James 5

Kamba (Mbivilia) 1956

← Chapter 4 Jump to:

1Ĩndĩ yu, inyw’ĩ athwii, ĩai na kũkaya nũndũ wa mathĩna ala mokĩte ĩũlũ wenyu.

2Mothwii menyu nĩmoete, na ngũa syenyu nilĩkĩte nĩ lungulu.

3Thaavu wenyu na vetha wenyu niĩte nganga; na nganga yasyo ĩkamũkũsĩĩa, nayo ĩkaĩsaa mĩĩ yenyu ta mwaki. Nĩmwĩyiĩe ũthwii wenyu mĩthenya ya mũminũkĩlyo.

4Sisyai, ĩtuvi ya atethya ma wĩa ala makethie mĩũndanĩ yenyu, yĩla mwaleile ũmanenga kwondũ wa ũkengani, nĩyĩũlonzan’ya mũno: na iĩo sya ala akethĩ nilikĩte matũnĩ ma Mwĩaĩi wa Savaothi.

5Inyw’ĩ nĩmwaatĩĩe kwĩyendeesya ene kũũ nthĩ, na kwĩtan’ya ene; na mwaiĩthasya ngoo syenyu mũthenya wa kũawa.

6Nĩmwamũsilĩle na kũmũaa ũla mũlũngalu; nake ndakĩlanasya nenyu.

7Ũmĩĩsyai ĩndĩ, ana‐a‐asa, kũvika kũka kwa Mwĩaĩi. Sisyai, mũĩmi nĩweteelaa ũsyao wa nthĩ ũla wĩ vata akyũmĩĩsya ũndũ waw’o, kũvika oona mbua ya nthwa na ya uũa.

8Inyw’ĩ nenyu ũmĩĩsyai; lũlũmĩlyai ngoo syenyu: nũndũ kũka kwa Mwĩaĩi kwĩ vakuvĩ.

9Mũikanyungunyĩanĩsye inyw’ĩ kwa inyw’ĩ, ana‐a‐asa, nĩ kana mũikasilĩlwe: sisyai, mũsili nũũngeme mĩomonĩ.

10Ana‐a‐asa, mosei athani ala maneenie syĩtwanĩ ya Mwĩaĩi, methĩwe ngelekan’yo kwenyu ya kũthĩna na ya kũmĩĩsya.

11Sisyai, nĩtũmetaa aathimwa ala moomĩĩsye: nĩmweewie ũvoo wa wũmĩĩsyo wa Yovu, na ĩngĩ nĩmwoonie mũminũkĩlyo wa Mwĩaĩi, ũndũ Mwĩaĩi wusũĩte ĩnee na tei.

12Ĩndĩ mbee wa maũndũ onthe, ana‐a‐asa makwa, mũikevĩte na ĩtũ, o na nthĩ, kana na wĩvĩto ũngĩ: ĩndĩ ĩĩ wenyu nĩwĩthĩwe ĩĩ, na aiee wenyu nĩwĩthĩwe aiee; nĩ kana mũikavalũke ũsilĩlonĩ.

13Ve mũndũ katĩ wenyu ũla ũnũũthĩna? Navoye. Ve ũla wĩ na ũtanu? Naine mbathi sya ndaĩa.

14Ve ũla ũwaĩte katĩ wenyu? Namete atumĩa ma ĩkanisa; mamũvoyee, makĩmũvaka mauta syĩtwanĩ ya Mwĩaĩi:

15na kũvoya kwa mũĩkĩĩo kũkatangĩĩa ũsu mũwau, na Mwĩaĩi akamũvosya; na ethĩwa ekĩte naĩ, akaekewa.

16Kwondũ wa ũu ũmbũlanĩlai naĩ syenyu inyw’ĩ kwa inyw’ĩ, na mũivoyanĩa inyw’ĩ kwa inyw’ĩ, nĩ kana mũvow’e. Kwĩsũvana kwa mũndũ mũlũngalu nĩkũvotaa mũno akĩvoya na kĩthetheesyo.

17Eliya aĩ mũndũ wa mwĩkalĩle ũmwe naitũ, na avoya na kĩthing’ĩĩsyo mbua ndĩ kaue; na mbua ndyaaua ĩũlũ wa nthĩ ĩvinda ya myaka ĩtatũ na myei thanthatũ.

18Na avoya ĩngĩ; na ĩtu yausya mbua, na nthĩ yamesya ũsyao wayo.

19Ana‐a‐asa makwa, ethĩwa ve mũndũ wenyu ũvĩtĩtye nzĩa ya ũla w’o, na ũngĩ aimũalyũla;

20ũsu namanye, kana ũla wamũalyũla mũndũ mwathe aume nzĩanĩ ĩla ũvĩtĩtye nayo akatangĩĩa mũndũ kuma kĩkw’ũnĩ, na akavw’ĩka naĩ nyingĩ.

← Chapter 4 Jump to: