Lamentations 1

Kamba (Mbivilia) 1956

Jump to: Chapter 2 →

1Kaĩ ndũa nĩyĩkalaa yĩ nthei, ĩla yaĩ mbusũu andũ! Nĩtw’ĩkĩte ta mũndũ mũka ndiwa, ĩla yaĩ nene katĩ wa i mbaĩ! Yo ĩla yaĩ mwĩĩtu wa mũnene wĩ mbee ũsumbĩnĩ ilungunĩ nene sya nthĩ nĩtw’ĩkĩte ya kumya koti!

2Nĩĩaa mũno ũtukũ, na methoi mayo me mataunĩ mayo; Katĩ wa endwa mayo onthe ndĩ na ũmwe wa kũmĩkiakisya: Anyanyae mayo onthe nĩmamĩkie ũseleke; nĩmatw’ĩkĩte amaitha mayo.

3Yuta nĩ mũendu e mũtave nũndũ wa thĩna, na ũkombo wĩ vinya; Nĩwĩkalaa katĩ wa i mbaĩ, ndonaa ũthũmũo: Athĩn’ya make onthe mamũwĩla e vandũ va kũvivinyĩwa.

4Nzĩa sya Saioni nikũĩa, nĩkwĩthĩwa vati ũmwe ũla wũkaa mbokanĩ ĩtw’ĩtwe: Mbingĩlo syayo syonthe nĩ nthei, athembi mayo nĩmavevũũkaa: Eĩtu atheu mayo nĩmathĩnaw’a, nayo o yo yĩ na ũũ.

5Nthũ syayo nĩsyatw’ĩkie mũtwe, amaitha mayo nĩmeũunĩka; Nũndũ Yeova nũmĩthĩnĩtye ũndũ wa wingĩ wa mavĩtyo mayo: Syana syayo nini nitwaĩtwe syĩ mbee wa nthĩ syĩ ndave.

6Ndaĩa yonthe ya mwĩĩtu wa Saioni nĩmumĩte; Anene mayo me mbee ũsumbĩnĩ nĩmatw’ĩkĩte ta ndaatai nzamba ila itonaa kya ũya, Na nĩmaendete mate na vinya mbee wa ũla ũmaatĩĩaa.

7Mĩthenyanĩ ya monyamao mayo na ya thĩna wayo Yelusaleme nĩnĩũlilikana syĩndũ syayo syonthe sya kwendeesya ila syaĩ vo kuma mĩthenya ya tene: Yĩla andũ mayo mavalũkile mokonĩ ma nthũ, na vatyaĩ ũmwe wamĩtethisye, Nthũ nĩsyamyonie, na syathekeea na kĩvũthya mawanangĩko mayo.

8Yelusaleme nĩyĩkĩte naĩ mũno; kwondũ wa ũu nĩtw’ĩkĩte ta kĩndũ kĩvuku; Onthe ala mamĩtaĩĩaa nĩmeũmĩvũthya, nĩkwĩthĩwa nĩmamyonete yĩ nthei: Ĩĩ, nĩnĩũvevũũka, na kũsyoka na ĩtina.

9Ũvuku wayo waĩ ngũanĩ syayo; ndĩaalilikana mũminũkĩlyo wayo; Kwondũ wa ũu nĩtheeete ta ũseng’yo; ndĩ na mũkiakisya: Sisya, ame Yeova, thĩna wakwa; nũndũ mũmaitha nĩwĩnenevetye mwene.

10Nthũ nĩtambũũkitye kw’oko kwayo ĩũlũ wa syĩndũ syonthe syayo sya kwendeesya: Nũndũ nĩyonete atĩ i mbaĩ nilikĩte vandũ vayo vatheu, Ila weeaie kwondũ wasyo itikaalike ũmbanonĩ waku.

11Andũ mayo onthe nĩmeũvevũũka, nĩmeũmantha lĩu; Nĩmakũanĩtye syĩndũ syoo sya kwendeesya lĩu wa kũvuũkya thayũ: Ona, ame Yeova, noisisya; nũndũ nĩndw’ĩkĩte kĩndũ kĩte vata.

