James 3

Kamba (Mbivilia) 1956

← Chapter 2 Jump to: Chapter 4 →

1Mũikethĩwe amanyĩsya aingĩ, ana‐a‐asa makwa, mũkĩmanya kana ithyĩ tũkasilĩlwa na ũsilĩlo mũnene kũvĩta ala angĩ.

2Nũndũ maũndũnĩ maingĩ ithyonthe nĩtũlulutĩkaa. Ethĩwa mũndũ ndalulutĩkaa ndetonĩ, ũsu nĩ mũndũ mwĩanĩu, ũtonya kũvota o na mwĩĩ wake w’onthe.

3Na ethĩwa nĩtwĩkĩaa mĩkwa na itanga makanyw’anĩ ma mbalasi nĩ kana itwĩw’e, nĩtũthyũũaa mĩĩ yasyo yonthe.

4Sisyai, ngalawa nasyo, o na kau inenevete ũu, na kũtwawa nĩ kĩseve kyai, nithyũũawa nĩ sukani nini mũno, o kũla mũtwai ũnũkwenda.

5O ta ũu ũĩmĩ nĩ mutha mũnini, naw’o wĩkathĩĩaa na maũndũ manene. Sisyai, ũndũ mwaki mũnini ũvĩvasya kĩtheka kĩnene mũno!

6Na ũĩmĩ nĩ mwaki: nthĩ ya ũthũku mamuthanĩ maitũ nĩ ũĩmĩ ũla ũvukasya mwĩĩ w’onthe, na nũkwatasya mwaki mosyaanĩo onthe, naw’o nĩwakanaw’a mwaki nĩ Ngiena.

7Nũndũ kĩla mũthemba wa nyamũ na wa nyũnyi, na wa tũsamũ tũla tũtambũkaa o na nyamũ syĩ ũkanganĩ, nivoovaw’a, o na nĩsyavooviw’e nĩ andũ:

8ĩndĩ vai mũndũ ũtonya kũvoovya ũĩmĩ; nĩ ũthũku ũtauasya, wusũĩte ũoi ũetae kĩkw’ũ.

9Nĩtũmũtaĩaa Mwĩaĩi Asa waitũ naw’o; na nĩtũmevĩkaa andũ naw’o, ala moombiwe na mũvw’ano wa Ngai:

10kanyw’anĩ o ũmwe kumaa ndaĩa na kĩumo. Ana‐a‐asa makwa, maũndũ asu matyaĩle kwĩthĩwa ũu.

11Manzĩ me mũyo na manzĩ me ũũ nĩmatonya kuma nthongonĩ ĩmwe?

12Ana‐a‐asa makwa, mũkũyũ nũtonya kũsyaa mathata, kana mũ savivũ kũsyaa makũyũ? No ta ũu vai nthongo itonya kumya manzĩ me mũnyũ na manzĩ me mũyo.

13Nũũ wenyu mũĩ na wĩ na ũmanyi? Nĩonan’ye mawĩa make kwondũ wa mũendele wake mũseo nthĩnĩ wa ũuu wa ũĩ.

14Ĩndĩ ethĩwa mwĩ na kĩwĩu kyai na ngananĩo ngoonĩ syenyu, mũikekathĩĩe na mũikanenee ũla w’o ũvũngũ.

15Ũsu ti ũĩ ũla ũtheeaa kuma ĩũlũ, ĩndĩ nĩ wa nthĩ, nĩ wa kĩ‐mũndũ, na nĩ wa ndaimoni.

16Nũndũ vala ve kĩwĩu na ngananĩo, nĩvo ve kĩthokoo na kĩla wĩa mũthũku.

17Ĩndĩ ũĩ ũla wumaa ĩũlũ, mbee nĩ mũtheu, na ĩndĩ nĩ wa mũuo, nĩ mũuu, nĩwĩsũvĩkaa na ũvũthũ, wusũĩte tei na mosyao maseo, ũte na wendeesyo kana wangangan’yo.

18Na ũsyao wa ũlũngalu nũvuĩawa nthĩnĩ wa mũuo nĩ ala maetae mũuo.

← Chapter 2 Jump to: Chapter 4 →