Lamentations 4

Kamba (Mbivilia) 1956

← Chapter 3 Jump to: Chapter 5 →

1A! Thaavu nũvukĩte! Thaavu ũla mũtheu mbee kaĩ nũalyũkĩte! Mavia ma vala vandũ vatheu nĩmekwĩtwa wambĩlĩlyonĩ wa kĩla nzĩa.

2Ana ma Saioni ala me vata mũno, meanene na thaavu mũseo mũno, Kaĩ nĩmatalawa ta itete sya yũmba, wĩa wa moko ma mũmbi!

3O na mbĩwa nasyo nikusasya nondo, nĩsyongasya tũswii twasyo: Mwĩĩtu wa andũ makwa nũtw’ĩkĩte mwai, ta nyaa sya weũnĩ.

4Ũĩmĩ wa kana kala kongaa nũlũmanasya na kaakaa wa kanyw’a wako nũndũ wa waũni: Syana nini nĩsyĩtasya imũtũ, na vati mũndũ winengae.

5Ala maie liu mũseo, me ooka nzĩanĩ nene: Ale maeiwe mevw’ĩkĩte ngũa ndune mũno nĩmekwĩvĩtĩĩsya ũtũnda.

6Nũndũ ũthũku wa mwĩĩtu wa andũ maku nĩ mũnene kwĩ naĩ sya Sotomo, Ĩla yang’uthũlilwe o kavinda kanini, na vatyaĩ moko mailĩĩlwe ĩũlũ wayo.

7Anene make me ndaĩa maĩ atheu kũvitũka ĩa, maĩ eũ kwĩ ĩia; Maĩ atune mĩĩnĩ kwĩ tũvila twa maliani, kũtendea kwoo kwailyĩ ta kwa savili.

8Mothyũ moo nĩ maiũ mũno kwĩ makaa; maimanyĩka me nzĩanĩ nene: Kĩkonde kyoo nĩkĩlũmanĩte na mavĩndĩ moo; nĩkyũmĩte, nĩkĩtw’ĩkĩte ta mũtĩ.

9Ala mooaiwe nĩ ũvyũ me kavaa kwĩ ala mooaiwe nĩ nzaa; Nũndũ aa nĩmang’ong’aa, mang’ong’a vyũ, nũndũ wa kwaĩwa nĩ mosyao ma mũũndanĩ.

10Moko ma aka me tei nĩmauĩte syana syoo ene; Nĩsyo syaĩ lĩu woo ĩvinda ya kwanangwa kwa mwĩĩtu wa andũ makwa.

11Yeova nĩwĩanĩtye ũthilĩku wake, nĩwonoetye ũthatu wake mwai; Na nĩwakanĩtye mwaki Saioni, ũla ũminĩte myambĩlĩlyo yayo.

12Asumbĩ ma nthĩ matyaaĩtĩkĩla, o na andũ onthe ala matwĩe nthĩ, Kana nthũ na mũmaitha nĩmakavota mbingĩlonĩ sya Yelusaleme.

13Kĩtumi nĩ ũndũ wa naĩ sya athani mayo, na mothũku ma athembi mayo, Ala metĩkisye nthakame ya ala alũngalu nthĩnĩ wayo.

14Nĩmangangaa ta ililinda nzĩanĩ nene, nĩmevukĩtye na nthakame, Ũkethĩa andũ matitonya kũkiita ngũa syoo.

15Mamatavisye, Endai inyw’ĩ, Avuku! Endai, endai, mũikakiite! Yĩla makĩie na kwanganga, andũ maneenie katĩ wa i mbaĩ, Matikekala vaa ĩngĩ.

16Ũthatu wa Yeova nũmanyaĩĩkĩtye; ndakamasyaĩĩsya ĩngĩ: Matyaataĩa athembi, matyaamenda atumĩa.

17Metho maitũ o na yu nĩmeũseekea makĩsyaĩĩsya ũndũ wa ũtethyo witũ wa mana: Kweteelanĩ kwitũ nĩtweteelile mbaĩ ĩtatonya kũtangĩĩa.

18Nĩmeũsyĩma matambya maitũ, na kwondũ wa ũu tũtitonya kũthi nzĩanĩ sitũ nene: Mũminũkĩlyo witũ wĩ vakuvĩ, mĩthenya yaitũ nĩ mĩanĩsye; nũndũ mũminũkĩlyo witũ nĩ mũku.

19Ala matũatĩĩe maĩ mĩtũkĩ kwĩ ndiũ sya matunĩ: Nĩmatũvikĩlile iĩmanĩ, nĩmatwoveeisye weũnĩ.

20Mĩthũmũ ya manyiũũ maitũ, mwĩtĩkĩw’a mauta wa Yeova, nĩwakwatĩwe maimanĩ moo; Ũla twaneenie ũndũ wake, Ungu wa muunyĩ wake tũkekalaa thayũ katĩ wa i mbaĩ.

21Tana na kwĩw’a mũyo, we mwĩĩtu wa Etomu, ũla ũtũaa nthĩ yĩtawa Usi: Kĩkombe kĩkavĩtĩla kũvika vala ũĩ; ũkeethĩwa ũtoonetw’e, na kwĩtw’ĩkĩthya mwene mũthei.

22Ũsilĩlo wa ũthũku waku nĩwĩanĩtw’e, we mwĩĩtu wa Saioni; ndakakũtwaa ĩngĩ wĩ mũtave: Akasilĩla ũthũku waku, we mwĩĩtu wa Etomu; akavuũa naĩ syaku.

← Chapter 3 Jump to: Chapter 5 →