12Ti ũndũ kwenyu, inyw’onthe ala mũvĩtaa? Sisyai, nokyona ethĩwa ve woo o na wĩva ũilyĩ woo wakwa, ũla ũetetwe ĩũlũ wakwa, Ũla Yeova ũnthĩnĩtye naw’o mũthenya wa ũthatu wake mwai.

13Kuma ĩũlũ nũtumĩte mwaki mavĩndĩnĩ makwa, naw’o nũmakĩlasya vinya; Nĩwalanĩte kĩtei ũndũ wa maũũ makwa, nũndũngĩte na ĩtina: Nũmbĩkalĩtye nĩ na ĩvoũ na nĩ mũtevu mũthenya w’onthe.

14Ĩsoki ya mavĩtyo makwa nĩyovetwe nĩ kw’oko kwake; Nĩmakwatanĩte vamwe, nĩmambatĩte ngingonĩ yakwa; nũtumĩte vinya wakwa waa: Mwĩaĩi nũnenganĩte mokonĩ moo, ala ndatonya kũũngama kũmasiĩĩa.

15Mwĩaĩi nũtw’ĩkĩthĩtye sya mana ngũmbaũ syakwa syonthe katĩ wakwa; Nũmbũmbanĩsye ũmbano ũkilĩtye akanyange anake makwa: Mwĩaĩi nũkinyangĩte o ta kĩangĩonĩ mwĩĩtu mũtheu wa Yuta.

16Nũndũ wa maũndũ asu nĩngũĩa; itho yakwa, itho yakwa nĩyĩkũnyũlũlũkya methoi; Nĩkwĩthĩwa mũkiakisya ũla waĩle kũvuũkya thayũ wakwa e kũasa nakwa: Syana syakwa syĩ na ĩvou, nũndũ mũmaitha nũkĩlĩtye vĩnya.

17Saioni nĩnĩũtambũũkya moko mayo; na vati ũmwe wa kũmĩkiakisya; Yeova nĩwĩaĩte ũndũ wa Yakovo, atĩ ala mamũthyũlũlũkĩte makeethĩwa nthũ syake: Yelusaleme yĩ katĩ wamo ta kĩndũ kĩvuku.

18Yeova nĩ mũlũngalu; nũndũ nĩnĩng’endee mwĩao wake: Ĩw’ai, nĩngũmwĩsũva, inyw’ĩ ngo syonthe sya andũ, na sisyai woo wakwa: Eĩtu makwa atheu na anake makwa nĩ aendu me atave.

19Nĩneetie endwa makwa, ĩndĩ nĩmangengie: Athembi makwa na atumĩa makwa nĩmaumiwe nĩ veva me ndũanĩ, Makĩmantha lĩu wa kũvuũkya mathayũ moo.

20Sisya, ame Yeova; nũndũ nĩ thĩnanĩ; ngoo yakwa nĩnĩkũũũya; Ngoo yakwa nĩnĩthyũũĩe nthĩnĩ wakwa; nũndũ nĩnĩng’endete mũno: Ũtee ũvyũ nũtuma kũkw’ĩĩwa, mũsyĩ kwĩ ta kĩkw’ũ.

21Nĩmew’ĩte kana nĩnĩvevũũkaa; vati ũmwe wa kũngiakisya; Amaitha makwa onthe nĩmew’ĩte ũndũ wa thĩna wakwa; nĩmekwĩw’a mũyo nũndũ nĩwĩkĩte ũu: Ũkaete mũthenya ũla ũtavanĩtye, na makeethĩwa mailyĩ takwa.

22Ũthũku woo w’onthe nũvike mbee waku; Naku ũmeke, o tondũ ũmbĩkĩte ũndũ wa mavĩtyo makwa onthe: Nũndũ mavevũũka makwa nĩ maingĩ, na ngoo yakwa nĩnĩũnyala.

Jump to: Chapter 2 →