĩkĩte mũmaitha wa Ngai.

5Kana mwĩtalĩlya maandĩko meneena mana? Veva ũla ũtwĩe nthĩnĩ waitũ nĩwendaa kũvika kwĩw’ĩa kĩwĩũ?

6Ĩndĩ nũtũnengae mumo mwingĩ mbee. Kwondũ wa ũu maandĩko maĩtye, Ngai nũmasiĩĩaa ala me na wing’athĩlĩlyo, ĩndĩ nũmanengae mumo ala me na wĩnyivyo.

7Ĩnyivyei ĩndĩ kwa Ngai; ĩndĩ mũsiĩĩei ndevili, nake akamũkĩa.

8Mũthengeei Ngai, nake akamũthengeea inyw’ĩ. Thambyai moko menyu, inyw’ĩ athe; na mũithesya ngoo syenyu, inyw’ĩ mwĩ na mĩtwe ĩlĩ.

9Ĩthĩn’yei, na kũmeta, na kũĩa: kũtheka kwenyu nikũalyũlwe kĩmeto, na ũtanu wenyu ũalyũlwe kĩmako.

10Ĩnyivyei mbee wa Mwĩaĩi, nake akamũnenevya.

11Mũikailĩanĩle, ana‐a‐asa. Ũla ũmwilĩĩlaa mwana‐a‐ĩthe, kana kũmũsilĩla, amilĩĩlaa ĩla mĩao, na amĩsilaa ĩla miao: ĩndĩ ethĩwa ũsilĩlaa ĩla mĩao, nũtw’ĩkĩte ndwĩ mwĩki wa ĩla mĩao, ĩndĩ wĩ mũsili.

12Mũnengani wa mĩao na mũsili no ũmwe, nake nĩ ũla ũtonya kũtangĩĩa na kwananga: ĩndĩ we wĩ ũũ ũla ũsilĩlaa ũngĩ?

13Ĩndĩ yu, ala mũkwasya, Ũmũnthĩ kana ũnĩ tũkathi ndũanĩ ĩno, na kwĩkala vo mwaka, tũkĩtandĩthya, na kwona ũtandĩthyo:

14na ĩndĩ mũiĩsĩ maũndũ ũndũ meĩthĩwa ũnĩ. Thayũ wenyu nĩ kyaũ? Nũndũ mwĩ mĩthũmũ ĩla yonekaa kavinda kanini, na ĩkyaa.

15Nĩkwĩthĩwa ũndũ mwaĩle kwasya nĩ atĩĩ, Ethĩwa nĩ kwenda kwa Ngai tũkeethĩwa thayũ, na kwĩka ũna na ũna.

16Ĩndĩ yu mwĩĩkathĩĩa wĩnenevyonĩ wenyu: kwĩkathĩĩa kw’onthe kũilyĩ ũu nĩ kũthũku.

17Ũla wĩsĩ kwĩka nesa, na ndekaa, kwa ũsu nĩ naĩ.

← Chapter 3 Jump to: Chapter 5 →